ބޭންކުތަކަށް އަތާ، ފަޔާ ބޮލާ ބާނައިގެން އެތަންތަން ފުނޑާލަމުން ސަރުކާރުން އެ ދަނީ: ޣަފޫރު
މި ސަރުކާރުން ބޭންކުތަކުގެ ހިންގުމުގެ ތެރެއަށް އަތްބާނައި، އެ މުއައްސަސާތަކުގެ މިނިވަންކަން ގެއްލުވާލަމުންދާ ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ. ރައްޔިތުންނަށް ފާގަތިކަން ގެނެސްދޭނެ ކަމުގެ ވައުދާއެކު ވެރިކަމަށް އައި ނަމަވެސް، ގައުމުގެ އިގްތިސާދީ ހާލަތު ދަށަށް ގޮސް އަސާސީ ހިދުމަތްތައް ދިނުމުގައި ސަރުކާރު ފެއިލްވެފައިވާ ކަމަށް އޭނާ ފާހަގަކުރެއްވި. މީގެ އިތުރުން، ދައުލަތަށް ލިބޭ އާމްދަނީއަށް ވާނުވާ ނޭނގުމާއި ސަރުކާރުގެ ސިޔާސަތުތަކުގެ ސަބަބުން ރައްޔިތުން ބޮޑު މާޔޫސްކަމެއްގެ ތެރޭގައި ތިބިކަން ޣަފޫރު ވަނީ ފާހަގަކުރައްވާފަ.
ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ | ރާއްޖެ އެމްވީ
ރާއްޖޭގެ ބޭންކުތަކަށް މި ސަރުކާރުން އަތާ، ފަޔާ ބޯ ވެސް ބާނައިގެން އެތަންތަން ފުނޑާލަމުން ދާ ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
ރާއްޖެޓީވީ ގެ 'ޓީވީ ޓޯކް' ޕްރޮގްރާމްގައި ވާހަކަދައްކަވަމުން ޣަފޫރު ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ރައްޔިތުން މި ސަރުކާރު ގެނައުމަށް ވޯޓު ދިނީ އެ ރައްޔިތުންގެ ލާބަޔާ މަންފާއަށް ކަމަށާ ނަމަވެސް މިއަދު އެއިން އެއްވެސް ކަމެއް ނުވާ ކަމަށް މެންބަރު ވިދާޅުވި އެވެ.
ޣަފޫރު ވިދާޅުވީ އެއް ސަރުކާރުން އަނެއް ސަރުކާރަަށް ބަދަލުވެގެންދާއިރު ރައްޔިތުންނަށް ހެޔޮ ވެރިކަމަކާ ދިމާލަށް މަސައްކަތް ކުރަން ޖެހޭ ކަމަށެވެ. އެއީ އެކަން އަބަދު ވެސް އޮންނަ ގޮތް ކަމަށެވެ. އެމްޑީޕީ ސަރުކާރު ގެ ބައެއް ކަންކަމާ މެދު ރައްޔިތުން ހިތްހަމަ ނުޖެހި، ރައްޔިތުން ރައީސް ޑރ. މުހައްމަދު މުއިއްޒުގެ މި ސަރުކާރު ގެނައުމަށް ވޯޓު ދިނީ އޭރު އޮތް ސަރުކާރަށް ވުރެ ހުރިހާ ކަމެއް ރަނގަޅުވާން އެ ރައްޔިތުން ބޭނުންވެފައި ވުމުން ކަމަށް ޣަފޫރު ވިދާޅުވި އެވެ.
މި ސަރުކާރު އައީ އެ ގޮތަށް ވައުދު ވެގެން ކަން ފާހަގަ ކުރައްވާ މެންބަރު ވިދާޅުވީ އެ ވައުދުތަކާ އެއްކޮށް ހެޔޮ ބަދަލުތަކެއް ގެންނަން މަސައްކަތް ކުރަން ޖެހޭ ކަމަށެވެ މި ގައުމުގެ ރައްޔިތުން ބޭނުންވަނީ އެއްދުވަހުން އަނެއް ދުވަހަށް ރައްޔިތުންނަށް ކުރިއެރުމާ ފާގަތިކަމާ ލުއިފަސޭހަކަން އިޔާދަވެގެން ދިއުން ނަމަވެސް މިއަދު މި ފެންނަނީ ޖަމްޕެއް ޖަހާފައި ފަހަތަަށް ދާ މަންޒަރު ކަމަށެވެ.
ދެން އަބަދުވެސް ހަމަ ފިލްމު މި ކުޅެނީ ޑޮލަރު ލިބޭނެ އޭ ބޭނުން ވަރަކަށް ޓީޓީ ފޮނުވޭނެ އޭ. ބަލަ މިދިޔަ އެއްވެސް ސަރުކާރަކުން ނެތޭ އިއުލާނު ކޮށްފައެއް، ކްރެޑިޓް ކާޑަކުން މިހާވަރު ނެގޭނެއޭ، ޑެބިޓް ކާޑަށް މިވަރު ލިބޭނެ އޭ. ބޭހަށް ދާއިރު މިހާވަރު ލިބޭނެ އޭ. ޓީޓީ ފޮނުވަން 25 ޕަސެންޓޭ. އެއީ ސަރުކާރާ ބެހޭ ކަމެއް ނޫނޭ. ބޭންކު ތަކަކީ އޭގެ ޒާތުގަައި އެބޭފުޅުންގެ ބިޒްނަސް މޮޑެލްތަކަށް މަސައްކަތް ކުރަމުންދާ ތަންތަން. އެހެން ނަމަވެސް އަތާ ފަޔާ ބޮލާ ބާނައިގެން އެތަންތަން ވެސް ފުނޑާލަމުން މި ދަނީ.ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
މިއަދު މި ގައުމުގައި ރަނގަޅަށް ދާ އެއްވެސް ކަމެއް ނެތް ކަން ފާހަގަ ކުރައްވާ ޣަފޫރު ވަނީ ވަރަށް ބޮޑަށް ސަރުކާރުގެ ސިޔާސަތުތަކަށް ފާޑުވިދާޅުވެފަ އެވެ. އަދި ރައްޔިތުން މިއަދު ވަނީ ބޮޑު މާޔޫސްކަމެއްގައި ކަމަށް ވެސް ޣަފޫރު ވިދާޅުވި އެވެ.
އޭގެ އިތުރުން މިއަދު ދައުލަތަށް ލިބޭ ފައިސާ އަށް ވާ ގޮތެއް ވެސް ނޭނގޭ ކަމަށާ ރައްޔިތުންނަށް އެންމެ އަސާސީ ޚިދުމަތްތައް ދިނުުމުގައި ވެސް ސަރުކާރު ވަރަށް ބޮޑަށް ފެއިލްވެފައިވާއިރު ރައްޔިތުންނަށް އެއްވެސް ކަމެއްގައ ޖަވާބުދާރީ ނުވެވޭ ކަމަށް މެންބަރު ވިދާޅުވި އެވެ. އަދި ވިދާޅުވީ މި ސަރުކާރުން އެއްވެސް ކަމެއް ކުރަނީ ރައްޔިތުންނަށް ހެޔޮ އެދިގެން ނޫން ކަމަށާ ސިނގިރޭޓާ ދުންފަތުގެ އަގުތަކަށް ގެނައި ބަދަލުތަކުން ވެސް އެކަން ހާމަވާ ކަމަށެވެ.
