މިފްކޯ އިން އައިސް ވިއްކުން ލިމިޓްކުރުމުން ކަންނެލި މަސްވެރިންނަށް ބޮޑެތި ގޮންޖެހުންތަކެއް ކުރިމަތިވެއްޖެ
6 ޖުލައި 2026 | ހޯމަ 13:56މިފްކޯއަށް މަސް ނުކިރާ ދޯނިފަހަރަށް ވިއްކާ އައިސްގެ މިންވަރު ދުވާލަކު ދެ ޓަނަށް މަދުކުރުމާ ގުޅިގެން، ބޮޑު ކަންނެލި މަސްވެރިންނަށް ބޮޑެތި ދަތިތަކަކާ ކުރިމަތިވެފައިވާތީ ބީކޭއެމްޔޫ އިން ކަންބޮޑުވުން ފާޅުކޮށްފި. އައިސް ޕްލާންޓްތަކުން ޚިދުމަތް ލިބުމުގައި ހުރި ހުރަސްތައް ނައްތާލައި، މަސްވެރިންނަށް ދަތިނުވާނެހެން އައިސް ލިބޭނެ އިންތިޒާމް ހަމަޖެއްސުމަށް އެ ޔޫނިއަނުން ވަނީ ސަރުކާރަށް ގޮވާލާފައި.
މިފްކޯގެ ސެންޓަރަކުން މަސްވެރިން އައިސް ގަނެގެން ގެންދަނީ: މިފްކޯ އިން ލިމިޓްކޮށް އަައިސް ވިއްކަން ފެށުމުން މަސްވެރިންނަށް ވަނީ ބޮޑެތި ދަތިތަކާ ކުރިމަތިލާން ޖެހިފަ. | މިފްކޯ
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސެންޓަރުތަކުން އައިސް ވިއްކާ އުސޫލަށް ގެނައި ބަދަލާއެކު، ބޮޑު ކަންނެލި މަސްވެރިކަން ކުރާ ފަރާތްތަކަށް އައިސް ހޯދުމުގައި ބޮޑެތި ދަތިތަކަކާ ކުރިމަތިލާން ޖެހިފައިވާތީ ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން ކަންބޮޑުވުން ފާޅުކޮށްފި އެވެ.
މިދިޔަ ޖޫން މަހުގެ 28 ވަނަ ދުވަހުން ފެށިގެން މިފްކޯ އިން ނިންމާފައިވަނީ އެ ކުންފުންޏަށް މަސް ނުކިރާ ދޯނިފަހަރަށް ދުވާލަކު ވިއްކާނީ އެންމެ ދެ ޓަނު އައިސް ކަމަށެވެ. ނަމަވެސް، އަމިއްލަ ކުންފުނިތަކާ އަޅާބަލާއިރު މިފްކޯއިން ކަންނެލި ގަންނަ އަގު ވަރަށް ބޮޑަށް ދަށްކުރުމުގެ ސަބަބުން، ގިނަ ކަންނެލި ދޯނިފަހަރުން މިފްކޯ އަށް މަސް ކިރުމުގެ ބަދަލުގައި މަސް ކިރަނީ އަމިއްލަ ކުންފުނިތަކަށެވެ. މިފްކޯގެ މި ނިންމުމުގެ ސަބަބުން މިފަދަ ދޯނިފަހަރަށް ބޭނުންވާ މިންވަރަށް އައިސް ނުލިބި، މަހަށް ފުރުމަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
މިކަމާ ގުޅިގެން ބީކޭއެމްޔޫ އިން ހޯމަ ދުވަހު ނެރުނު ނޫސްބަޔާނެއްގައި ބުނެފައިވަނީ، ކަންނެލި މަސްވެރިކަން ދަށްވެފައިވާ މި ދަނޑިވަޅުގައި، ރާއްޖޭގެ އެކި ސަރަހައްދުތަކުގައި ހުރި އައިސް ޕްލާންޓްތަކުން އައިސް ނުލިބުމަކީ މަސްވެރިންނަށް ލިބޭ ވަރަށް ބޮޑު ގެއްލުމެއް ކަމަށެވެ. އަދި ބައެއް ޕްލާންޓްތައް ހިންގުމަށް ބޭނުންވާ ތެޔޮ ނުލިބުމާއި އެހެނިހެން ސަބަބުތަކާ ހުރެ ޚިދުމަތް މެދުކެނޑިފައިވާކަން އެ ޔޫނިއަނުން ފާހަގަކުރެ އެވެ.
ބީކޭއެމްޔޫ އިން އިތުރަށް ބުނެފައިވަނީ، ދުވާލަކު ދެ ޓަނު އައިސްއަކީ ކަންނެލި މަސްވެރިކަން ކުރާ ދޯންޏަކަށް އެކަށީގެންވާ މިންވަރެއް ނޫން ކަމަށެވެ. އެހެންކަމުން، މި ޤަވާއިދު ބަދަލުކޮށް މަސްވެރިންނަށް ދަތިނުވާނެހެން އައިސް ލިބޭނެ އިންތިޒާމް ހަމަޖައްސައިދިނުމަށް އެ ޔޫނިއަނުން ވަނީ ސަރުކާރަށް ގޮވާލާފަ އެވެ.
ރާއްޖޭގެ ހުރިހާ ހިސާބަކުން ފަސޭހަކަމާއެކު އައިސް ލިބޭނެ ގޮތް ހަމަޖެއްސުމާއި، ބޮޑު ކަންނެލި ކިލޯއެއްގެ އަގު 80 ރުފިޔާ އަށް ވުރެ ދަށްނުވާނެހެން ހިފެހެއްޓުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. ނަމަވެސް، ވެރިކަމުގެ ދައުރުގެ ބޮޑުބައި ފާއިތުވެގެންދިޔައިރު މި ވަޢުދުތައް ނުފުއްދޭތީ މަސްވެރިންގެ މެދުގައި ވަނީ ނުތަނަވަސްކަން އުފެދިފަ އެވެ.
ހުޅުމާލެ އިން 49 ދޯންޏާއެކު ފެށި، ބޮޑު ކަންނެލި މަސްވެރިންގެ އިހުތިޖާޖުގެ ބައިވެރިން މާލެ އަށް
މަސްވެރިންގެ މިފަދަ ކަންބޮޑުވުންތައް ފާޅުކުރުމަށް މިދިޔަ އަހަރުގެ މަސްވެރިންގެ ދުވަހާ ދިމާކޮށް ބޭއްވި އިޙްތިޖާޖުވެސް، ރައީސް މުޢިއްޒުގެ ސަރުކާރުން ފުލުހުން ފޮނުވައިގެން ބާރުގެ ބޭނުންކޮށް ވަނީ ރޫޅާލާފަ އެވެ. އޭގެ އިތުރުން މުޒާހަރާގެ ބައެއް ބައިވެރިންގެ މައްޗަށް ދައުވާ ވެސް ކުރި އެވެ.
