ތިން ޤައުމެއްގައި ހުރި އެމެރިކާގެ އަސްކަރީ ވަސީލަތް ތަކަށް ވަރުގަދަ ހަމަލާ ތަކެއް ދީފިން: އީރާން

މެދު އިރުމަތީގެ ތިން ޤައުމެއްގައި ހުރި އެމެރިކާގެ އަސްކަރީ މަރުކަޒު ތަަކަށް އަމާޒުކޮށް، ވަރުގަދަ ޑްރޯން ހަމަލާ ތަކެއް ދީފައިވާ ކަމަށް އީރާން އިން ބުނެފި އެވެ.

އީރާން އިން ބުނެފައިވާ ގޮތުގައި އެ ޤައުމުން ހަމަލާ އަމާޒު ކޮށްފައި ވަނީ ކުވެއިތާއި، ޤަތަރު އަދި ބަހްރައިންގައި ޤާއިމު ކޮށްފައިވާ އެމެރިކާގެ އަސްކަރީ ވަސީލަތް ތަކަށެވެ. 

އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވާ ގޮތުގައި، ކުވެއިތުގައި ހުރި އެމެރިކާގެ ޕެޓްރިއަޓް މިސައިލް ޑިފެންސް ސިސްޓަމް ތަކަށް ވަނީ ޑްރޯން ބޭނުން ކޮށްގެން ހަމަލާ ދީފައި އެވެ. އަދި ޤަތަރުގައި ހުރި އެމެރިކާގެ ސެޓަލައިޓް އެންޓަނާ ސިސްޓަމް ތަކަށް ވެސް އީރާން އިން ހަމަލާ ދީފައިވާ ކަމަށް ބުނެފައިވެ އެވެ. 

އީރާން އިން މި ހަމަލާ ތަކުގެ ޒިންމާ އުފުލާފައިވާއިރު، މި ހަމަލާ ތަކުގެ ސަބަބުން އެމެރިކާގެ އަސްކަރީ ވަސީލަތް ތަކަށް ލިބުނު ގެއްލުމުގެ ތަފްސީލެއް އެމެރިކާ އިން މިހާތަނަށް ހާމަ ކޮށްފައި ނުވެ އެވެ. ނަމަވެސް، މިއީ މެދު އިރުމަތީގެ މަސްރަހު އިތުރަށް ނުތަނަވަސްވެގެން ދާނެ ކަމެއް ކަމަށް މަސްރަހު ދިރާސާކުރާ ފަރާތް ތަކުން ބުނެ އެވެ.

މި ހާދިސާއާ ގުޅިގެން މެދު އިރުމަތީގައި ތިބި އެމެރިކާގެ ސިފައިންނާއި އަސްކަރީ މަރުކަޒު ތަކުގެ ސަލާމަތީ ކަންކަން ވަނީ އިތުރަށް ވަރުގަދަ ކޮށްފައި އެވެ.