އިދިކޮޅު ފިކުރަކީ ގައުމަށް ޖެހިފައިވާ ކެންސަރެއް: ޓްރަމްޕް

އިންސާނީ ތާރީޚުގައި ހޯދާފައިވާ އެންމެ ބޮޑު ކާމިޔާބީ އަކީ އެމެރިކާ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ، އެމެރިކާގެ މިނިވަން ކަމަށް 250 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. 

ހޮނިހިރު ދުވަހު އެމެރިކާގެ ވެރި ރަށް ވޮޝިންޓަންގައި ބޭއްވި މި ހަރަކާތުގައި ޓްރަމްޕް ވަނީ އެމެރިކާގެ އެތެރޭގެ ސިޔާސީ ވާދަވެރިންނަށް ވަރުގަދަ ހަމަލާ ތަކެއް އަމާޒު ކުރައްވައި، އެއީ ކޮމިއުނިސްޓުންގެ ގޮތުގައި ސިފަ ކުރައްވާފައި އެވެ.

މޫސުން ގޯސްވުމުގެ ސަބަބުން އެތައް ގަޑިއިރެއް ފަހުން ފެށި މި ޖަލްސާގައި ޓްރަމްޕް ވިދާޅުވީ، އޭނާގެ ރިޔާސަތުގައި އެމެރިކާ އޮތީ މީގެ ކުރިން ދުވަހަކު ވެސް ފަޚުރުވެރި ނުވާ މިންވަރަށް، ފަޚުރުވެރި ހާލަތެއްގައި ކަމަށެވެ. ވޮޝިންޓަންގެ ނޭޝަނަލް މޯލް އަށް އެއްވެފައި ތިބި އެތައް ހާސް ބަޔަކާ މުޚާތަބު ކުރައްވައި ޓްރަމްޕް ވިދާޅުވީ، ވޭތުވެ ދިޔަ ދެ ގަރުނާ ބައިގެ ތެރޭގައި އެމެރިކާގެ ޖުމްހޫރިއްޔާ ދެމި އޮތީ އިންސާނީ ތާރީޚުގެ އެންމެ އުސް މިނުގައި ކަމަށެވެ.

މި ރަސްމިއްޔާތުގައި ދެ ވަނަ ބޮޑު ހަނގުރާމަ އާއި، ކޮރެއާ އަދި ވިއެޓްނާމް ހަނގުރާމައިގެ ބައިވެރިންނަށް ޓްރަމްޕް ވަނީ ތައުރީފު ކުރައްވާފައި އެވެ. ނަމަވެސް، ކޮރެއާ އަދި ވިއެޓްނާމް ހަނގުރާމަ އަކީ ކޮމިއުނިސްޓުންނާ ދެކޮޅަށް ކުރި ހަނގުރާމަ ތަކެއްގެ ގޮތުގައި ފާހަގަ ކުރައްވައި، އެމެރިކާގެ އެތެރޭގައި އެ ފިކުރު ފެތުރެމުންދާ ކަމަށް ވިދާޅުވެ ޓްރަމްޕް އިންޒާރު ދެއްވި އެވެ.

ޓްރަމްޕް ވިދާޅުވީ އެމެރިކާގެ ހަނގުރާމަވެރިން ދުނިޔޭގެ އެކި ކަންކޮޅު ތަކުގައި ކޮމިއުނިޒަމްއާ ދެކޮޅަށް ހަނގުރާމަ ކުރީ، އެ ނުރައްކާ އެމެރިކާގެ އެތެރެއިން ފެންމަތި ވިޔަ ނުދިނުމަށް ކަމަށާއި، އެކަން ވިޔަ ނުދެއްވާނެ ކަމަށެވެ.

މީގެ އިތުރުން ކުރިއަށް އޮތް މިޑްޓާމް އިންތިޚާބާ ދިމާކޮށް ޓްރަމްޕް ވަނީ ޑިމޮކްރެޓިކް ޕާޓީގެ ވާއަތު ފިޔައިގެ ސިޔާސަތު ތަކަކީ ކެންސަރެއްގެ ގޮތުގައި ސިފަ ކުރައްވައި، އެކަން ބުރިކޮށްލަން ޖެހޭ ކަމަށް ވިދާޅުވެފައި އެވެ. ހަމަ އެހެންމެ، އީރާން އާއި ވެނެޒުއޭލާއާ ދެކޮޅަށް އެމެރިކާގެ އަސްކަރިއްޔާ އިން ހޯދި ކާމިޔާބީ ތަކަށް އަލިއަޅުއްވާލައްވައި، އެމެރިކާ އިން އީރާންގެ އަސްކަރިއްޔާ ފުނޑުފުނޑު ކޮށްލާފައިވާ ކަމަށް ޓްރަމްޕް ވިދާޅުވި އެވެ.

ގާތް ގަނޑަކަށް 45 މިނެޓަށް ދެމިގެން ދިޔަ މި ތަގުރީރަށް ފަހު، ދުނިޔޭގެ ރެކޯޑް މިންވަރަކަށް ބަޑި ބޭހުގެ ކުޅިވަރުތައް ވަނީ ކުރިއަށް ގެންގޮސްފައި އެވެ.

މި ހަރަކާތްތައް ކުރިއަށް ދިޔަ ވަގުތު އެމެރިކާގެ އިރުމަތީގެ ސަރަހައްދު ތަކަށް ވަނީ ގަދަ ހޫނެއް ކުރިމަތިވެފައި އެވެ. ވޮޝިންޓަންގެ ފިނި ހޫނު މިން ރެކޯޑު މިންވަރަކަށް މައްޗަށް ގޮސް، 39.4 ޑިގްރީ ސެލްސިއަސް އަށް އެރިއިރު، މޫސުމީ ނުރައްކަލުގެ އިންޒާރު 160 މިލިއަން މީހުންނަށް ވަނީ ނެރެފައި އެވެ. އަދި ބޯކޮށް ވާރޭ ވެހި، ގުގުރުމުގެ ސަބަބުން ނޭޝަނަލް މޯލް އަށް އެއްވެފައި ތިބި މީހުން ވަގުތީ ގޮތުން އެ ސަރަހައްދު ދޫކޮށް ދިއުމަށް ވެސް އެންގި އެވެ. ނަމަވެސް، ޓްރަމްޕް ވަނީ މޫސުން ގޯސް ވިޔަސް ތަގުރީރު ކުރިއަށް ގެންދަވާނެ ކަމަށް ވިދާޅުވެފައި އެވެ.

މި އުފާ ފާޅު ކުރުން ތަކުގެ ތެރެއިން ވެސް އެމެރިކާގެ ސިޔާސީ ބައިބައިވުންތައް ވަނީ ފެނިގެން ގޮސްފައި އެވެ.