ޝާރްޖާ އިން ފުރައިގެން ކަރާޗީއަށް ދަތުރުކުރި ބޮއިންގް 737 މަރުކާގެ ބޯޓެއް ގެއްލިއްޖެ
8 ޖުލައި 2026 | ބުދަ 07:35ޔޫއޭއީގެ ޝާރްޖާއިން ފުރައިގެން ކަރާޗީއަށް ދަތުރުކުރި "ކޭ2 އެއާވޭސް" ގެ ކާގޯ ބޯޓެއްގެ ނެވިގޭޝަން ސިސްޓަމަށް މައްސަލައެއް ދިމާވެ، ފަސް ފަޅުވެރިންނާއެކު ގެއްލުމާ ގުޅިގެން އެ ބޯޓު ހޯދުމުގެ މަސައްކަތް ޕާކިސްތާނުގެ ކަމާބެހޭ އިދާރާތަކުން ވަނީ ފަށާފައި. ބޮއިންގް 737 މަރުކާގެ މި ބޯޓު ކުއްލިއަކަށް ތިރިވާން ފެށުމަށްފަހު ރޭޑާރުން ގެއްލިފައިވާއިރު، ބޯޓު ހޯދުމުގެ އޮޕަރޭޝަނުގައި އެ ގައުމުގެ ނޭވީއާއި އެއާފޯސް އިން ދަނީ ހަރަކާތްތެރިވަމުން.
ކޭ2 އެއާވޭސް އަކީ ޕާކިސްތާނުގެ ކަރާޗީގައި ގާއިމުކޮށްފައިވާ އަމިއްލަ ކާގޯ އެއާލައިނެއް. | ކޭޓޫ އެއަރވޭސް
ޕާކިސްތާނުގެ ދެކުނުގެ ސިޓީއެއް ކަމަށްވާ ކަރާޗީގެ އައްސޭރިފަށުން، ފަސް ފަޅުވެރިންނާއެކު ދަތުރުކުރި ކާގޯ މަތިންދާ ބޯޓެއް ގެއްލުމާ ގުޅިގެން އެ ބޯޓު ހޯދުމުގެ މަސައްކަތް ފަށާފައިވާ ކަމަށް އެ ގައުމުގެ އޭވިއޭޝަން އޮފިޝަލުން ވިދާޅުވެއްޖެއެވެ.
ޕާކިސްތާނުގެ އެއާޕޯޓް އޮތޯރިޓީން ބުނި ގޮތުގައި، ޔުނައިޓެޑް އެރަބް އެމިރޭޓްސްގެ ޝާރްޖާ އިން ފުރައިގެން ކަރާޗީއަށް ދަތުރުކުރި ބޮއިންގް 737 މަރުކާގެ މި ބޯޓު، ވަރަށް ބާރުމިނުގައި ތިރިވާން ފެށުމަށްފަހު އެއާ ޓްރެފިކް ކޮންޓްރޯލަރުންނާ ގުޅުން ކެނޑިފައިވަނީ އަންގާރަ ދުވަހުގެ ރޭ، އެ ގައުމުގެ ގަޑިން 21:21 (ޖީއެމްޓީން 16:21) ގައެވެ.
އެއާޕޯޓް އޮތޯރިޓީން މައުލޫމާތު ދޭ ގޮތުގައި، ބޯޓު ތިރިވާން ފެށުމުގެ ކުޑަ ވަގުތުކޮޅެއް ކުރިން، ބޯޓުގެ ނެވިގޭޝަން ސިސްޓަމަށް މައްސަލައެއް ދިމާވެފައިވާ ކަމަށް ބޯޓުން ވަނީ ރިޕޯޓްކޮށްފަ އެވެ.
މި ބޯޓަކީ ކަރާޗީގައި ހުންނަ އަމިއްލަ ކާގޯ އެއާލައިނެއް ކަމަށްވާ "ކޭ2 އެއާވޭސް" އިން އޮޕަރޭޓްކުރާ ބޯޓެކެވެ. އެ ކުންފުނީގެ ވެބްސައިޓުގައިވާ ގޮތުން އެ އެއާލައިން އުފައްދާފައިވަނީ 2018 ވަނަ އަހަރު އެވެ. ބުދަ ދުވަހު ކޭ2 އެއާވޭސް އިން ނެރުނު ބަޔާނެއްގައި، ބޯޓުގައި ތިބި ފަސް ފަޅުވެރިންގެ މައުލޫމާތު ހާމަކޮށްފައިވާއިރު، ޕާކިސްތާނުގެ ސިވިލް އޭވިއޭޝަން އޮތޯރިޓީއާއި ސަރުކާރުގެ އެހެނިހެން އިދާރާތަކަށް ފުރިހަމަ އެއްބާރުލުން ދެމުންދާ ކަމަށް އެ ކުންފުނިން ވަނީ ބުނެފަ އެވެ.
ފްލައިޓްތައް ޓްރެކްކުރާ ޕްލެޓްފޯމެއް ކަމަށްވާ "ފްލައިޓްރޭޑާ24" ގެ ވަގުތީ މައުލޫމާތުތަކުން ދައްކާ ގޮތުގައި، ބޯޓު ކުއްލިއަކަށް ތިރިވާން ފެށުމުގެ ކުރިން، ބޯޓު އުދުހެމުންދިޔަ އުސްމިނަށް ބޮޑެތި ބަދަލުތަކެއް އައިކަން ވަނީ ފާހަގަކުރެވިފަ އެވެ.
ގެއްލުނު ބޯޓު ހޯދުމުގެ މަސައްކަތުގައި ޕާކިސްތާނުގެ ނޭވީއާއި އެއާފޯސް ހިމެނޭހެން ސަރުކާރުގެ އެކި އިދާރާތަކުން ހަރަކާތްތެރިވަމުންދާ ކަމަށް އެއާޕޯޓް އޮތޯރިޓީން ބުނެ އެވެ.
ޕާކިސްތާނުގައި މީގެ ކުރިން ހިނގި އެންމެ ނުރައްކާތެރި ވައިގެ ހާދިސާއަކީ 2020 ވަނަ އަހަރު އެ ގައުމުގެ އެތެރެވަރީގެ އުދުހުންތަކުގައި ބޭނުންކުރާ ފްލައިޓަކަށް ދިމާވި ހާދިސާ އެވެ. އެ ހާދިސާގައި ޕާކިސްތާން އިންޓަނޭޝަނަލް އެއާލައިންސް (ޕީއައިއޭ) ގެ ބޯޓެއް ކަރާޗީ އެއާޕޯޓަށް ޖައްސަން އުޅުމުގެ ތެރޭގައި ވެއްޓި، ބޯޓުގައި ތިބި 99 މީހުންގެ ތެރެއިން ދެ މީހުން ފިޔަވައި އެންމެން ވަނީ މަރުވެފަ އެވެ.
މަސްދަރު: ބީބީސީ
