"އަދަދު" ނޫހަށް ރައީސް އޮފީހުގެ ޕްރެސްތަކަށް ވަނުން މަނާކުރި މައްސަލަ, ރައީސް މުއިއްޒު އުފެއްދެވި ޝަކުވާ ކޮމިޓީއަށް ހުށަހަޅައިފި

ރައީސުލްޖުމްހޫރިއްޔާގެ އޮފީހުން އިންތިޒާމުކޮށްގެން ބާއްވާ ނޫސްވެރިންގެ ބައްދަލުވުންތަކަށް "އަދަދު" ނޫހާއި އެ ނޫހުގެ ނޫސްވެރިން ވަނުން މަނާކުރި މައްސަލަ، ރައީސް ޑރ. މުހައްމަދު މުއިއްޒު އުފައްދަވާފައިވާ "ސިޓިޒަންސް ކޮމްޕްލެއިންޓްސް ބިއުރޯ" އަށް ހުށަހަޅައިފި އެވެ.

މިދިޔަ އޭޕްރީލް މަހުގެ 16 ވަނަ ދުވަހު ރައީސް މުއިއްޒު އުފެއްދެވި، ރައްޔިތުންގެ ކަންބޮޑުވުންތައް ސަރުކާރުގެ ސަމާލުކަމަށް ގެނައުމަށް 24 ގަޑިއިރު ޚިދުމަތްދޭ މި ބިއުރޯއަށް "އަދަދު" ނޫހުން ބުރާސްފަތި ދުވަހު ފޮނުވި ސިޓީގައި ބުނެފައިވަނީ، ރައީސް އޮފީހުގެ ނިންމުމުގެ ރަސްމީ ލިޔުން ހޯދުމަށް އެދި އެ ނޫހުން ފޮނުވި ސިޓީއަށް މިއަދާ ހަމައަށްވެސް އެއްވެސް ޖަވާބެއް ލިބިފައިނުވާ ކަމަށެވެ.

އެ ނޫހުން ބުނާ ގޮތުގައި، ރައީސް އޮފީހުގެ ނިންމުމުގެ ރަސްމީ ލިޔުން އެ އޮފީހުން ހިފެހެއްޓުމަކީ ގާނޫނުއަސާސީގެ 43 ވަނަ މާއްދާއާ ސާފުކޮށް ޚިލާފު ކަމެކެވެ. ގާނޫނުއަސާސީގެ އެ މާއްދާގައި ބަޔާންކޮށްފައިވަނީ އަދުލުވެރިކަމާއެކު އިދާރީ ފިޔަވަޅުތައް އެޅުމުގެ ހައްގެވެ.

އެ މާއްދާގައި ވާގޮތުން އިދާރީ ހިންގުމުގެ ދާއިރާ އިން އަދުލު އިންސާފުގެ ހަމަތަކުން އެކަށީގެންވާ އަވަސް މިނެއްގައި، ކޮންމެ މީހަކާމެދުވެސް ކަންކުރެވުމަކީ ކޮންމެ ދިވެހި ރައްޔިތަކަށް ވެސް ލިބުގެންވާ ހައްގެކެވެ. އަދި އަޅާ ފިޔަވަޅެއްގެ ސަބަބުން ހައްގަކަށް އުނިކަން ލިބިއްޖެނަމަ، އެ ފިޔަވަޅު އެޅި ސަބަބު ލިޔުމުން ލިބުމުގެ ހައްގު ވެސް ކޮންމެ ދިވެހި ރައްޔިތަކަސް ލިބިގެންވެ އެވެ.  މީގެ އިތުރުން އަދި އެފަދަ ފިޔަވަޅެއްގެ ސަބަބުން ހައްގަކަށް އުނިކަން ލިބިއްޖެނަމަ، އެ ކަމެއް ކޯޓަށް ހުށަހެޅުމުގެ ހައްގު ލިބިގެންވާ ކަމަށް ވެސް އެ މާއްދާގައި ބަޔާންކޮށްފައިވެ އެވެ.

"އަދަދު" ނޫހުން ހާމަކުރި ގޮތުގައި، ރައީސް އޮފީހުގެ މި ފިޔަވަޅަކީ ބޭއިންސާފު ފިޔަވަޅެއްކަން ސާބިތުކުރުމަށް ބައިނަލްއަގުވާމީ އިދާރާތަކަށް ހުށަހަޅަން އެ ނޫހުން ބޭނުންވެ އެވެ. ނަމަވެސް، ރަސްމީ ލިޔުން ނުލިބުމުގެ ސަބަބުން އިންސާފު ހޯދުމަށް ބޮޑެތި ހުރަސްތަކެއް ކުރިމަތިވެފައިވާ ކަމަށް އެ ނޫހުން ބުންޏެވެ. އެހެން ކަމުން މިދިޔަ މޭ މަހުގެ 18 ގައި އެ ނޫހުން ހުށަހެޅި ސިޓީ އަށް ޖަވާބު ވަގުތުން ފޯރުކޮށްދީ، އަދި ޖަވާބު ނުދީ ލަސްވި މައްސަލަ ބައްލަވައިދެއްވުމަށް ޝަކުވާ ބިއުރޯއަށް ފޮނުވި ސިޓީގައިވެ އެވެ.

މި މައްސަލަ ފެށުނީ، ރައީސް އޮފީހުން އިންތިޒާމުކުރި ނޫސްވެރިންގެ ބައްދަލުވުމެއްގައި، ރައީސް މުއިއްޒަށް އެ އޮފީހުގެ ކުރީގެ މުވައްޒަފަކު ކުރާ ތުހުމަތުތަކަކާ ގުޅޭގޮތުން "އަދަދު" ނޫހުގެ ނޫސްވެރިޔާ މުހައްމަދު ޝަހުޒާން ސުވާލުކުރި ހިސާބުންނެވެ. އެގޮތުން މެއި 11 ވަނަ ދުވަހު ބޭއްވި ޕްރެސްއަކުން ޝަހުޒާން ބޭރުކޮށްލީ، ކްރިމިނަލް ކޯޓުން ނެރެފައިވާ "އަނގަ ބަންދުކުރުމުގެ" އަމުރަކާ އޭނާ ޚިލާފުވި ކަމަށް ބުނެ އެވެ. އޭގެ ފަހުން ރައީސް އޮފީހުން ވަނީ އެ އޮފީހުގެ ޕްރެސްތަކަށް "އަދަދު" ނޫސް ވަނުން މަނާކުރުމަށް ނިންމާފަ އެވެ.

ރައީސް އޮފީހުން ނިންމާފައިވަނީ އަދަދު ނޫހުން ގެނެސްދިން ޑޮކިއުމެންޓްރީއަކާ ގުޅިގެން ކްރިމިނަލް ކޯޓުގައި ހިނގަމުންދާ މައްސަލަ އާއި، މީޑިއާ އެންޑް ބްރޯޑްކާސްޓިން ކޮމިޝަނުން ބަލަމުންދާ މައްސަލަތައް ނިމެންދެން "އަދަދު" ނޫހުގެ ނޫސްވެރިންނަށް އެ ފުރުސަތު ނުދިނުމަށެވެ.