މާލެ އަތޮޅު ދެކުނުބުރި މުޅިން ކިސަޑު ވެއްޖެ

ރަސްމާލެ ނަމުގައި ރަށެއް ހެދުމަށް ފުށިދިއްގަރު ފަޅު ހިއްކަމުން ދިއުމުގެ ސަބަބުން މުޅި މާލެ އަތޮޅު ދެކުނުބުރި ކިސަޑުން ތަޣައްޔަރުވެފައިވާ މަންޒަރު ފެންނަ ފޮޓޯތަކެއް އާންމު ވެއްޖެ އެވެ.

ދުނިޔޭގެ އެންމެ ބޮޑު އެއް ޑްރެޖަރު ބޭނުން ކޮށްގެން މި ފަރު ހިއްކަމުން ގެންދިއުމުގައި ތިމާވެށީގެ ގޮތުން އަޅަން ޖެހޭ ރައްކައުތެރިކަމުގެ ފިޔަވަޅުތައް އަޅާފައި ނުވާތީ އެކަމުގެ ކަންބޮޑުވުން މީސް މީޑިއާ ގައި ގިނަ ބަޔަކު ގެންދަނީ ފާޅު ކުރަމުންނެވެ. އެ ގޮތުން ސަރުކާރުން އެ ސަރަހައްދު ހިއްކަމުން ދިއުމުގައި ކިސަޑު ކޮންޓްރޯލް ކުރުމަށް އާއްމު ގޮތެއްގައި މިފަދަ މަޝްރޫއުތައް ހިންގާއިރު އަޅާފައި ހުންނަ އެއްވެސް ފިޔަވަޅެއް އަޅާފައިވާ ނުވާކަން ފާހަގަ ކުރެވެ އެވެ.

އާންމު ވެފައިވާ އޭރިއަލް ފޮޓޯ ތަކުން ފެންނަ ގޮތުގައި، އަތޮޅުގެ މެދުތެރޭގެ ފަރުތަކުގެ މައްޗަށާއި، އަތޮޅުގެ ހުޅަނގު ބިތުގެ ފަރުތަކުގެ މައްޗަށް ވަނީ ވަރަށް ބޮޑަށް ކިސަޑު ފެތުރިފަ އެވެ. އަދި އަތޮޅުގެ ހުޅަނގުފަރާތު މައި ފަރުގެ ބޭރުން ބޮޑު ސަރަހައްދަކަށް ކިސަޑުތައް ފެތުރިގެން ގޮސްފައިވާތަން ފެނެ އެވެ.

މާލެ އަތޮޅު ދެކުނު ބުރިއަކީ ފަތުރުވެރިކަމުގައި މަގްބޫލު ރިސޯޓު ތަކާއި ގެސްޓް ހައުސްތައް ހުރި ސަރަހައްދަކަށް ވުމުގެ އިތުރުން ފަތުރުވެރިންގެ މެދުގައި މަގުބޫލު ރާޅު ޕޮއިންޓްތަކާއި ޑައިވްސައިޓްތައް ހުރި އަތޮޅެއް ކަން ފާހަގަ ކުރެވެ އެވެ.

ފަތުރުވެރިކަމުގެ މައްޗަށް ގައުމުގެ އިގްތިސާދު ބިނާވެފައިވާ އިރު ހުސްވި އަހަރު ފަތުރުވެރިކަމުން 5.4 ބިލިއަން ޑޮލަރު އާމްދަނީގެ ގޮތުގައި ދައުލަތައް ލިބިފައިވެ އެވެ.

ސަރުކާރުން މިހާރު ވަނީ އަންނަ އަހަރަކީ ދިވެހިރާއްޖެ އަށް ޒިޔާރަތް ކުރުމުގެ އަހަރުގެ ގޮތުގައި ކަނޑައަޅާފަ އެވެ.

ރާއްޖޭގެ ފަރުތަކަކީ ފަތުރުވެރިކަމުގެ އިތުރުން މަސްވެރިކަމާއި އެންވެރި ކަމަށް އެންމެ މުހިންމު މާހައުލުތަކަށް ވުމުގެ އިތުރުން މޫސުމަށް އަންނަ ބަދަލުތަކާއި ކަނޑުގެ ލޮނުގަނޑު އުފުލުމުގެ ނުރައްކަލުން ރާއްޖެ ސަލާމަތް ކުރުމުގައި ގުދުރަތީ ގޮތުން އޮތް އެންމެ މުހިންމު އައްޑަނަ އެވެ.

ތިމާވެށީގެ ޚާއްސަ ސިފަތަކެއް ލިބިފައިވުމުގެ ސަބަބުން މާލެ އަތޮޅު ދެކުނުބުރީގައި ހިމާޔަތް ކޮށްފައިވާ ސަރަހައްދުތަކެއް އޮންނަ އިރު އެތަންތަނުގެ މައްޗަށް ވެސް ކިސަޑު ފެތުރިފައިވާކަން ވަނީ ފާހަގަ ކުރެވިފަ އެވެ. މާލެ އަތޮޅު ދެކުނު ބުރީގައި ކިސަޑު ފެތުރޭ ސަރަހައްދުތަކުގެ ތެރޭގައި ހިމާޔަތް ކޮށްފައިވާ މުހިންމު ދެ ސަރަހައްދު ހިމެނޭ އިރު އެތަންތަން ހިމާޔަތް ކޮށްފައިވަނީ އެތަންތަނުގައި އެކުލެވިފައިވާ މުރަކާ އާއި ދިރޭތަކެތީގެ މުއްސަނދި ކަމުގެ ސަބަބުން ކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ ރަސްމީ ވެބްސައިޓްގައިވެ އެވެ. 

• ގުރައިދޫ ކަނޑުއޮޅި: މިއީ އޮއިގަދަ، އެހެންނަމަވެސް މުރަކައާއި، ފަރުގެ އެކި ދިރުންތަކުން މުއްސަނދިވެފައިވާ މަޝްހޫރު ސަރަޙައްދެކެވެ. މި ސަރަޙައްދަކީ ތަފާތު ބާވަތްތަކުގެ މުރަކައާއި "ސްޕޮންޖް" ފަދަ ކަނޑުގެ ދިރުންތަކުން މުއްސަނދިވެފައިވާ ތަނެކެވެ.

• އެނބޫދޫ ކަނޑުއޮޅި: މިއީ ދިރުންހުރި، ދުޅަހެޔޮ މުރަކައިގެ ނިޒާމަކަށް މަޝްހޫރުވެފައިވާ ކަނޑުއޮޅިއެކެވެ.

ތިމާވެށީގެ އާދަޔާ ޚިލާފު ސިފަތަކެއް ލިބިފައިވާ މި ދެ ސަރަހައްދަކީ ވެސް ހިއްކަމުން ގެންދާ ފުށިދިއްގަރު ފަޅާއި ވަރަށް ގާތުގައި އޮތް ދެ ސަރަހައްދުކަން ފާހަގަ ކުރެވެ އެވެ.

މާލެ އަތޮޅުގެ އެކި ކަނޑުއޮޅިތަކަކީ ކަނޑުއަޑީގެ މުއްސަނދި ދިރުންތަކާއި ފަރުތަކުގެ ނިޒާމަށް ޚާއްސަ ސިފަތަކެއް ލިބިފައިވާ ތަންތަން ކަމުގައި ތިމާވެށީގެ ތަޖުރިބާކާރުން ވިދާޅުވެ އެވެ.

ސޯޝަލް މީޑިއާ ގައި އާންމުވެފައިވާ ފޮޓޯތަކުން ކޮންނަ ބޯޓު ދަތުރުކުރަމުންދާ މަގުގައި ވެސް ބޮޑު ސަރަހައްދަކަށް ކިސަޑު ފެތުރިފައިވާ މަންޒަރު ފެނެ އެވެ.

ރަސްމާލޭގެ އިތުރުން ރައީސް މުއިއްޒުގެ ސަރުކާރުން ބިން ހިއްކުން ކުރިއަށް ގެންދާ އެހެން ބައެއް ރަށްރަށުގައި ވެސް ބިން ހިއްކުން ކުރިއަށް ގެންދަނީ ތިމާވެށީގެ ގޮތުން އަޅަން ޖެހޭ ރައްކައުތެރި ކަމުގެ އެއްވެސް ފިޔަވަޅެއް އެޅުމެއް ނެތިކަން ފާހަގަ ކުރެވެ އެވެ.

ސެޓެލައިޓް އިމޭޖުތަކުން ފެންނަ ގޮތުގައި ހއ. ދިއްދޫ ގެ ބިން ހިއްކުމުގެ މަސައްކަތް ކުރިއަށް ގެންދާ ގޮތުން ބޮޑު ސަރަހައްދަކަށް ކިސަޑު ފެތުރިފައިވާ މަންޒަރު ހާމަވެފައިވެ އެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ފަހު ރާއްޖޭގެ ތިމާވެށީގެ ރައްކައުތެރި ކަމަށް ހެދިފައިވާ މުހިންމު ބައެއް ގަވައިދުތަކަށް އެތައް ބަދަލެއް ގެނެސް ތިމާވެށި ރައްކައުތެރި ކުރުމަށް ކުރިން އަމަލު ކުރަމުން އައި ހަރުދަނާ އުސޫލުތަކަށް ވަނީ ވަރަށް ބޮޑަށް ލުއި ދީފަ އެވެ.

އެ ގޮތުން ތަރައްގީގެ މަޝްރޫއު ތަކުގެ ސަަބަބުން ތިމާވެއްޓަށް ކުރާ ނޭދެވޭ އަސަރުތައް ކުޑަ ކުރުމަށް ހަދަން ޖެހޭ އެންވަޔަރަންމަންޓަލް އިމްޕެކްޓް އެސެސްމެންޓް (އީއައިއޭ) ރިޕޯޓު ހެދުމުގައި އަމަލު ކުރަމުން އައި ހަރުދަނާ އުސޫލުތަކަށް ވަނީ ބަދަލު ގެނެސްފަ އެވެ. އެ ބަދަލުތަކުގެ ނާޖާއިޒު ފައިދާ ނަގައިގެން ތިމާވެއްޓަށް ބޮޑެތި ގެއްލުންވެދާނެ ފަދަ މަޝްރޫއުތައް އީއައިއޭ ރިޕޯޓު ހުށަވެސް ނާޅާ ފަށާފައިވާކަން ފާހަގަ ކުރެވެ އެވެ.