އީރާން-އެމެރިކާ ހަމަނުޖެހުމާއެކު ތެލުގެ އަގު ބޮޑުވެއްޖެ

އީރާނަށް އަމާޒުކޮށް އެމެރިކާއިން އަލުން ދޭން ފެށި ހަމަލާތަކާ ގުޅިގެން، ދުނިޔޭގެ ބާޒާރުގައި ތެލުގެ އަގު ދޭއް އިންސައްތައަށް ވުރެ މައްޗަށް ގޮސް، އޭޝިއާގެ ހިއްސާގެ ބާޒާރުތަކަށް ބޮޑު ލޮޅުމެއް އަތުވެއްޖެ އެވެ. މި ހަމަލާތަކާއެކު، ދުނިޔޭގެ އިގްތިސާދީ ގޮތުން މުހިންމު ސަރަހައްދެއް ކަމަށްވާ ހުރްމުޒް ކަނޑުއޮޅީގެ މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ.

އެމެރިކާގެ އަސްކަރިއްޔާއިން ބުނާ ގޮތުގައި، މި ހަމަލާތައް ދޭން ފެށީ ހުރްމުޒް ކަނޑުއޮޅިން ދަތުރުކުރި ތިން އުޅަނދަކަށް އީރާނުން ހަމަލާދިނުމާ ގުޅިގެންނެވެ. ނަމަވެސް، އެ އުޅަނދުތަކަށް ދިން ހަމަލާގެ ޒިންމާ އީރާނުން މިހާތަނަށް އުފުލާފައެއް ނުވެ އެވެ.

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އެމެރިކާގެ ފަހުގެ ހަމަލާތައް އަމާޒުކޮށްފައިވަނީ ގޭޝްމް އައިލެންޑާއި، ބަންދަރު އައްބާސްގެ އިތުރުން ސިރިކް އަށެވެ.

އެމެރިކާގެ ހަމަލާތަކަށް ރައްދު ދިނުމުގެ ގޮތުން އީރާނުން ވަނީ ބަހްރައިނާއި ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފަ އެވެ. އީރާނުގެ މަޖިލީހުގެ ރައީސް އަދި އިސް މަޝްވަރާވެރިޔާ މުހައްމަދު ޣާލިބާފް ވަނީ، މިދިޔަ މަހު ދެ ގައުމުގެ ދެމެދުގައި ސޮއިކުރި އެއްބަސްވުމާ އެމެރިކާއިން ބޮޑުތަނުން ޚިލާފުވެފައިވާ ކަމަށް ތުހުމަތު ކުރައްވާފައެވެ. އޭނާ ވިދާޅުވި ގޮތުގައި، ހުރްމުޒް ކަނޑުއޮޅީގައި އީރާނުން ގެނައި ބަދަލުތަކާ އެމެރިކާއިން ޚިލާފުވެ، އީރާނަށް ހަމަލާދޭނެ ކަމުގެ އިންޒާރު ތަކުރާރުކޮށް ދިނުމުގެ އިތުރުން، އީރާނުގެ ތެލާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެމެރިކާއިން ވަނީ އަލުން އިއާދަކޮށްފައެވެ. "ބިރުދެއްކުމާއި މަޖުބޫރުކުރުވުމުގެ ޒަމާން މިހާރު ވަނީ މާޒީވެފައި. އޭގެއިން ލިބޭނެ ކުރިއެރުމެއް ނެތް. އަހަރެމެން ފަހަތަކަށް ނުޖެހޭނަން،" އެކްސްގައި ކުރެއްވި ޕޯސްޓެއްގައި ޣާލިބާފް ވިދާޅުވިއެވެ.

މި ހަމަަނުޖެހުންތަކާ ގުޅިގެން، ބުދަ ދުވަހުގެ ހެނދުނު ބައިނަލްއަގުވާމީ މިންގަނޑެއް ކަމަށްވާ ބްރެންޓް ކްރޫޑް ތެޔޮ ފީފާއެއްގެ އަގު 2.6 އިންސައްތަ މައްޗަށް ގޮސް، 76.09 ޑޮލަރަށް ވަނީ އަރާފަ އެވެ. އަދި އެމެރިކާގެ ތެލުގެ އަގުތައް ވެސް 2.6 އިންސައްތަ މަތިވެ، ފީފާއެއްގެ އަގު ވަނީ 72.25 ޑޮލަރަށް އުފުލިފަ އެވެ.

ފާއިތުވި ހަފުތާތަކުގައި ތެލުގެ އަގުތައް ހުރީ، ފެބްރުއަރީ މަހުގެ ފަހުކޮޅު އެމެރިކާ އާއި އިސްރާއީލުން އީރާނާ ދެކޮޅަށް ހަނގުރާމަ ފެށުމުގެ ކުރިން އަގުތައް ހުރި މިންވަރަށް ދަށްވެފަ އެވެ.