ދައުލަތުގެ ޢާންމު މަންފާއަށް ޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫޢުތައް ކަނޑައެޅުމުގެ ޤަރާރު ރައީސުލްޖުމްހޫރިއްޔާ އެކަށައަޅުއްވައިފި
22 ޖޫން 2026 | ހޯމަ 12:05މި މަޝްރޫޢުތަކުގެ ތެރޭގައި ފަތުރުވެރިކަމާއި، ގެދޮރުވެރިކަމާއި، ދިފާޢީ ސަލާމަތުގެ އިތުރުން ތިމާވެއްޓާ ގުޅުންހުރި ދާއިރާތައް ހިމެނޭ. ސަރުކާރުން ގެޒެޓްކުރި މި ޤަރާރުގައި މަޝްރޫޢުތައް ހަވާލުކުރެވޭ ފަރާތްތަކުން އިންވެސްޓްކުރަންޖެހޭ އެންމެ މަދު މިންވަރުތައް ބަޔާންކޮށްފައިވީ ނަމަވެސް، އެ އަދަދުތަކުގެ ތަފްސީލެއް ހާމަކޮށްފައެއް ނުވޭ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ މަސައްކަތް ހިނގަމުންދާގޮތް ބައްލަވާލެއްވުން | ރައީސް އޮފީސް
ދައުލަތުގެ ޢާންމު މަންފާއަށް ޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫޢުތައް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވައި، ރައީސުލްޖުމްހޫރިއްޔާގެ ޤަރާރު ނަންބަރު 2026/11 ހޯމަ ދުވަހު ދިވެހިސަރުކާރުގެ ގެޒެޓުގައި ޝާއިޢުކޮށްފިއެވެ.
ރައީސުލްޖުމްހޫރިއްޔާގެ މި ޤަރާރަކީ، ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ނުވަތަ އިޖުތިމާޢީ ސިޔާސަތެއްގެ ދަށުން ނޫންނަމަ ސަރުކާރުން ކަނޑައަޅާ އެ ނޫން ވެސް މުހިންމު ސިޔާސަތެއްގެ ދަށުން ހިންގުމަށް ސަރުކާރުން ކަނޑައަޅާ މުހިންމު މަޝްރޫޢުތަކާއި، އެ މަޝްރޫޢު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދުތައް ކޮންމެ އަހަރަކު ދިވެހިސަރުކާރުގެ ގެޒެޓުގައި ޝާއިޢުކުރަންވާނެކަމަށް ޤާނޫނު ނަންބަރު 99/2 (ދިވެހިރާއްޖޭގެ ޓޫރިޒަމާބެހޭ ޤާނޫނު) ގެ 5 ވަނަ މާއްދާގެ (މ) ގެ (3) ވަނަ ނަންބަރުގައި ބަޔާންކޮށްފައިވާތީ، އެ ޤާނޫނުގެ ދަށުން ޝާއިޢުކޮށްފައިވާ ޤަރާރެއް ކަމަށް ރައީސް އޮފީހުން ބުނެއެވެ.
މި ޤަރާރުގެ ޖަދުވަލުގައި، އިސްވެ ބަޔާންކޮށްފައިވާ ސިޔާސަތުތަކުގެ ދަށުން ހިންގުމަށް ސަރުކާރުން ކަނޑައަޅުއްވާފައިވާ މަޝްރޫޢުތަކާއި، އެ މަޝްރޫޢު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދުތައް ވަނީ ބަޔާންކޮށްފަ އެވެ.
ރައީސް އޮފީހުން ގެޒެޓް ކުރި ގަރާރުގައި 19 މަޝްރޫއެއް ހިމެނިފައިވެއެވެ. ފަތުރުވެރިކަމާއި ޓްރާންސްޕޯޓާއި ބެހޭ 5 މަޝްރޫއަކާއި، ދާޚިލީ ސަލާމަތާއި ދިފާއީ ރައްކައުތެރިކަމާއި ފަންނިޔާތާ ބެހޭ 5 މަޝްރޫއަކާއި، ގެދޮރުވެރިކަމާ އުމުރާނީ ތަރައްގީ އާ ބެހޭ 4 މަޝްރޫއަކާއި، ޒުވާނުންނާއި ކުޅިވަރާ ބެހޭ މަޝްރޫއަކާއި، ކްލައިމެޓް ޗޭންޖް، ތިމާވެށި އަދި ހަކަތަ އާ ގުޅޭ 4 މަޝްރޫއެއް ހިމެނެއެވެ. މަޝްރޫއުތައް ކަނޑައެޅި ގޮތުގެ ތަފްސީލެއް ހާމަކޮށްފައި ނުވާއިރު، މަޝްރޫއުތަކަށް ޚަރަދުކުރަން ޖެހޭ އެންމެ ދަށް މިންވަރުކަމަށް ބުނެ ޝާއިއު ކޮށްފައިވާ އަދަދުތަކުގެ ތަފްސީލެއްވެސް ހާމަކޮށްފައެއް ނުވެއެވެ.
މަސްދަރު: ރައީސް އޮފީސް
