ދައުރު ދެބައިވެގެން ދިޔައިރު، ސަރުކާރަށް ކުރެވުނު ވަރަކީ ހަނިމާދޫ މިސްކިތުގެ ޝީޓު އަޅާލުން: ކައުންސިލް

އެމްޑީޕީގެ ސަރުކާރުން ހދ. ހަނިމާދޫ ގައި އިމާރާތްކުރަން ފެށި 500 މީހުންގެ ޖާގައިގެ މިސްކިތުގެ މަސައްކަތް، މި ސަރުކާރު ވެރިކަމާ ހަވާލުވިފަހުން މަޑުޖެހި، މިހާތަނަށް ކުރެވުނު ހަމައެކަނި ކަމަކީ ޝީޓެއް އަޅާލުން ކަމަށް ބުނެ ހަނިމާދޫ ކައުންސިލުން ކަންބޮޑުވުން ފާޅުކޮށްފި އެވެ.

މިކަމާ ގުޅޭގޮތުން "ރާއްޖެ ޓީވީ" އަށް މައުލޫމާތު ދެއްވަމުން ހަނިމާދޫ ކައުންސިލް މެންބަރު ރިފްގާ މުނާ ވިދާޅުވީ، މި މިސްކިތަކީ ނިމިދިޔަ އެމްޑީޕީގެ ސަރުކާރުން ފެށި މަސައްކަތެއް ކަމަށެވެ. އަދި ސަރުކާރު ބަދަލުވިއިރު މިސްކިތުގެ ތަނބުތައް ޖަހައި މަސައްކަތް ބާރަށް ކުރިއަށްދިޔަ ނަމަވެސް، ރައީސް ޑރ. މުހައްމަދު މުއިއްޒުގެ ސަރުކާރުގައި މިހާތަނަށް ކުރެވުނު ހަމައެކަނި ކަމަކީ މިސްކިތުގެ ޝީޓު އެޅުން ކަމަށް އޭނާ ފާހަގަކުރެއްވި އެވެ.

ހދ. ހަނިމާދޫ ކައުންސިލް މެމްބަރ ރިފްގާ މުނާ، ރާއްޖެ ޓީވީ އަށް މައުލޫމަތު ދެއްވަނީ. | ރާއްޖެ އެމްވީ

ރިފްގާ ވިދާޅުވި ގޮތުގައި، އެމްޓީސީސީން މިހާރު މި މަސައްކަތް ސަބްކޮންޓްރެކްޓަށް އެ ރަށު ކުންފުންޏަކާ ހަވާލުކޮށްފައިވީ ނަމަވެސް، އަމަލީ ގޮތުން މަސައްކަތް ކުރިއަށްދާތަނެއް ނުފެނެ އެވެ.

އެމްޓީސީސީ އިން މިހާރު ސަބްކޮންޓްރެކްޓަށް މިރަށު ކުންފުންޏަކަށް ދީގެން، ކޮންމެ ދުވަހަކުވެސް މިތާ މުވައްޒަފުން އުޅޭތަން ފެނޭ، އެކަމަކު މަސައްކަތް ކުރިއަށްދާތަނެއް ނުފެނޭ.

ހދ. ހަނިމާދޫ ކައުންސިލްގެ މެންބަރު ރިފްގާ މުނާ

މިސްކިތް އިމާރާތްކުރާ ސަރަހައްދަކީ ގިނަ އަދަދެއްގެ ގޯތި ދޫކޮށްފައިވާ، މީހުން އާބާދުވަމުން އަންނަ ސަރަހައްދަކަށް ވާތީ، އެ ސަރަހައްދަށް މިސްކިތެއްގެ މުހިންމުކަން އިންތިހާއަށް ބޮޑުކަން ކައުންސިލުން ފާހަގަކުރެ އެވެ. ނަމަވެސް، ސަރުކާރަށް ދެ އަހަރަށްވުރެ ގިނަ ދުވަސްވެ، 3 އަހަރުވާން ގާތްވިއިރުވެސް މަސައްކަތް ނުނިމި އޮތުމަކީ ސަރުކާރުން ދީނީ ކަންކަމަށް ދޭ އަހައްމިއްޔަތާމެދު ސުވާލު އުފެދޭ ކަމެއް ކަމަށް ރިފްގާ ވިދާޅުވި އެވެ.

މި ސަރުކާރަށް ގާތްގަނޑަކަށް 3 އަހަރުވާން ކައިރިވާއިރު ހަމައެކަނި ޝީޓް އެކަނި އެޅިފަ މިވަނީ. ދެން އިތުރު އެއްވެސް މަސައްކަތެއް އޭގެފަހުން ނުހިނގޭ. ކުރިޔަށް ދާތަނެއް ނުފެނޭ. މީކީ އިނގޭތޯ ޑޮކްޓަރ މުޙައްމަދު މުއިއްޒުގެ ދީނީ ކަންތައްތަކަށް ހުންނަ އަހައްމިއްޔަތު ކަމަކީ.

ހދ. ހަނިމާދޫ ކައުންސިލްގެ މެންބަރު ރިފްގާ މުނާ

މި މަސައްކަތުގެ އަޕްޑޭޓެއް ހޯދުމަށް ކައުންސިލުން ކަމާބެހޭ އިދާރާތަކުގައި ތަކުރާރުކޮށް އެދިފައިވާ ކަމަށާއި، ކަންބޮޑުވުންތައް ހިއްސާކޮށްފައިވީ ނަމަވެސް މިހާތަނަށް އެދެވޭ ހައްލެއް ލިބިފައިނުވާ ކަމަށް ކައުންސިލުން ބުނެ އެވެ. ރައީސް މުއިއްޒުގެ ސަރުކާރުން ދީނީ ކަންކަމަށް އިސްކަންދޭނެ ކަމަށް ބުނަމުންދާއިރު، ރަށްރަށުގައި ފަށާފައިވާ މިފަދަ މުހިންމު މަޝްރޫއުތައް ހުއްޓިފައި އޮތުމަކީ ހަނިމާދޫ ރައްޔިތުންގެ ބޮޑު ޝަކުވާއެކެވެ.