އިންޑިއާގެ ޔޫޕީއައި ޚިދުމަތް ބައިނަލްއަގުވާމީ ފެންވަރުގައި ފުޅާކުރުމަށް އެޗްއެސްބީސީ އާއި ޖޭޕީ މޯގަންއާ އެކު ޕާޓްނަޝިޕެއް ގާއިމުކޮށްފި

އިންޑިއާގެ ޔުނިފައިޑް ޕޭމަންޓްސް އިންޓަފޭސް (ޔޫޕީއައި) ހިންގާ ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިން، ބައިނަލްއަގުވާމީ ޔޫޕީއައި މުއާމަލާތްތަކަށް ވަގުތުން ފައިސާ ބަދަލުކޮށްދިނުމަށް (ރިއަލް-ޓައިމް އެފްއެކްސް ސެޓްލްމަންޓް) އެޗްއެސްބީސީ އިންޑިއާ އަދި ޖޭޕީ މޯގަން ޕޭމަންޓްސްއާ އެކު ބައިނަލްއަގުވާމީ ޕާޓްނަޝިޕެއް ގާއިމުކޮށްފި އެވެ.

އެންޕީސީއައި އިން ނެރުނު ބަޔާނެއްގައި ބުނެފައިވަނީ، މި އެއްބަސްވުމުގެ މައިގަނޑު މަގްސަދަކީ ގައުމުން ބޭރަށް ދަތުރުކުރާ އިންޑިއާގެ ރައްޔިތުންނަށް ޔޫޕީއައި މެދުވެރިކޮށް ފަސޭހަކަމާއެކު ބައިނަލްއަގުވާމީ ފެންވަރުގައި ފައިސާގެ މުއާމަލާތްތައް ކުރެވޭނެ އިންތިޒާމު ހަމަޖެއްސުން ކަމަށެވެ.

މި މަޝްރޫއުގެ ބޭންކިން ޕާޓްނަރުންގެ ގޮތުގައި ހިމެނޭ އެޗްއެސްބީސީ އިންޑިއާ އަދި ޖޭޕީ މޯގަން ޕޭމަންޓްސް އިން، ޑައިރެކްޓް އެޕްލިކޭޝަން ޕްރޮގްރާމިން އިންޓަފޭސް (އޭޕީއައި) މެދުވެރިކޮށް ވަގުތުން ފައިސާ ބަދަލުކުރެވޭ ރޭޓްތައް ފޯރުކޮށްދޭނެ އެވެ. މީގެ ސަބަބުން ކަސްޓަމަރުން މުއާމަލާތް ކުރާ ވަގުތު، އިންޑިއާ ރުޕީސް އިން ދައްކަންޖެހޭ ސީދާ އަދަދު ފެންނަން ހުންނާނެ އެވެ. މި ނިޒާމުގެ ސަބަބުން ބައިނަލްއަގުވާމީ ވިޔަފާރިވެރިންނަށާއި މާލީ އިދާރާތަކަށް އެ ގައުމެއްގެ ފައިސާއިން ފައިސާ ބަލައިގަތުމުގެ ފުރުސަތު ލިބިގެންދާއިރު، މުޅި މުއާމަލާތް ނިމުމަކަށް އައުމުގެ މަރުހަލާ (ސެޓްލްމަންޓް ޕްރޮސެސް) އިތުރަށް ފަސޭހަވެގެންދާނެ ކަމަށް ބުނެފައިވެ އެވެ.

ޔޫޕީއައިގެ ޚިދުމަތް މިހާރުވެސް ސިންގަޕޫރު، ޔުނައިޓެޑް އަރަބް އެމިރޭޓްސް (ޔޫއޭއީ)، ނޭޕާލް، ބޫޓާން، މޮރިޝަސް، ފްރާންސް، ސްްރީލަންކާ، ކެމްބޯޑިއާ އަދި ގަތަރު ފަދަ ގައުމުތަކުގައި ދަނީ ބޭނުންކުރަމުންނެވެ. އެންޕީސީއައިގެ ސަބްސިޑިއަރީ ކުންފުންޏެއް ކަމަށްވާ އެންޕީސީއައި އިންޓަނޭޝަނަލް މެދުވެރިކޮށް، މި ޚިދުމަތް ޖަޕާން، ދިވެހިރާއްޖެ އަދި ގްރީސް ފަދަ ގައުމުތަކަށް ފުޅާކުރުމުގެ މަސައްކަތް ދަނީ ކުރަމުންނެވެ.

ތަފާސްހިސާބުތަކުން ދައްކާގޮތުގައި، 2026 ވަނަ މާލީ އަހަރުގައި ބައިނަލްއަގުވާމީ ޔޫޕީއައި މުއާމަލާތްތަކުގެ އަދަދު ފުރަތަމަ ފަހަރަށް އެއް މިލިއަނަށްވުރެ މައްޗަށް ވަނީ އަރާފަ އެވެ. 2025 ވަނަ އަހަރުގެ ޑިސެމްބަރު މަހުގެ ނިޔަލަށް، 2026 ވަނަ މާލީ އަހަރުގެ މުއާމަލާތްތަކުގެ އަދަދު ވަނީ 1.48 މިލިއަނަށް އިތުރުވެފައެވެ. މިއީ 2025 ވަނަ މާލީ އަހަރު ރެކޯޑުކުރެވުނު 0.75 މިލިއަން މުއާމަލާތާ އަޅާބަލާއިރު ގާތްގަނޑަކަށް ދެގުނަ އިތުރުވުމެކެވެ. ފައިސާގެ އަގަށް ބަލާއިރު، 2025 ވަނަ މާލީ އަހަރު 258.53 ކްރޯޑް ރުޕީސްގެ މުއާމަލާތް ކުރެވުނު ނަމަވެސް، 2026 ވަނަ މާލީ އަހަރު މި އަދަދު ވަނީ 330.43 ކްރޯޑް ރުޕީސްއަށް އަރާފައެވެ. މީގެ ބަދަލުގައި، 2024 ވަނަ މާލީ އަހަރު ރެކޯޑުކުރެވިފައިވަނީ އެންމެ 19.7 ކްރޯޑް ރުޕީސްގެ 37,060 މުއާމަލާތެވެ.