ދިވެހިރާއްޖޭގެ ނޮން-ޕާފޯމިންގ ލޯނުގެ މިންގަނޑު ބޫޓާން އާއި އިންޑިއާ އަށް ވުރެ މަތީގައި!

ދިވެހިރާއްޖޭގައި ބޭންކުތަކުން ދޫކޮށްފައިވާ ލޯނުތަކުގެ ތެރެއިން އަނބުރާ ނުދައްކާ ލޯނު ނުވަތަ ނޮން-ޕާފޯމިންގ ލޯން (އެން.ޕީ.އެލް) ގެ މިންގަނޑު ސަރަހައްދުގެ ގައުމުތަކަށް ބަލާއިރު ހުރީ އިންޑިއާ އާއި ބޫޓާން އަށް ވުރެ މަތީގައިކަން ފާހަގަ ކުރެވިއްޖެ އެވެ. 

ބޭންކިންގ ދާއިރާގެ އެންމެ ފަހުގެ ތަފާސްހިސާބުތައް ދައްކާގޮތުން، އިންޑިއާގެ އެން.ޕީ.އެލް ރޭޝިއޯ 2.2 އިންސައްތައިގައި ހުރިއިރު، ބޫޓާނުގެ ރޭޝިއޯ ހުރީ 4.5 އިންސައްތައިގަ އެވެ. ދިވެހިރާއްޖޭގެ އެން.ޕީ.އެލް ރޭޝިއޯ 5.5 އިންސައްތައިގައި ހުރިއިރު، ނޭޕާލްގެ ރޭޝިއޯއަކީ 5.6 އިންސައްތަ އެވެ. މީގެ އިތުރުން ޕާކިސްތާނުގެ ރޭޝިއޯ 5.8 އިންސައްތައިގައި އަދި އޮތްއިރު، ސްރީލަންކާގެ ރޭޝިއޯ ހުރީ 6.5 އިންސައްތައިގަ އެވެ.

ހަނގުރާމައިގެ ސަބަބުން ސުންނާފަތިވެފައިވާ ޔޫކްރެއިނަށް ފަހު، ދުނިޔޭގައި ދެވަނައަށް އެންމެ ގިނައިން ލޯނު ނުދައްކާ ގައުމަކަށް އޮތީ މި ސަރަހައްދުގައި އޮތް ބަންގްލަދޭޝް އެވެ. އެ ގައުމުގެ ބޭންކުތަކުން ދޫކޮށްފައިވާ ލޯނުތަކުގެ ގާތްގަނޑަކަށް ތިންބައިކުޅަ އެއްބައި ވަނީ ޑިފޯލްޓްވެފަ އެވެ. މި ލިސްޓުގެ އެއްވަނައިގައި އޮތް ޔޫކްރެއިނުގެ އެން.ޕީ.އެލް ރޭޝިއޯ ހުރީ 37.35 އިންސައްތައިގަ އެވެ. މިއީ އެ ގައުމުގައި ކުރިއަށްދާ ހަނގުރާމައިގެ ސަބަބުން އިގްތިސާދަށް ލިބިފައިވާ ބޮޑު ގެއްލުމުގެ ނަތީޖާ އެވެ. ޔޫކްރެއިން އާ ޖެހިގެން ދެވަނައިގައި އޮތް ބަންގްލަދޭޝްގެ އެން.ޕީ.އެލް ރޭޝިއޯ 32.26 އިންސައްތައިގައި ހުރިއިރު، ތިންވަނައިގައި އޮތް ޗާޑުގެ ރޭޝިއޯއަކީ 31.51 އިންސައްތައެވެ. އަދި ގިނީގެ ރޭޝިއޯ ހުރީ 31.15 އިންސައްތައިގަ އެވެ.

ދެކުނު އޭޝިއާގެ ސަރަހައްދީ އެއްބާރުލުމާބެހޭ ޖަމިއްޔާ (ސާކް) ގެ ގައުމުތަކުގެ ތެރެއިން ބަންގްލަދޭޝްގެ ބޭންކިންގ ދާއިރާ ފާހަގަކުރެވެނީ ލޯނު ދޫކުރުމުގައި ހަރުދަނާ އުސޫލުތަކެއް ނެތް އަދި ލޯނު އަނބުރާ ހޯދުމުގައި ނުކުޅެދިފައިވާ ދާއިރާއެއްގެ ގޮތުގަ އެވެ. އަވަށްޓެރި އެހެން ގައުމުތަކާ އަޅާބަލާއިރު ބަންގްލަދޭޝްގެ އެން.ޕީ.އެލް ރޭޝިއޯ ހުރީ އިންތިހާއަށް މަތީގައިކަން ފާހަގަ ކުރެވެ އެވެ.

އިންޑިއާގެ މީޑިއާ ރިޕޯޓުތައް ބުނާ ގޮތުގައި އެ ގައުމުގެ ސަރުކާރު ހިއްސާވާ ބޭންކުތަކުން ދޫކޮށްފައިވާ ލޯނުތަކުގެ ތެރެއިން އަނބުރާ ނުދައްކާ ލޯނުތައް މަދުކުރުމާ ގުޅޭގޮތުން ފިނޭންސް މިނިސްޓްރީން އާދިއްތަ ދުވަހު ވަނީ ބައްދަލުވުމެއް ބާއްވާފަ އެވެ. އިންޑިއާ ސަރުކާރުގެ ބޭންކުތަކުގެ މެނޭޖިންގ ޑިރެކްޓަރުން ބައިވެރިވެވަޑައިގެންނެވި އަދި ފިނޭންސް ޑިވިޜަންގެ ސެކްރެޓަރީ ރިޔާސަތު ބެލެހެއްޓެވި މި ބައްދަލުވުމުގައި ފާހަގަކުރެއްވި ގޮތުގައި، ސިޔާސީ ނުފޫޒުން ލޯނު ދޫކުރުމަށް ނިންމާ ނިންމުންތަކުގެ ސަބަބުން، މި ސަރަހައްދުގެ ލޯނު ދޫކުރުމުގެ މިންގަނޑުތައް ވަނީ ތާރީޚީގޮތުން ބަލިކަށިވެފަ އެވެ.

ބަންގްލަދޭޝް ބޭންކުގެ ތަފާސްހިސާބުތަކުން ދައްކާގޮތުގައި، މިއަހަރުގެ މާރިޗު މަހުގެ ނިޔަލަށް އޮތް ތިން މަސްދުވަހުގެ ތެރޭގައި އެ ގައުމުގެ ބޭންކިންގ ދާއިރާގައި އަނބުރާ ނުދައްކާ ހުރި ލޯނުގެ އަދަދު 31,000 ކްރޯޑް ޓާކާއަށް ވުރެ އިތުރުވެ، ޖުމްލަ 5.89 ލައްކަ ކްރޯޑް ޓާކާއަށް ވަނީ އަރާފަ އެވެ. އިގްތިސާދީ މާހިރުން އިންޒާރު ދޭގޮތުގައި، އޮނިގަނޑަށް ބޮޑެތި އިސްލާހުތަކެއް ނުގެނެސް އަދި ސިޔާސީ ނުފޫޒުން ލޯނު ދޫކުރުން ހުއްޓާނުލައިފިނަމަ، ބަންގްލަދޭޝް އާއި ސާކްގެ އެހެން ގައުމުތަކާ ދެމެދު އޮތް ފަރަގު ބޮޑުވަމުންގޮސް، މުޅި ގައުމުގެ މެކްރޯ-އިކޮނޮމިކް ހަމަޖެހުމަށް ބޮޑެތި ނުރައްކާތަކެއް ކުރިމަތިވާނެ އެވެ.