އިންޑިއާއިން ބޭރުކުރާ ތެލުގެ އެކްސްޕޯޓް ޑިއުޓީއިން ރާއްޖެ އިސްތިސްނާކޮށްފި

އިންޑިއާއިން ބޭރުކުރާ ތެލުގެ އެކްސްޕޯޓް ޑިއުޓީއިން ރާއްޖެ އިސްތިސްނާކޮށްފި އެވެ. އެކްސްޕޯޓް ޓެކްސް ދައްކަން ނުޖެހޭ ގައުމުތަކުގެ ލިސްޓަށް ދިވެހިރާއްޖެ އާއި މޮރިޝަސް އިތުރުކުރަން އިންޑިއާ ސަރުކާރުން ނިންމި އިރު މީގެ ކުރިން އިންޑިއާގެ ދައުލަތުގެ ތެޔޮ ކުންފުނިތަކުން މި އިސްތިސްނާ ދީފައިވަނީ ހަމައެކަނި ނޭޕާލް، ބޫޓާން، ބަންގްލަދޭޝް އަދި ސްރީލަންކާއަށެވެ.

އިންޑިއާއިން ބޭރުކުރާ ތެލުގެ ބާވަތްތަކުގެ މިންވަރު އިތުރުވުމުގެ ފުރުސަތު ބޮޑުވެފައިވަނިކޮށް، އެ ގައުމުގެ ޔޫނިއަން ފައިނޭންސް މިނިސްޓްރީން ޑީސަލާއި ބޯޓުދެލި ނުވަތަ އޭވިއޭޝަން ޓާބައިން ފިއުލް (އޭޓީއެފް) އިން ނަގާ ޓެކްސް ކުޑަކޮށް، ޕެޓްރޯލުން ނަގާ ޓެކްސް ބޮޑުކުރުމަށް 2026 ޖޫން 30 ވީ އަންގާރަ ދުވަހުގެ ރޭ ނިންމައިފި އެވެ.

މި ބަދަލާއެކު ޑީސަލް ލިޓަރަކުން ނަގާ ޓެކްސް 8.5 ރުޕީސް އަށް އަދި އޭޓީއެފް ލިޓަރަކުން ނަގާ ޓެކްސް 7.5 ރުޕީސް އަށް ވަނީ ކުޑަކޮށްފަ އެވެ. ނަމަވެސް ޕެޓްރޯލް ލިޓަރަކުން ނަގާ ޓެކްސް ވަނީ 4 ރުޕީސް އަށް ބޮޑުކޮށްފަ އެވެ. މި އާ ރޭޓްތަކަށް އަމަލުކުރަން ފަށާނީ ޖުލައި މަހުގެ ފުރަތަމަ ދުވަހުން ފެށިގެން ކުރިއަށް އޮތް 15 ދުވަހުގެ މުއްދަތަށެވެ.

މި ޓެކްސްތަކުގެ ތަފްސީލަށް ބަލާއިރު، އިންޑިއާގެ ފައިނޭންސް މިނިސްޓްރީން ވަނީ ޑީސަލް ލިޓަރަކުން ނަގާ ޑިއުޓީ، މިދިޔަ ޖޫން 16 ވަނަ ދުވަހު ކަނޑައެޅި 14 ރުޕީސް އިން 5.5 ރުޕިސް އަށް ކުޑަކޮށްފަ އެވެ. އަދި އޭޓީއެފް އިން ނަގާ ޓެކްސް 12.5 ރުޕީސް އިން 5 ރުޕީސް އަށް ކުޑަކޮށްފައިވާއިރު، ޕެޓްރޯލް އެކްސްޕޯޓުން ނަގާ ޓެކްސް ވަނީ 1.5 ރުޕީސް އިން 2.5 ރުޕީސް އަށް ބޮޑުކޮށްފަ އެވެ.

ހުޅަނގު އޭޝިއާގެ މަސްރަހު ގޯސްވުމާ ގުޅިގެން، އިންޑިއާގެ އެތެރޭގެ ބާޒާރަށް ބޭނުންވާ ވަރަށް ތެލުގެ ބާވަތްތައް ހުރިކަން ކަށަވަރުކުރުމަށާއި، ބޭރު ގައުމުތަކަށް ތެޔޮ އެކްސްޕޯޓްކުރުން މަދުކުރުމަށް ހިތްވަރު ދިނުމުގެ ގޮތުން އިންޑިއާ ސަރުކާރުން މި ޓެކްސްތައް ފުރަތަމަ ތައާރަފްކުރީ މާރިޗު 27 ވަނަ ދުވަހުން ފެށިގެންނެވެ.