ސްޓޭޓް ފާމާ މެދުވެރިކޮށް ބޭސް ހޯދަން އެދުނުތާ 4 މަސް؛ ބޭސް ނުލިބި ބަލިމީހަކު ބޮޑު ކަންބޮޑުވުމެއްގައި
ސްޓޭޓް ފާމާ މެދުވެރިކޮށް ބޭހަށް އޯޑަރުކުރި ބަލިމީހަކަށް، ހަތަރު މަސްވީއިރުވެސް ބޭސް ނުލިބި ލަސްވަމުންދާ މައްސަލައެއް ފެންމަތިވެއްޖެ. އޭޕްރީލް މަހު އޯޑަރުކުރި "ޕައިރިޑޯސްޓިގްމައިން" ބޭހުގެ ބަދަލުގައި އޮޅިގެން އެހެން ބޭހެއް ފޮނުވި ނަމަވެސް، އެކަން އިސްލާހުކޮށް ރަނގަޅު ބޭސް ފޯރުކޮށްދިނުމުގައި ކުންފުނިން އިހުމާލުވެފައިވާ ކަމަށް ބަލިމީހާ ބުނޭ. މިފަދަ އަސާސީ ބޭސްތައް ލިބުން ލަސްވުމުގެ ސަބަބުން ސިއްހީ ހާލަތު ގޯސްވެދާނެތީ އާންމުންގެ މެދުގައި މިހާރު ވަނީ ކަންބޮޑުވުން އިތުރުވެފަ.
އައިޖީއެމްޗް ގައި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ބޭސްފިހާރަ އެއް ހުޅުވުމަށް ބޭއްވި ރަސްމިއްޔާތެއްގައި އެކުންފުނީގެ އިސްވެރިން ބައިވެރިވެ ވަޑައިގަންނަވަނީ. | ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް
ރާއްޖެއަށް ބޭނުންވާ ބޭސް ފަސޭހައިން ލިބޭނެ އިންތިޒާމު ހަމަޖެއްސުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އުފެއްދެވި "ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަން" (ސްޓޭޓް ފާމާ) އަށް ބޭހަކަށް އޯޑަރު ކުރިތާ ހަތަރު މަސް ވެގެން ދިޔައިރުވެސް ބޭސް ނުލިބޭ މައްސަލައެއް ފެންމަތިވެއްޖެ އެވެ.
މި މައްސަލައިގައި ބަލިމީހަކު ވަނީ އޭނާގެ ސިއްހީ ހާލަތަށް ބޭނުންވާ އަސާސީ ބޭސް ނުލިބި ލަސްވަމުންދާތީ ސޯޝަލް މީޑިއާގައި ކަންބޮޑުވުން ފާޅުކޮށްފަ އެވެ.
މި މައްސަލައިގައި ކަންބޮޑުވުން ފާޅުކުރި ބަލިމީހާ ބުނި ގޮތުގައި، އޭނާގެ ސިއްހީ ހާލަތަށް ކޮންމެހެން ބޭނުންވާ "ޕައިރިޑޯސްޓިގްމައިން" ބޭހަށް ސްޓޭޓް ފާމާ މެދުވެރިކޮށް އޯޑަރު ކުރީ މިއަހަރުގެ އޭޕްރީލް މަހުގެ ތެރޭގަ އެވެ. ނަމަވެސް، އޯޑަރު ކުރިތާ މަހެއްހާ ދުވަސް ފަހުން އޭނާ އަށް ލިބުނީ އޯޑަރު ކުރި ބޭހުގެ ބަދަލުގައި މުޅިން އެހެން ބޭހެއް ކަމަށް އޭނާ ބުންޏެވެ.
އޮޅިގެން އެހެން ބޭހެއް ފޮނުވުމާ ގުޅިގެން، ރަނގަޅު ބޭސް ހޯދުމަށް ވަގުތުން އެދުނު ނަމަވެސް އޭގެ ފަހުން ތިން މަސް ފާއިތުވެގެން ދިޔައިރުވެސް އަދިވެސް އެ ބޭސް ނުލިބޭކަމަށް އެ މީހާ ފާހަގަކުރި އެވެ. އޭނާ ބުނި ގޮތުގައި މި ބޭހަކީ އޭނާގެ ފަރުވާއަށް ނުހަނު މުހިންމު ބޭހަކަށް ވާއިރު، ތަކުރާރުކޮށް ސްޓޭޓް ފާމާއަށް ގުޅައި ފޮލޯއަޕް ހެދުމުންވެސް އެދެވޭ ޖަވާބެއް ލިބިފައެއް ނުވެ އެވެ. އަދި ބޭސް ލިބޭނެ ވަކި ތާރީޚެއްވެސް އެ ކުންފުނިން ބުނެދީފައި ނުވާކަމަށް އޭނާ ބުންޏެވެ.
ކަމާބެހޭ ފަރާތްތަކުން ރާއްޖެއަށް ބޭސް ލިބުމުގައި ދަތިތަކެއް ނެތް ކަމަށް ބުނަމުންދާއިރު، މިފަދަ އަސާސީ ބޭސްތައް ނުލިބި ހަތަރު މަސް ދުވަސް ހޭދަވުމަކީ ބަލައިގަނެވޭނެ ކަމެއް ނޫން ކަމަށް ބަލިމީހާ ބުނެ އެވެ. މި ލަސްވުމުގެ ސަބަބުން ސިއްހީ ހާލަތު އިތުރަށް ގޯސްވެ، ކުރިމަތިވެދާނެ ނުރައްކާތަކުގެ ޒިންމާ ނަގާނީ ކާކުތޯ އޭނާ ވަނީ ސުވާލު އުފައްދާފަ އެވެ.
ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު، ރާއްޖެއަށް ފެންވަރު ރަނގަޅު ބޭސް މެދުނުކެނޑި ފޯރުކޮށްދިނުމަށް ސްޓޭޓް ފާމާ އުފެއްދެވި ނަމަވެސް، ބޭސް ނުލޮބިމުގެ މައްސަލައަށް އެއްވެސް އެދޭވޭ ހައްލެއް ލިބިފަނުވާކަމަށް ގިނަ ބަޔަކު ދަނީ ބުނަމުންނެވެ. ޚާއްސަކޮށް ދާއިމީ ބަލިތަކަށް ފަރުވާ ހޯދާ މީހުންނަށް ބޭނުންވާ ބޭސް ލިބުމުގައި ހުރި މިފަދަ ހުރަސްތަކުގެ ސަބަބުން ސަރުކާރުގެ ސިޔާސަތުތަކާމެދު އާއްމު ރައްޔިތުން ދަނީ ސުވާލު އުފައްދަމުންނެވެ.
