ހަސީނާގެ މައްޗަށް އިއްވާފައިވާ މަރުގެ ހުކުމަށް ގޮންޖައްސަވައި މިއަހަރު ބަންގްލަދޭޝަށް ވަޑައިގަންނަވަނީ!

ބަންގްލަދޭޝްގެ ވެރިކަމުން ދުރުކޮށްފައިވާ ކުރީގެ ބޮޑުވަޒީރު ޝައިޚް ހަސީނާ، އެކަމަނާގެ މައްޗަށް އިއްވާފައިވާ މަރުގެ ހުކުމަށް ގޮންޖައްސަވައި، މިއަހަރުގެ ތެރޭގައި އެނބުރި ގައުމަށް ވަޑައިގަންނަވާނެ ކަމަށް ވިދާޅުވެއްޖެ އެވެ.

އެކަމަނާގެ ޣައިރު ހާޒިރުގައި އިއްވާފައިވާ މި ހުކުމަކީ ޣައިރު ގާނޫނީ، ގާނޫނުއަސާސީއާ ޚިލާފު އަދި ސިޔާސީ މަގްސަދެއްގައި ނެރެފައިވާ ހުކުމެއްގެ ގޮތުގައި ވަނީ ސިފަކުރައްވާފަ އެވެ.

ދަރިވަރުން އިސްނަގައިގެން 2024 ވަނަ އަހަރުގެ އޮގަސްޓް މަހު ހިންގި ވަރުގަދަ މުޒާހަރާތަކާ ގުޅިގެން ވެރިކަން ވެއްޓުމުން އިންޑިއާއަށް ހިޖުރަކުރެއްވި އުމުރުން 78 އަހަރުގެ ހަސީނާ، އިންޑިއާގެ އެންޑީޓީވީއަށް ދެއްވި ބަސްދީގަތުމެއްގައި ވިދާޅުވީ، ކުރިމަތިވެދާނެ ނުރައްކަލަކަށް ބިރުފުޅުނުގަންނަ ކަމަށާއި، "ކޮންމެ ހުރަހަކާއި ކޮންމެ ރޭވުމެއް" ފަހަނައަޅައި އެނބުރި ގައުމަށް ވަޑައިގަންނަވާނެ ކަމަށެވެ.

މަރުގެ ހުކުމް އިއްވާފައި ވަނިކޮށް އެނބުރި ގައުމަށް ވަޑައިގަންނަވާނެތޯ ސުވާލުކުރުމުން ހަސީނާ ވިދާޅުވީ، "އަޅުގަނޑު ވަރަށް ސާފުކޮށް ބުނަން ބޭނުންވަނީ، ކޮންމެ ހުރަހަކާއި ކޮންމެ ރޭވުމެއް ފަހަނައަޅައި، މިއަހަރުގެ ތެރޭގައި އަޅުގަނޑު އެނބުރި ގައުމަށް ދާނަން،" ކަމަށެވެ. މިއީ އެކަމަނާ އެނބުރި ވަޑައިގަންނަވާނެ ވަގުތެއް ހާމަކުރެއްވި ފުރަތަމަ ފަހަރެވެ.

ނިމިދިޔަ ނޮވެމްބަރު މަހު ޑާކާގެ ކޯޓަކުން ހަސީނާގެ މައްޗަށް މަރުގެ ހުކުމް އިއްވީ، 2024 ވަނަ އަހަރުގެ ހަމަނުޖެހުންތަކުގެ ތެރޭގައި މީހުން މެރުމަށް ހިތްވަރުދީ، އެކަމަށް އަމުރުކޮށް، އަދި ހިންގަމުންދިޔަ ލާއިންސާނީ އަމަލުތައް ހުއްޓުވުމަށް ނުކުޅެދިފައިވާތީ އެކަމުގެ ކުށް ސާބިތުވުމާ ގުޅިގެންނެވެ.

މި ހުކުމް ގަބޫލުފުޅު ނުކުރައްވައި ހަސީނާ ތުހުމަތު ކުރެއްވި ގޮތުގައި، ބަންގްލަދޭޝްގެ ޝަރުއީ ނިޒާމު ބޭނުންކުރަމުންދަނީ އެކަމަނާގެ އަވާމީ ލީގު ޕާޓީގެ ލީޑަޝިޕް ނައްތާލުމަށް ހިންގާ "ސިޔާސީ ބަދަލުހިފުމުގެ ހަތިޔާރެއްގެ" ގޮތުގަ އެވެ.

"އަޅުގަނޑު މަރަށް ބިރެއް ނުގަނޭ،" އެކަމަނާ ވިދާޅުވި އެވެ. އަދި މީގެ ކުރިންވެސް އެކަމަނާގެ ޕާޓީ ރޫޅާލުމަށް ކުރި މަސައްކަތްތައް ނާކާމިޔާބުވެފައިވާ ފަދައިން، މިފަހަރުވެސް އެކަން ވާނީ ނާކާމިޔާބު ކަމަށް ވިދާޅުވި އެވެ.

ހަސީނާ ވިދާޅުވި ގޮތުގައި އެނބުރި ވަޑައިގަތުމުގެ މަގްސަދަކީ އަމިއްލަ އެދުމެއް އޮވެގެން ކުރައްވާ ކަމެއް ނޫނެވެ. ނަމަވެސް އެއީ ސިޔާސީ ހައްގުތަކާއި، މުޖުތަމައުގެ އަދުލުވެރިކަމާއި، ގާނޫނީ އިމުގެ ތެރެއަށް ގައުމު ރުޖޫއަކޮށް، 1971 ވަނަ އަހަރުގެ މިނިވަންކަމުގެ ހަނގުރާމައިގެ ރޫހު އާލާކުރުމަށް ކުރައްވާ މަތިވެރި މަސައްކަތެކެވެ.

އަވާމީ ލީގުގެ ދިފާއުގައި ވާހަކަދައްކަވަމުން ހަސީނާ ވިދާޅުވީ، އެ ޕާޓީގެ ހަރަކާތްތައް މަނާކޮށްފައި އޮތް ނަމަވެސް، އެއީ ބަންގްލަދޭޝްގެ ރައްޔިތުންގެ މެދުގައި ފުންކޮށް މޫލާފައިވާ ޕާޓީއެއް ކަމަށެވެ. އެ ޕާޓީގެ ހަރަކާތްތައް މަނާކުރީ ކުރީގެ ވަގުތީ ސަރުކާރުން ކަމަށްވީ ނަމަވެސް، ފެބްރުއަރީ މަހުގެ އިންތިޚާބަށްފަހު ވެރިކަމާ ހަވާލުވި ބޮޑުވަޒީރު ތާރިގް ރަހްމާންގެ ސަރުކާރުންވެސް އެ ނިންމުން ވަނީ ދަމަހައްޓާފަ އެވެ.

"އަވާމީ ލީގަކީ ހަމައެކަނި ކަރުދާހުގައި އޮތް ޖަމިއްޔާއެއް ނޫން. އެއީ ބެންގާލީގެ ފަސްގަނޑާއި، ރައްޔިތުންނާއި، ތާރީޚާއި އަދި ބެންގާލީންގެ އައިޑެންޓިޓީއާ ގުޅިފައިވާ ސިޔާސީ ބާރެއް،" ހަސީނާ ވިދާޅުވި އެވެ.

މީގެ އިތުރުން، ތާރިގް ރަހްމާންގެ ސަރުކާރަށް އަމާޒު ކުރައްވާ ހަސީނާ ވިދާޅުވީ، އަވާމީ ލީގަށް އޮތް ހުރަސްތައް ނައްތާލައި، ޕާޓީގެ ލީޑަރުންގެ މައްޗަށް އުފުލާފައިވާ "ދޮގު ދައުވާތައް" އަނބުރާ ގެންދިއުމަށެވެ. އަދި ސިޔާސީ ކުށްވެރިން މިނިވަންކޮށް، ސުލްހަވެރި ސިޔާސީ ހަރަކާތްތަކަށް ފުރުސަތު ދީ، ޑިމޮކްރެޓިކް މާހައުލެއް ގާއިމުކުރުމަށްވެސް އެކަމަނާ ގޮވާލެއްވި އެވެ.

ނަމަވެސް ސަރުކާރުން މި ގާނޫނީ ފިޔަވަޅުތަކުގެ ދިފާއުގައި ބުނަމުންދަނީ، މިއީ ހަސީނާގެ ވެރިކަމުގެ ފަހު ދުވަސްތަކުގައި ހިންގާފައިވާ ކަމަށް ތުހުމަތުކުރެވޭ ޖަރީމާތަކަށް ޒިންމާދާރުކުރުވުމުގެ ގޮތުން ކުރިއަށްގެންދާ މަސައްކަތްތަކެއް ކަމަށެވެ.