ރައީސް މުއިއްޒުގެ ސަރުކާރަކީ މަދިރި އަކަށްވުރެ ބަލި ސަރުކާރެއް: މެންބަރު ސަމީރު
ވަޒީރުން މަޖިލީހަށް ހާޒިރުކުރި ނަމަވެސް ސުވާލުތަކަށް ޖަވާބު ނުދެއްވާތީއާއި، ރަށްރަށުގެ ތަރައްގީގެ މަޝްރޫއުތައް ހުއްޓިފައިވާތީ ތޮއްޑޫ ދާއިރާގެ މެންބަރު ހުސެއިން ސަމީރު ވަނީ ކަންބޮޑުވުން ފާޅުކުރައްވާފައި. ސަރުކާރުގެ ކުންފުނިތަކުން ނާޖާއިޒު ފައިދާ ނަގަމުންދާ ކަމަށް ތުހުމަތުކުރައްވައި، މަޖިލީހުގެ މެޖޯރިޓީ ބޭނުންކޮށްގެން ސަރުކާރު ޖަވާބުދާރީ ކުރުވުމަށް ހުރަސްއަޅަމުންދާކަމަށް ވެސް އޭނާ ވިދާޅުވި.
ބުދަ ދުވަހު އެމްޑީޕީގެ ޕާލިމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަ ދައްކަވަނީ. | ރާއްޖެއެމްވީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ މަދިރި އަކަށްވުރެ ބަލި ސަރުކާރެއް ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެ އެވެ.
ބުދަ ދުވަހު އެމްޑީޕީގެ ޕާލިމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި މެންބަރު ސަމީރު ވަނީ މިސަރުކާރުގެ ވަޒީރުން މަޖިލީހަށް ހާޒިރު ކުރި ނަމަވެސް ސުވާލަށް ޖަވާބު ނުދެއްވާތީ އެކަމުގެ ކަންބޮޑުވުންފާޅު ކުރައްވާފަ އެވެ. އަދި ވިދާޅުވީ މިއީ ވަރަށް މަގުބޫލުކަން ކުޑަ ސަރުކާރެއް ކަމަށާއި، ވަޒީރުން އަމަލުކުރާ ގޮތުން ވެސް އިތުރަށް މަގުބޫލުކަން ކުޑަވަމުންދާ ކަމަށެވެ.
މެންބަރު ސަމީރު ވިދާޅުވީ ރަށްރަށުގައި ހޮސްޕިޓަލް ތަރައްގީ ކުރުމަށް ވަޅުތައް ކޮނެފައިވާ ކަމަށާއި، އެވަޅުތަކުގައި މަދިރި އާލާވާމުންދާ ކަމަށެވެ. ނަމަވެސް މިކަން ވެސް ހެލްތް މިނިސްޓްރީން ސިއްރު ކުރުމަށް މަސައްކަތް ކުރާ ކަމަށް އޭނާ ވިދާޅުވި އެވެ. އަދި ވިދާޅުވީ މިއީ މަދިރިއަކަށްވުރެ ބަލި ސަރުކާރެއް ކަމަށާއި، މަޖިލީހުގެ ތެރެއިން އެ މަންޒަރު ފެންނަމުންދާ ކަމަށެވެ.
ހެލްތު މިނިސްޓަރު މި މަޖިލީހަށް ވަޑައިގެން ކުރެވޭ ސުވާލެއްގައި އަޅުގަނޑު ދެންނެވީ. އަޅުގަނޑުގެ ދާއިރާގެ ރަށެއްގައި އެ ބޭފުޅުން ހޮސްޕިޓަލް އަޅަންވެގެން ލޯކަލް ކައުންސިލުން އިންތިޚާބުގައި ވަޅުތަކެއް ކޮނެފައި އޭގައި މަދިރިފަނައަޅައިގެން އެ ރަށުގައި ޑެންގޫ ފެތުރެމުންދާ ވާހަކަ. ހަފުތާއެއް ވީއިރުގައި އެ ބޭފުޅުން އެތައް ސައިޓެއްގައި ތަކެތި އެއްކޮށްފައި ހުއްޓާ ، އެ މަސައްކަތްކުރުމުގެ ބަދަލުގައި ވަޅުތައް ފޮރުވާލީ. އަނެއްކާވެސް ކޮންމެވެސް ބަޔަކަށް އަނެއް ކޮރަޕްޝަނުގެ ބޮޑު ނާޖާއިޒު ފައިދާ ދިނުމުގެ ގޮތުން އަނެއްކާ އެ ވަޅުތައް ކޮށްނަން ހަވާލުކުރަންވީ. ދެން އެކަން ކުރައްވާފައި އަޅުގަނޑު ދެންނެވިން މިއަދު މަޖިލީހުގައި ހަގީގަތުގައި މަދިރިއަކަށްވުރެ ބަލި ސަރުކާރެކޭ.ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
އެސްއޯއީތަކާއި، މިނިސްޓްރީތަކަށް އިޝާރާތް ކުރައްވައި މެންބަރު ސަމީރު ވިދާޅުވީ މަޝްރޫއުތައް އިސްކަން ދިނުމުގެ ބަދަލުގައި ބޮޑަށް މަސައްކަތް ކުރަނީ ޕީއެންސީ އާއި ސަރުކާރު ޕްރޮމޯޓް ކުރުމަށް ކަމަށެވެ. އަދި އެސްއޯއީތަކުން ވަރަށް ބޮޑަށް ނާޖާއިޒު ފައިދާ ކަމަށާއި، އެކަން އެންމެފަހުން ބޭއްވިގެން ދިޔަ ލޯކަލް ކައުންސިލް އިންތިޚާބުން ވެސް ފެނިގެން ދިޔަ ކަަމަށެވެ.
ނަމަވެސް ރައްޔިތުންގެ މަޖިލީހުގައި ޕީއެންސީގެ މެޖޯރިޓީ އޮތުމުން އެސްއޯއީތަކުގެ ބޭފުޅުން ހާޒިރުކޮށް، ޖަވާބުދާރީ ނުކުރެވޭ ކަމަށް މެންބަރު ސަމީރު ވިދާޅުވި އެވެ.
