ކަނޑު ދަތުރުގެ ޙަރަކާތްތައް ކުރިއަށް ގެންދިޔުމުގެ ހުއްދަ ޤަތަރުން ދީފި

ޤަތަރުގެ ކަނޑުގެ ސަރަހައްދުގައި މެދު ކަނޑާލާފައިވާ ހުރިހާ ހަރަކާތް ތަކެއް އަލުން ފެށުމަށް އެ ޤައުމުގެ ސަރުކާރުން ނިންމައިފި އެވެ.

ޤަތަރުގެ ޓްރާންސްޕޯޓް މިނިސްޓްރީ އިން އެކްސްގައި އާންމުކުރި ބަޔާނެއްގައި ބުނެފައި ވަނީ، އާދީއްތަ ދުވަހުން ފެށިގެން ކަނޑު ދަތުރު ފަތުރުގެ ހުރިހާ ހަރަކާތް ތަކެއް އަލުން ފެށުމަށް ހުއްދަ ދީފައިވާ ކަމަށެވެ. މިއީ މިދިޔަ ޖޫން މަހުގެ 29 ވަނަ ދުވަހުން ފެށިގެން، ވަކި ގޮތެއް އަންގަންދެން މަސްވެރި އުޅަނދު ފަހަރާއި، އާންމު ދަތުރު ފަތުރު ކުރާ ބޯޓު ފަހަރު ދަތުރު ކުރުން މަނާކޮށް ނެރުނު އެންގުން ބާތިލުކޮށް ނިންމި ނިންމުމެކެވެ.

ނަމަވެސް، އެ މުއްދަތުގެ ތެރޭގައި ވެސް ވިޔަފާރި މުދާ އުފުލާ ބޮޑެތި އުޅަނދު ފަހަރަށް ދަތުރު ކުރުމުގެ ހުއްދަ އޮތެވެ.

މިނިސްޓްރީގެ ބަޔާނުގައި ކަނޑު ދަތުރު ފަތުރު ކުރާ ހުރިހާ ފަރާތް ތަކަކަށް އިލްތިމާސްކޮށްފައި ވަނީ، ދަތުރު ތަކުގެ ސަލާމަތާއި ރައްކާތެރިކަން އެންމެ މަތީ ދަރަޖަ އަށް ކަށަވަރު ކުރުމަށްޓަކައި، މިހާރު އަމަލު ކުރަމުންދާ ކަނޑު ދަތުރު ފަތުރުގެ ގަވާއިދު ތަކާއި، އުސޫލު ތަކަށް ފުރިހަމަ އަށް ބޯލެނބުމަށެވެ.

ޖޫން މަހުގެ ފަހު ކޮޅު ކަނޑުގެ ހަރަކާތްތައް ކުއްލި ގޮތަކަށް މެދުކަނޑާލި ސަބަބެއް ޤަތަރުގެ ސަރުކާރުން ރަސްމީކޮށް ހާމަ ކޮށްފައި ނުވެ އެވެ. ނަމަވެސް، މި ފިޔަވަޅު އަޅާފައި ވަނީ އެ ސަރަހައްދުގައި ހިނގި އަސްކަރީ އޮޕަރޭޝަނެއްގެ ތެރޭގައި ގޮވި އެއްޗެއްގެ އެތިކޮޅު ތަކުން ޖެހި، ޒަހަމްވި ޤަތަރުގެ ރައްޔިތަކު މަރުވިކަން އެ ޤައުމުން އިއުލާން ކުރިތާ އެއް ދުވަސް ފަހުންނެވެ.

މަރުވި މީހާ އަކީ އޭނާ ދަތުރުކުރި އުޅަނދުގެ ޚަބަރެއް ނުވެގެން ހޯދަމުން ދަނިކޮށް ފެނުނު މީހެކެވެ. ޤަތަރުން ބުނެފައި ވަނީ އެ ހާދިސާ ހިނގާފައި ވަނީ އެ ސަރަހައްދުގައި ކުރިއަށް ދިޔަ އަސްކަރީ ހަރަކާތްތަކާ ގުޅިގެން ކަމަށެވެ.

އާދީއްތަ ދުވަހު ނެރުނު އައު އަމުރާ އެކު، ޤަތަރުގެ ކަނޑުގެ ސަރަހައްދުގައި މަސްވެރިކަން ކުރުމާއި އާންމު ދަތުރު ފަތުރުގެ ހަރަކާތްތައް މިހާރު ވަނީ އާންމު ހާލަތަކަށް ރުޖޫއަވެފައި އެވެ.