ރާއްޖެތެރޭ އެއްވެސް މީހަކަށް މާލެ ސަަހައްދުން ގޯތި ނުލިބި، ލިބެނީ ފްލެޓު، މިއުސޫލު އުވާލަން ޖެހޭ: މެންބަރު ގަފޫރު
މާލެ ސަރަހައްދުން ގޯތި ދިނުމުގައި އަތޮޅުތެރޭގެ ރައްޔިތުންނާ މެދު ތަފާތުކުރުންތައް ގެންގުޅޭތީ، އެކަން ހުއްޓުވުމަށްޓަކައި "ދާއިމީ އެޑްރެސް" އުވާލުމަށް ހަނިމާދޫ ދާއިރާގެ މެންބަރު އަބްދުލްޣަފޫރު ގޮވާލެއްވި. ހުޅުމާލެ ފަދަ ތަންތަން ހިއްކަނީ ހުރިހާ ރައްޔިތުންގެ ފައިސާއިން ކަމަށްވާތީ، ބޯހިޔާވަހިކަމުގެ ފުރުސަތުތައް އެންމެންނަށް ހަމަހަމަކޮށް ލިބެންޖެހޭ ކަމަށް މެންބަރު ވިދާޅުވި. އަދި ގާނޫނުއަސާސީން ކަށަވަރުކޮށްދޭ ހަމަހަމަކަން ގާއިމުކުރުމަށް ސަރުކާރުތަކުން ގެންގުޅޭ މިފަދަ ތަފާތުކުރުންތައް ނައްތާލުމަށް އޭނާ ގޮވާލެއްވި.
ރައްޔިތުން މަޖިލީހުގެ ޖަލްސާއެއްގައި ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ ވާހަކަ ދައްކަވަނީ. | މަޖިލިސް
ރާއްޖެތެރޭ އެއްވެސް މީހަކަށް މާލެ ސަަހައްދުން ގޯތި ނުލިބި، ލިބެނީ ފްލެޓު ކަމަށާއި، މިއުސޫލު އުވާލަން ޖެހޭ ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް ހުށަހެޅުއްވި ރަށްވެހިކަމުގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުން މެންބަރު ޣަފޫރު ވިދާޅުވީ ވަކި ބަޔަކަށް ވަކި މޮޑެލެއް ތައާރަފް ކުރުމުން ގިނަ މައްސަލަތައް ކުރިމަތިވާނެ ކަމަށާއި، މިހާރު ދިމާވެގެން މިއުޅެނީ އެފަދަ މައްސަލައެއް ކަމަށެވެ.
އެގޮތުން މިހާރު މާލޭގައި ހުންނަ މީހަކު ސްރީލަންކާއަށް ދިއުމަށް ކުރާ ހަރަދަށް ވުރެ، ރަށެއްގައި ހުންނަ މީހަކު ލަންކާއަށް ދިއުމަށް ކުރާ ހަރަދު އެތައް ގުނައެއް ބޮޑު ކަމަށް މެންބަރު ޣަފޫރު ވިދާޅުވި އެވެ. މިފަދަ ގިނަ ކަންކަމުގައި ތަފާތުތައް ހުރިއިރު، ދިވެހި ރައްޔިތުންނަށް ހަމަހަމަ ފުރުސަތުތައް ހުޅުވާލަން ޖެހޭ ކަމަށާއި، އެ މަސައްކަތް ކުރުމަށް އެންމެ ފުރަތަމަ ދާއިމީ އެޑްރެސް އުވާލަން ޖެހޭ ކަމަށް މެންބަރު ޣަފޫރު ވިދާޅުވި އެވެ.
މީގެ އިތުރުން މެންބަރު ޣަފޫރު ވިދާޅުވީ ރާއްޖެތެރޭ މީހުންނަށް މާލެއިން ލިބެނީ ފްލެޓު ކަމަށާއި، މިހާތަނަށް ގޯއްޗެއް ލިބިފައިނުވާ ކަމަށެވެ. ނަމަވެސް ހުޅުމާލެ ހިއްކީ ވެސް ދިވެހި ހުރިހާ ރައްޔިތުންގެ ފައިސާ އިން ކަމަށް އޭނާ ވިދާޅުވި އެވެ.
ރާއްޖެތެރޭގައި އޮތް އެއްވެސް ބޭފުޅަކަށް، ރާއްޖެތެރޭ އުފަން އެއްވެސް ބޭފުޅަކަށް މި މާލެ ސަރަޙައްދަކު ނެތް ގޯއްޗު ލިބިފައެއް. ނެތް ލިވަކާއެއް. މާލެ މި ރާއްޖެތެރޭ މީހުންނަށް ފްލެޓު އަސްމާ އިއްޒަތްތެރި މެންބަރަށް ގޯތި. މިއީ ނޫންތޯ މީގައި ހިނގާ ގޮތަކީ؟ އެހެންވެގެންނުވާނެ. ހުޅުމާލެ ހިއްކީ ވެސް ދިވެހި ރައްޔިތުންގެ ފައިސާއަށް. ދެން ހުރި ތަންތަން ހިއްކީ ވެސް ދިވެހި ރައްޔިތުންގެ ފައިސާއަށް. އެންމެންނަށް ހަމަހަމަކަމާ އެއްކޮށް އެ ފުރުޞަތު އޮންނަންޖެހޭނެ މި ޤައުމުގައި އިއްޒަތްތެރި ރައީސް. މިއަދަކު ނެތް. ނެތީ ދާއިމީ އެޑްރެހެއް ހަދައިގެން ތަފާތުކުރުން ގެންގުޅޭތީ. މިއީ ހަމަ ސީދާ ތަފާތުކުރުމެއް މިއީ. މިއީ ހަމަ ސީދާ ތަފާތުކުރުމެއް މިއީ. މި ތަފާތުކުރުން މި ޤައުމުން ނެތިދާންޖެހޭނެ. މާލޭގައި އުޅޭ މީހެކޭ، ރާއްޖެތެރޭގައި އުޅޭ މީހެކޭ އެއްވެސް ތަފާތެއް ކުރުމެއް ނެތް.ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްގަފޫރު މޫސާ
މެންބަރު ގަފޫރު ވިދާޅުވީ ރާއްޖޭގެ ގާނޫނު އަސާސީން ދިވެހި ހުރިހާ ރައްޔިތުންނަށް ހަމަހަމަކަމުގެ ފުރުސަތު ފަހިކޮށްދޭން ޖެހޭ ކަމަށެވެ. އަދި ރާއްޖެތެރޭ މީހުންނާއި، މާލޭ މީހުންގެ ތަފާތު ކުރުންތައް ގެންނަނީ ސަރުކާރުތަކުން ކަމަށާއި، މިކަން ސަރުކާރަށް ބަދަލު ކުރެވޭނެ ކަމަށް އޭނާ ވިދާޅުވި އެވެ.
