ފެތެމުންދާ އެއްޗަކަށް ކިތަންމެ މޮޅު މީހަކު އެރުވިޔަސް ޖެހޭނީ ހަމަ ދިޔަ ހިއްކަން، ސަފީރުން އެކުރަނީ އެ މަސައްކަތް: ޒިޔާދު

މި ސަރުކާރުން އެކި ގައުމުތަކަށް ސަފީރުން އައްޔަނު ކުރާތާ 2 އަހަރާ ބައި ވެއްޖެ ކަމަށާ އެހެން ނަމަވެސް އެއްވެސް ސަފީރެއްގެ ފަރާތުން މި ގައުމަށް ވީ އެންމެ ފައިދާ އެއްވެސް ނެތް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.

އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރާއްޖެއަށް ސަފީރު އައްޔަނު ކުރުމާ ގުޅޭ ގޮތުން މަޖިލީހުގެ ޚަރިޖީ ގުޅުންތަކުގެ ކޮމިޓީ އިން ހުށަހެޅި ރިޕޯޓަކަށް ބަހުސް ކުރައްވަމުން ޒިޔާދު ވިދާޅުވީ 20 ވަނަ  ރައްޔިތުންގެ މަޖިލީހުގައި އެންމެ ގިނައިން ކުރެވޭ މަސައްކަތަކީ ސަފީރުން ކަނޑައެޅުމާ ނޮން ރެޒިޑެންޓް ސަފީރުން ކަނޑައެޅުން ކަމަށެވެ.

އެކަން ކުރާތާ 2 އަހަރާ ބައި ވެއްޖެ ކަމަށާ އުފެދޭ ސުވާލަކީ ނުވެސް ދަންނަ ގައުމުތަކުގެ ތަންތަނަށް ވެސް ސަފީރުން ކަނޑައަޅައިގެން ލިބެނީ ކޯޗެއްތޯ އުފެދޭ ސުވާލު ކަމަށެވެ.

ކޮމިޓީގެ މަސައްކަތް ވެސް ރަނގަޅު. ހަމަ ގާބިލު ބޭބޭފުޅުން ލަނީ. އެހެން ނަމަވެސް މިއަދާ ހަމައަށް އައި އިރު މީގެ ސަފީރެއްގެ ފަރާތުން، ނޮންރެޒިޑެންޓް ސަފީރެއްގެ ފަރާތުން މި ރާއްޖެ އަށް ލިބުނީ ކޯޗެއްތޯ ރައްޔިތުން އެބަ ކުރޭ. މި ބޭބޭފުޅުންނަށް ވެސް ދައުލަތުން ބޮޑު ސިންގާ މުސާރައެއް އެބަ ދޭ. މި ބޭފުޅުންގެ އާއިލާތައް އެބަ ބަލައި. އާންމުކޮށް، ސަރުކާރުން އެހެލާ ވަޒީރުންނާ އަދި އެހެން ގައުމުތަކުން އެހެލާ ބޭފުޅުން ވެސް ގިނަ ފަހަރު މި ލަނީ އެމްބަސީތަކަށް މީގެން ނުކުންނަ ނަތީޖާ އަކީ ކޮބައިތޯ. ދައުލަތަށް ލިބެނީ ކޯޗެއްތޯ. އެ ސުވާލު ރައްޔިތުން ކުރާތީ އަޅުގަނޑު ހިތަށް އެރީ ހަމަ އެކަން ފާހަގަ ކޮށްލާނީ އޭ.

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު

ޒިޔާދު ވިދާޅުވީ މިއަދު މި ފެންނަ މަންޒަރަކީ ހަމަ ފެންނަން ޖެހޭ މަންޒަރު ކަމަށެވެ. އެގޮތުން ފެތެމުންދާ އެއްޗަކަށް ކިތަންމެ މޮޅު މީހަކު އެރުވިޔަސް ޖެހޭނީ ހަމަ ދިޔަ ހިއްކަން ކަމަށް މެންބަރު ވިދާޅުވި އެވެ. ސަފީރުން ވެސް ކުރަން ޖެހިވަޑައިގަންނަވަނީ އެކަން ކަމަށް ޒިޔާދު ވިދާޅުވި އެވެ. 

މެންބަރު ވިދާޅުވީ މި ސަރުކާރުން ކުރާހާ ވެސް ކަމަކީ ސަރުކާރުގެ މޫނުމަތި ރީތިކުރުމާ ސަރުކާރުގެ މޮޅު ވާހަކަ ދެއްކުން ކަމަށެވެ. އެއްޗެއް ހޯދުމެއްގެ ނިޔަތެެއް ވެސް ނެތް ކަމަށާ 2 އަހަރު ބައި ވެފައިވާއިރު ބޭރު ގައުމަކުން މިގައުމަށް ބޭސްކޮޅެއް ވެސް ނުލިބޭ ކަމަށް މެންބަރު ވިދާޅުވި އެވެ.

ޒިޔާދު ވިދާޅުވީ މިހުރިހާ ކަމެއް މި ދިމާވަނީ ސަފީރުން ނެތިގެން ނޫން ކަމަށާ އެހެން އެކަން ވަނީ ގައުމުތަކާއެކު ގުޅުން ނެތުމުން ކަމަށެވެ. ގައުމުތަކަށް ސަފީރުން ކަނޑައެޅުމަކީ ގުޅުން ބަދަހިވާ ކަމެއް ނޫންކަން ފާހަގަ ކުރައްވާ ޒިޔާދު ވިދާވީ އެކަމަށްޓަކައި ސަރުކާރަށް އޮންނަ އިތުބާރެއް ވެސް އޮންނަން ޖެހޭ ކަމަށެވެ.