ގަލްފް ސަރަހައްދުގައި 6،000 ކަނޑުދަތުރުވެރިން ތާށިވެފައި އެބަތިބި: އައިއެމްއޯ
8 ޖުލައި 2026 | ބުދަ 10:55ހުރްމުޒް ކަނޑުއޮޅިން ދަތުރުކުރާ އުޅަނދުތަކަށް ދޭ ހަމަލާތަކުގެ ސަބަބުން ކަނޑުދަތުރުވެރިންގެ ފުރާނައަށް ބޮޑު ނުރައްކަލެއް ކުރިމަތިވެފައިވާ ކަމަށް އައި.އެމް.އޯ އިން ވަނީ ހާމަކޮށްފައި. ގަލްފް ސަރަހައްދުގައި 6،000 އެއްހާ ކަނޑުދަތުރުވެރިން ތާށިވެފައި ތިބިކަން ފާހަގަކުރައްވައި، މަސްލަހަތު ގޯސްވިޔަނުދިނުމަށްޓަކައި ހުރިހާ ފަރާތްތަކަކުންވެސް ކެތްތެރިކަން އިސްކުރުމަށް އެ ޖަމިއްޔާގެ ސެކްރެޓަރީ ޖެނެރަލް ވަނީ ގޮވާލައްވާފައި.
އީރާނުގެ އަސްކަރިއްޔާއިން ބަންދުކޮށްފައިވާ ހުރްމުޒް ކަނޑުއޮޅިން ދަތުރުކުރަން އުޅުމުގެ ތެރޭގައި، ނުބައި މަގަކުން ދެވުމުގެ ސަބަބުން ދެކުނު ކޮރެއާގެ ކޮންޓޭނަރު އުފުލާ ބޯޓެއް ފަރަށް އަރާފައިވާ މަންޒަރު. | ގެޓީ އިމޭޖަސް
ހުރްމުޒް ކަނޑުއޮޅިން ދަތުރުކުރަމުންދިޔަ ބައެއް އުޅަނދުފަހަރަށް ފާއިތުވި ދެ ދުވަހު ދިން ހަމަލާތައް، އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) ގެ ސެކްރެޓަރީ ޖެނެރަލް އާސެނިއޯ ޑޮމިންގޭޒް ބުދަ ދުވަހު ކުށްވެރިކުރައްވައިފި އެވެ.
އޭނާ މި ހަމަލާތައް ކުށްވެރިކުރައްވާފައި މިވަނީ، އީރާނާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުން ނިމުމަކަށް އައިސްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާނުކުރެއްވުމާ ގުޅިގެން ނެރުއްވި ބަޔާނެއްގަ އެވެ.
އައިއެމްއޯގެ ސެކްރެޓަރީ ޖެނެރަލް ވިދާޅުވީ، މި ނުރައްކާތެރި ހަމަލާތަކުގެ ސަބަބުން އެއްވެސް ކުށެއް ނެތް ކަނޑުދަތުރުވެރިން އަނެއްކާވެސް ބޮޑު ނުރައްކަލެއްގެ ތެރެއަށް ހުށަހެޅިފައިވާ ކަމަށެވެ.
މީގެ އިތުރުން، ގަލްފް ސަރަހައްދުގައި ގާތްގަނޑަކަށް 6،000 ކަނޑުދަތުރުވެރިން ތާށިވެފައި އެބަތިބި ކަމަށް ފާހަގަކުރައްވައި، މަސްލަހަތު އިތުރަށް ގޯސްވިޔަނުދީ، ހުރިހާ ފަރާތްތަކަކުންވެސް އެންމެ މަތީ ދަރަޖައަށް ކެތްތެރިކަން އިސްކުރުމަށް ޑޮމިންގޭޒް ވަނީ ގޮވާލައްވާފަ އެވެ.
