މާލޭގެ ރައްޔިތުން ނުތިބޭނެ، ތިބޭނީ ދިވެހި ރައްޔިތުން: މެންބަރު ޒިޔާދު
ރަށްވެހިކަމުގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުން، ރަޖިސްޓްރީ ބަދަލުކުރުމަށް އޮންނަ ފަސް އަހަރުގެ މުއްދަތު އުނިކޮށް ރައްޔިތުންނަށް ލުއިފަސޭހަ ގޮތްތަކެއް ހޯދައިދޭން ޖެހޭ ކަމަށް ވައިކަރަދޫ ދާއިރާގެ މެންބަރު ޒިޔާދު ގޮވާލެއްވި. ގާނޫނުއަސާސީ ބިނާވެފައިވަނީ ހުރިހާ ދިވެހި ރައްޔިތުންގެ މައްޗަށް ކަމަށްވާއިރު، ވަކި ސަރަހައްދެއްގެ ރައްޔިތުންގެ ބަދަލުގައި ހަމަހަމަ އުސޫލުން ފުރުސަތުތައް ފަހިކޮށްދޭން ޖެހޭނެ ކަމަށް އޭނާ ފާހަގަކުރެއްވި. އެހެންކަމުން، ގިނަ ދުވަސްވެފައިވާ މި ގާނޫނަށް ޒަމާނީ ބަދަލުތަކެއް ގެނައުމަކީ މުހިންމު ކަމެއް ކަމަށް މެންބަރު ވިދާޅުވި.
ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެންބަރު ހުސެއިން ޒިޔާދު ވާހަކަ ދައްކަވަނީ | ރައްޔިތުންގެ މަޖިލިސް
މާލޭގެ ރައްޔިތުން ނުތިބޭނެ ކަމަށާއި، ތިބޭނީ ދިވެހި ރައްޔިތުން ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް ހުށަހެޅުއްވި ރަށްވެހިކަމުގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުން މެންބަރު ޒިޔާދު ވިދާޅުވީ މި ގާނޫނަށް އިސްލާހު ގެންނަން ޖެހޭ ކަމަށާއި، ރަޖިސްޓްރީ ބަދަލު ކުރުމަށް އެ އޮންނަ ފަސް އަހަރު އުނިކޮށްލަން ޖެހޭ ކަމަށެވެ.
މިގާނޫނަށް ގިނަ ދުވަސްތަކެއް ވެފައިވާކަން ފާހަގަކުރައްވައި މެންބަރު ޒިޔާދު ވިދާޅުވީ، އިސްލާހު ގެނެސްގެން ފަސޭހަ ގޮތްތައް ރައްޔިތުންނަށް ހޯދައިދޭން ޖެހޭ ކަމަށެވެ.
ގާތްގަނޑަކަށް ދޮގު ނަހަދަންޏާ 50 ވަރަކަށް އަހަރު މި ވަނީ މި ގާނޫނަށް. އޭގެޔަށް ފަސް އަހަރުގެ ބަދަލުގައި އެ މުއްދަތު ކަނޑާލައި، ދޭންވެގެން ނިޔަތުގައި ކަމަށް އަޅުގަނޑު ގަބޫލުކުރަނީ އިއްޒަތްތެރި މެންބަރު ހުށަހަޅާފައި މި އޮތީ. އެހެންނަމަވެސް، މިހާރުވެސް އަޅުގަނޑު ވެސް ގަބޫލުކުރަން އެ 5 އަހަރަކީ އިޚްތިޔާރެއް. އެ ރަށެއްގައި ވެރިންނަށް ނުވަތަ އެ ރަށެއްގައި އެކަމާ ބެހޭ ފަރާތްތަކަށް ލިބޭ އިޚްތިޔާރެއް. މިއަދު ވެސް ހަމަ ދުވަހުން ދުވަހަށް ބަދަލުވެވޭ ގޮތަށް އޮތީ. އެހެންވީމާ، މިހާ ފަސޭހަ އިސްލާހެއް ހުށަހަޅާފައި، މިހާ ފަސޭހަ ނިމެން އޮތް ކަމެއްގައި މިކަމާ އެއްބަސްވަނިކަން ވެއްޖެއްޔާ އެއްބަސްވާންވީ. ފަސް އަހަރު ދިގުކުރަންޏާ ދިގުކުރަންވީ. 78ގައި ހަދާފައި އޮތް ގާނޫނަކަށް އިސްލާހެއް މިހާރަށް ގެނައުމަކީ ނުގެނެސް ބާވަންޖެހޭ ސަބަބެއް ކަމުގައި އަޅުގަނޑު ނުދެކެން.ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
މީގެ އިތުރުން މެންބަރު ޒިޔާދު ވިދާޅުވީ މާލޭގެ ރައްޔިތުން ނުތިބޭނެ ކަމަށާއި، ތިބޭނީ ދިވެހި ރައްޔިތުން ކަމަށެވެ. އަދި ގާނޫނު އަސާސީ ވެސް ލިޔެފައި އޮތީ ހުރިހާ ރައްޔިތުންގެ މައްޗަށް ކަމަށް އޭނާ ވިދާޅުވި އެވެ.
ލާމު ފޮނަދޫ ރައްޔިތަކާއި، ވައިކަރަދޫ ރައްޔިތަކާއި، ކުޅުދުއްފުށި ރައްޔިތަކާއި، މާލޭ ރައްޔިތަކާ ނޫޅޭނެ އިއްޒަތްތެރި ރައީސް. އެއީ މައްސަލައަކީ. ދިވެހި ރައްޔިތުން ދިވެހި ގާނޫނުއަސާސީ އޮތީ ހުރިހާ ރައްޔިތުންގެ މައްޗަށް ލިޔެވިފަ. އެހެންވީމާ، މާލޭ ރައްޔިތުންނަކީ މިއީ އޮތް އެއްޗެއް ނޫން. ކޮންމެވެސް އެހެން ބޭނުމެއްގައި އެ ވިއްކަނީ. މާލޭ ރައްޔިތުންނަށް ތިމަންނާމެން މިކަން. މާލޭ ރައްޔިތުން ނުތިބެނީ އިއްޒަތްތެރި ރައީސް. ދިވެހި ރައްޔިތުން ތިބީ. އެހެންނަމަވެސް، ބައެއް ކަންކަމުގައި އެ އުސޫލުތައް އެބަހުރި. އެ ތެދެއްމެ. މާލެއިން އެންމެ ފަހުން ގޯތި ދިންއިރު އަޅުގަނޑަކަށް ނުލިބޭނެތާ. އަޅުގަނޑަކީ ފަޚުރުވެރި ރާއްޖެތެރޭ މީހެއް، ނުލިބޭ އަޅުގަނޑަކަށް.ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
މެންބަރު ޒިޔާދު ވިދާޅުވީ ރަށްރަށުގެ ކައުންސިލުތަކުން ވެސް އުސޫލުތައް ހަދާ ކަމަށާއި، ނަމަވެސް ތަނަކުން ވެސް ދިވެހި ރައްޔިތުންނަށް ފުރުސަތު ދެވެން އޮތިއްޔާ ހަމަހަމަ އުސޫލުން ފުރުސަތު ފަހިކޮށްދޭން ޖެހޭ ކަމަށެވެ.
