އެމެރިކާއިން ދެމުންދާ ހަމަލާތަކަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އީރާނުން ދީފި
8 ޖުލައި 2026 | ބުދަ 21:38އެމެރިކާއިން އީރާނުގެ މުހިންމު ބަނދަރު ސިޓީތަކަށާއި ރަށްތަކަށް ދެމުންދާ ހަމަލާތައް އިތުރަށް ފުޅާކޮށްފައިވާތީ، އެކަމަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އީރާނުން ދީފި. މި ހަމަލާތަކުގައި ކީޝް އައިލެންޑާއި ޗަބަހާރު ފަދަ އިސްތިރާތީޖީ ސަރަހައްދުތަކަށް އަމާޒުވެފައިވާއިރު، މިއީ ބައިނަލްއަގުވާމީ އެއްބަސްވުންތަކާ ޚިލާފު އަމަލެއް ކަމަށް އީރާނުގެ އޮފިޝަލުން ވިދާޅުވޭ. އީރާނުގެ އަސްކަރިއްޔާއިން ބުނެފައިވަނީ ގައުމީ ސަލާމަތް ރައްކާތެރިކުރުމަށްޓަކައި އެމެރިކާގެ މި އަމަލުތަކަށް ހިތި ނަތީޖާއަކާ ކުރިމަތިލާން ޖެހޭނެ ކަމަށް.
އީރާނުގެ ހުރްމޮޒްގާން ޕްރޮވިންސްގެ ކުހެސްތަކަށް ބުދަ ދުވަހުގެ ފަތިހުގެ ވަގުތެއްގައި އެމެރިކާއިން ދިން ވަރުގަދަ ހަމަލާތަކާ ގުޅިގެން، ސްޓްރެއިޓް އޮފް ހުރްމުޒް ކައިރީގައި އޮންނަ ބަނދަރަކުން ދުން އަރަމުންދަނީ. | ރޮއިޓާސް
އެމެރިކާއިން ދެމުންދާ ހަމަލާތަކަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އީރާނުން ދީފިއެވެ. މިއީ އީރާނުގެ ދެކުނުގެ ބައެއް ބަނދަރު ސިޓީތަކާއި ރަށްތަކަށް އެމެރިކާއިން ވައިގެ މަގުން ހަމަލާދެމުންދާ ކަމަށް އެ ގައުމުގެ އޮފިޝަލުން ހާމަކުރި ދެވަނަ ރޭ ކަމަށްވާއިރު، މަސްރަހު މިހާރު ވަނީ ވަރަށް ބޮޑަށް ހޫނުވެފަ އެވެ.
އީރާނުގެ ކީޝް އާއި، ބަންދަރު އައްބާސް އާއި، ބުޝެހްރު ޕްރޮވިންސްގެ އިތުރުން މުހިންމު ބަނދަރު ސިޓީއެއް ކަމަށްވާ ސިރިކްގައި ރޭގެ ވަގުތެއްގައި ގޮވުންތަކެއް ގޮވާފައިވާ ކަމަށް ރިޕޯޓްކޮށްފައިވެ އެވެ. އަދި ބުދަ ދުވަހުގެ ރޭ ވެސް އެފަދަ ރިޕޯޓްތައް ލިބެމުންދާއިރު، ހަމަލާތައް އަމާޒުވާ ސަރަހައްދުތައް ކުރިއަށްވުރެ ފުޅާވެފައިވާ ކަމަށް ބެލެވެ އެވެ.
ހުރްމުޒް ކައިރީގައި އޮންނަ އީރާނުގެ އެންމެ ބޮޑު ރަށް ކަމަށްވާ ކީޝް އައިލެންޑްގައި ގޮވުންތަކެއް ގޮވާފައިވާ ކަމަށް ރިޕޯޓްކޮށްފައިވާއިރު، އެ ރަށުގެ އެއާ ޑިފެންސް ސިސްޓަމްތައް ވަނީ ހަރަކާތްތެރިވާން ފަށާފަ އެވެ. ނަމަވެސް ހަމަލާ އަމާޒުވީ ސީދާ ކޮން ތަންތަނަކަށް ކަން އަދި ކަށަވަރުވެފައެއް ނުވެ އެވެ. ކީޝް އައިލެންޑަކީ އެ ސަރަހައްދުގެ ކަނޑުގެ މަގުތަކުގެ ކޮންޓްރޯލާއި ބާރު ދެމެހެއްޓުމުގައި ތެހެރާނުން ވަރަށް ބޮޑު އިސްކަމެއްދޭ މުހިންމު ރަށެކެވެ.
މީގެ އިތުރުން އީރާނުގެ އިރުދެކުނުގައި އޮންނަ މުހިންމު ބަނދަރެއް ކަމަށްވާ ޗަބަހާރުންވެސް ގޮވުންތަކުގެ އަޑު އިވި، ކަރަންޓުގެ ޚިދުމަތް މެދުކެނޑިފައިވާ ކަމަށް ރިޕޯޓްތައް ބުނެ އެވެ. ރޭގެ ހަމަލާތަކުގައި ޗަބަހާރަށް އަމާޒުވި ކަމުގެ ރިޕޯޓެއް ލިބިފައި ނުވި ނަމަވެސް، މިރޭ އެ ސަރަހައްދަށް ވަނީ ހަމަލާތައް އަމާޒުވެފަ އެވެ.
އެމެރިކާގެ އުދުވާނާ ގުޅިގެން ޚާރިޖީ ގޮތުންނާއި އަސްކަރީ ގޮތުން އީރާނުން ވަނީ ވަރުގަދަ އިންޒާރުތަކެއް ދީފަ އެވެ. އެގޮތުން ގައުމީ ސަލާމަތް ރައްކާތެރިކުރުމަށް ތެހެރާނުން ހަރުދަނާ ފިޔަވަޅުތަކެއް އަޅާނެ ކަމަށް ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވިދާޅުވި އެވެ. އަދި އެމެރިކާގެ މި ހަމަލާތަކަކީ ދެ ގައުމުގެ ދެމެދުގައި ވެފައިވާ ފަހުމުނާމާ (އެމްއޯޔޫ) އާ ޚިލާފު އަމަލެއްގެ ގޮތުގައި އީރާނުގެ އޮފިޝަލުން ސިފަކުރައްވަ އެވެ.
އީރާނުގެ ޚާތަމް އަލް-އަންބިޔާ ޖޮއިންޓް މިލިޓަރީ ހެޑްކުއާޓާސްއިން ވަނީ މި ހަމަލާތަކުގެ ނަތީޖާ ހިތިވާނެ ކަމުގެ އިންޒާރު ދީފަ އެވެ. އަދި އެމެރިކާއިން ދިން މި ހަމަލާތަކަށް އީރާނުގެ ހަތިޔާރު އެޅި ސިފައިން ވަރަށް ވަރުގަދަ ރައްދު ހަމަލާއެއް (ކްރަޝިންގ ރެސްޕޮންސް) ދޭނެ ކަމަށްވެސް އެ އިދާރާއިން ބުނެފައިވެ އެވެ.
