ވަގުތު ބޭކާރު ކުރެވޭކަށް ނެތް، މޮރޮކޯ އިން ބޭނުން ވަނީ ވޯލްޑް ކަޕްގެ ތަށި: އުއާބީ

ފީފާ ވޯލްޑް ކަޕްގެ ކުއާޓާ ފައިނަލްގައި ފްރާންސްއާ ދެކޮޅަށް ނިކުންނައިރު ވަގުތު ބޭކާރު ކުރެވެން ނެތް ކަމަށާއި، މޮރޮކޯ އިން ބޭނުން ވަނީ މުބާރާތުގެ ތަށި ކަމަށް އެ ޓީމުގެ ކޯޗު މުޙައްމަދު އުއާބީ ބުނެފި އެވެ. 

އުއާބީ މިހެން ބުނެފައި ވަނީ ފްރާންސްއާ ދެކޮޅަށް މޮރޮކޯ އިން ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެގޮތުން އޭނާ ބުނީ ނަސީބުގެ ވާހަކަ ދެއްކުމާއި، ބޭކާރު ކަންކަމުގައި ވަގުތު ހޭދަ ކުރެވެން ނެތް ކަމަށެވެ. 

މީގެ އިތުރުން އޭނާ ބުނީ މޮރޮކޯގެ ޓީމާއި، ކުޅުންތެރިން ވަޒަން ކުރުމަކީ މުބާރާތް ނިމުމުން ކުރާނެ ކަމެއް ކަމަށެވެ. މިހާތަނަށް މޮރޮކޯ އަށް ކުރެވުނު މަސައްކަތް ރަނގަޅު ކަމަށާއި، މީހުން ދައްކާ ވާހަކަ އަޑު އަހަން ނުޖެހޭ ކަމަށް އޭނާ ބުންޏެވެ. 

މެޗަށް ނިކުންނައިރު ފްރާންސް އަކީ ފޭވަރިޓުން ކަމަަށާއި، މުބާރާތާ ކުރިމަތިލީއިރު ވެސް ފްރާންސް އަކީ ފޭވަރިޓުންގެ ތެރޭގައި އޮތް ޓީމެއް ކަމަށް އޭނާ ބުންޏެވެ. އެހެން ނަމަވެސް، ކުއާޓާ ފައިނަލް އިން މޮޅުވެ، ސެމީ ފައިނަލް އަށް ދިޔުމަށް ކުރެވެން ހުރި ހުރިހާ ކަމެއް މޮރޮކޯ އިން ކުރާނެ ކަމަށް އޭނާ ބުންޏެވެ. 

މުބާރާތުގައި މިހާތަނަށް މޮރޮކޯގެ ދަތުރު ރަނގަޅު ކަމަށާއި، ނަމަވެސް ކުރިއަށް އޮތީ "ބޯނަސް"ގެ ގޮތުގައި ދެކިގެން ތިބެވެން ނެތް ކަމަށް އޭނާ ބުންޏެވެ. މޮރޮކޯ އަށް ބޯނަސް އަކީ ވޯލްޑް ކަޕް ކާމިޔާބު ކުރުން ކަމަށާއި، މުބާރާތުގައި ކުރިއަށް ދަނީ އެ ވިސްނުމުގައި ކަމަށް އޭނާ ވަނީ ބުނެފައި އެވެ. 

ހަތަރު އަހަރަށް ފަހު އަނެއްކާ ވެސް މޮރޮކޯ އިން ފްރާންސްއާ ދެކޮޅަށް ނިކުންނައިރު، އުއާބީ ބުނީ، ދެ ޓީމުގައި ވެސް ތަފާތު ކަންތައް ތަކެއް ހުރި ކަމަށާއި، ދެ ޓީމުގެ ކުޅުންތެރިން ވެސް ކުރިއެރުން ތަކެއް ހޯދާފައިވާ ކަމަށެވެ. މެޗަށް ފަހު ހިތާމަ ކުރަން ބޭނުން ނުވާ ކަމަށާއި، ކުއާޓާ ފައިނަލްގައި ކުޅެން ޖެހެނީ 2000 އިންސައްތަ މަސައްކަތް ދައްކައިގެން ކަމަށް އޭނާ ބުންޏެވެ. 

މޮރޮކޯ އިން ވަނީ ގުރޫޕު ސްޓޭޖުގައި ކުޅުނު ތިން މެޗުގެ ތެރެއިން، ދެ މެޗުން މޮޅުވެފައި އެވެ. އެއް މެޗުން ވަނީ އެއްވަރުވެފައި އެވެ. މުބާރާތުގެ ގަދަ 32 ގައި މޮރޮކޯ އިން ވަނީ ޕެނަލްޓީ ޖަހައިގެން ނެދަލެންޑްސް ބަލިކޮށްފައި އެވެ. އަދި ގަދަ 16 ގައި ވަނީ މުބާރާތް ބާއްވާ އެއް ޤައުމު ކަމަށްވާ ކެނެޑާ ބަލިކޮށްފައި އެވެ.