8 އިސްލާމީ ގައުމަކުން މަސްޖިދުލް އަގްސާ ގައި އިޒްރޭލުން ހިންގާ އަމަލުތައް ކުށްވެރިކޮށްފި
އިރުމަތީ ގުދުސްގެ ތާރީޚީ އަދި ގާނޫނީ ހައިސިއްޔަތު ބަދަލުކޮށް، މަސްޖިދުލް އަގްސާގެ ހުރުމަތް ކަނޑަން އިޒްރޭލުން ހިންގާ އަމަލުތައް ބައިނަލްއަގުވާމީ ގާނޫނުތަކާ ޚިލާފު ކަމަށް ބުނެ އިސްލާމީ ގައުމުތަކުގެ ޚާރިޖީ ވަޒީރުން އެކަން ކުށްވެރިކުރައްވައިފި. އަގްސާގެ މުޅި ސަރަހައްދަކީ ހަމައެކަނި މުސްލިމުންގެ ތަނެއްކަން ކަށަވަރުކޮށްދެއްވަމުން، އިޒްރޭލުގެ އިސްތިއުމާރު ނިމުމަކަށް ގެނެސް ފަލަސްތީނުގެ މިނިވަން ދައުލަތެއް ގާއިމުކުރުމަށް ކުރާ މަސައްކަތަށް ވަޒީރުން ވަނީ ތާއީދު އާކުރައްވާފައި. އަދި މަސްރަހު ގޯސްވާ ފަދަ އަމަލުތައް ހުއްޓާލުމަށް ގޮވާލައްވައި، ސުލްހަ ގާއިމުކުރެވޭނީ ދެ ދައުލަތުގެ ހައްލުގެ މައްޗަށް ބިނާވެގެން ކަމަށްވެސް ވަޒީރުން ވިދާޅުވި.
މި ފޮޓޯއިން ފެންނަނީ 8 އެޕްރީލް 2026 ގައި ގުދުސްގެ ގަދީމީ ސިޓީގެ މަންޒަރެކެވެ. މަންޒަރުގައި ފެންނަނީ އަލްއަޤްޞާ މިސްކިތާއި އެ މިސްކިތުގެ ގުއްބު (ޑޯމް އޮފް ދަ ރޮކް). | އޭއެފްޕީ
ސައުދީ އަރަބިއްޔާ، އުރުދުން، ޔޫއޭއީ، ގަތަރު، އިންޑޮނޭޝިއާ، ޕާކިސްތާން، މިސްރު އަދި ތުރުކީވިލާތުގެ ޚާރިޖީ ވަޒީރުން އަންގާރަ ދުވަހު ވަނީ، އިޒްރޭލުގެ ސިފައިންގެ ހިމާޔަތުގައި ހަރުކަށި ޔަހޫދީ ވަޒަންވެރިން މަސްޖިދުލް އަގްސާގެ ހަރަމްފުޅަށް ވަދެގަންނަ ވަދެގަތުންތަކާއި، އެ ތަނުގެ ގޯތިތެރޭގައި އިޒްރޭލުގެ ދިދަ އުފުލައި ހިންގާ އަމަލުތައް ހަރުކަށި އިބާރާތުން ކުށްވެރިކުރައްވާފައެވެ. މިކަން ހާމަކޮށްފައިވަނީ ސައުދީ އަރަބިއްޔާގެ ފޮރިން މިނިސްޓްރީން އާންމުކުރި ބަޔާނެއްގައެވެ.
ޚާރިޖީ ވަޒީރުން ވިދާޅުވީ، މިފަދަ އަމަލުތަކަކީ ބައިނަލްއަގުވާމީ ގާނޫނުތަކާއި، އދ. ގެ ކަމާގުޅޭ ގަރާރުތަކާއި، އިސްތިއުމާރުކޮށްފައިވާ އިރުމަތީ ގުދުސްގައި ހުރި މުގައްދަސް ބިނާތަކުގެ ތާރީޚީ އަދި ގާނޫނީ ހައިސިއްޔަތާ ކަނޑައެޅިގެން ޚިލާފު އަމަލުތަކެއް ކަމަށެވެ.
މީގެ އިތުރުން، އިސްތިއުމާރުކޮށްފައިވާ އިރުމަތީ ގުދުސްގެ ތާރީޚީ، ގާނޫނީ އަދި އާބާދީގެ ސިފަ ބަދަލުކުރުމަށާއި، އެ ތަނުގައި ހުރި އިސްލާމީ އަދި ކްރިސްޓިއަން ދީނުގެ މުގައްދަސް ބިނާތަކުގެ ހުރުމަތް ކަނޑާލުމަށް އިސްރާއީލުން ރޭވުންތެރިކަމާއެކު މެދުނުކެނޑި ހިންގަމުންދާ އަމަލުތައް ވެސް ވަޒީރުން ވަނީ ކުށްވެރިކުރައްވާފައެވެ.
ގުދުސްއާއި އެ ތަނުގެ އިސްލާމީ އަދި ކްރިސްޓިއަން މުގައްދަސް ބިނާތަކުގެ ތާރީޚީ އަދި ގާނޫނީ ހައިސިއްޔަތު ބަދަލުކުރުމަށް ކުރާ އެއްވެސް މަސައްކަތެއް ބަލައިނުގަންނާނެ ކަމަށް ވަޒީރުން ވަނީ ތަކުރާރުކުރައްވާފައެވެ. އަދި އެ ތަންތަނުގެ ހައިސިއްޔަތު ދެމެހެއްޓުމަށް ގޮވާލައްވަމުން، މިކަމުގައި އުރުދުންގެ ހާޝިމީ ރަސްކަމުގެ އާއިލާއިން އަދާކުރާ ތާރީޚީ ބެލެނިވެރިކަމުގެ ދައުރު ވަނީ ފާހަގަކުރައްވާފައެވެ.
މަސްޖިދުލް އަގްސާ ނުވަތަ އަލް-ހަރަމް އަލް-ޝަރީފްގެ މުޅި ސަރަހައްދަކީ ހަމައެކަނި މުސްލިމުން އަޅުކަންކުރާ ތަނެއްކަން ވަޒީރުން ވަނީ ތަކުރާރުކޮށް ހަނދާންކޮށްދީފަ އެވެ. އަދި އެ ތަން ބެލެހެއްޓުމާއި މީހުން ވަދެނިކުމެވޭނެ އުސޫލުތައް ކަނޑައެޅުމުގެ ގާނޫނީ ބާރު އޮތް ހަމައެކަނި ފަރާތަކީ، އުރުދުންގެ މިނިސްޓްރީ އޮފް އަވްގާފް އެންޑް އިސްލާމިކް އެފެއާޒްގެ ދަށުން ހިންގާ "ޖެރޫސަލަމް އެންޑޯމަންޓްސް އެންޑް އަލް-އަގްސާ މޮސްކް އެފެއާޒް ޑިޕާޓްމަންޓް" ކަމަށް ވެސް ވަޒީރުން ވިދާޅުވިއެވެ.
މަސްރަހު ގޯސްވާ ފަދަ އަމަލުތައް ހުއްޓުވުމުގެ ޒިންމާ އިޒްރޭލުގެ ކަމާބެހޭ ފަރާތްތަކުން އުފުލަންޖެހޭނެ ކަމަށް ވަޒީރުން ވިދާޅުވިއެވެ. އަދި ތަކުރާރުކޮށް ހިންގާ މިފަދަ އަމަލުތަކުގެ ސަބަބުން މަސްރަހު ނުތަނަވަސްވެ، ހަރުކަށި ފިކުރު އިތުރުވެ، ސުލްހައަށް ކުރާ މަސައްކަތްތަކަށް ހުރަސްއެޅި، ބައިނަލްއަގުވާމީ ގާނޫނުތަކުގެ ދަށުން އިޒްރޭލުން އުފުލަންޖެހޭ އިލްތިޒާމްތަކާ ޚިލާފުވާކަމުގެ އިންޒާރު ވަނީ ދެއްވާފައެވެ.
އިޒްރޭލުން ހިންގާ "ޣައިރު ގާނޫނީ އަދި ފިތުނަވެރި" އަމަލުތައް ވަގުތުން ހުއްޓާލުމަށް ގޮވާލައްވަމުން، މަސްޖިދުލް އަގްސާގެ ތާރީޚީ އަދި ގާނޫނީ ހައިސިއްޔަތަށް އިހުތިރާމްކުރުމުގެ މުހިންމުކަން ވަޒީރުން ވަނީ ތަކުރާރުކުރައްވާފައެވެ.
ފަލަސްތީނުގެ ރައްޔިތުންނަށް ލިބިގެންވާ އަމިއްލަ އިޚްތިޔާރުގައި ގޮތް ނިންމުމުގެ ހައްގަށާއި، 1967 ވަނަ އަހަރުގެ ބޯޑަރުތަކުގެ މައްޗަށް ބިނާވެފައިވާ، އިރުމަތީ ގުދުސް ވެރިރަށެއްގެ ގޮތުގައި އޮންނަ މިނިވަން ދައުލަތެއް ގާއިމުކުރުމަށް ކުރާ މަސައްކަތަށް އޮތް ތާއީދު ވަޒީރުން ވަނީ އާކުރައްވާފައެވެ.
މީގެ އިތުރުން، އިޒްރޭލުގެ އިސްތިއުމާރު ނިމުމަކަށް ގެނައުމަށާއި، ބައިނަލްއަގުވާމީ ގާނޫނުތަކާއި، އދ. ގެ ގަރާރުތަކާއި، އަރަބި ސުލްހައިގެ އިސްނެގުމާ އެއްގޮތަށް "ދެ ދައުލަތުގެ ހައްލު" ގެ މައްޗަށް ބިނާވެފައިވާ އިންސާފުވެރި އަދި ދާއިމީ ސުލްހައެއް ގާއިމުކުރުމަށް ކުރެވޭ މަސައްކަތްތަކަށް އެ ބޭފުޅުން ވަނީ ތާއީދުކުރައްވާފައެވެ.
