ޗައިނާ އިން އެފްރިކާ ގައުމުތަކުން ނަގާ ޑިއުޓީ އުވާލަނީ
އެފްރިކާގެ 53 ގައުމަކުން ޗައިނާ އަށް އެތެރެކުރާ މުދަލުން ނަގާ ޑިއުޓީ އަންނަ މެއި މަހުން ފެށިގެން ކަނޑާލުމަށް ނިންމައި، އެ ގައުމުން ވަނީ ވިޔަފާރީގެ ބޮޑު ލުޔެއް ދީފައި. ތައިވާނާއެކު ސިޔާސީ ގުޅުން ބާއްވާ އެސްވާޓީނީ ފިޔަވައި އެ ބައްރުގެ ހުރިހާ ގައުމަކަށް މި ފުރުސަތު ދިނުމަކީ، އެފްރިކާގެ ތަރައްގީއަށް ހުޅުވުނު އާ ދޮރެއް ކަމަށް ރައީސް ޝީ ޖިންޕިންގް ވިދާޅުވި.
އިތިއޯޕިއާގެ އެޑިސް އަބާބާގައި ހުންނަ އެފްރިކަން ޔޫނިއަންގެ އާ އިމާރާތްތަކުގެ މަސައްކަތުގައި، 2010 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ޗައިނާގެ ކޮންސްޓްރަކްޝަން މަސައްކަތްތެރިއަކު އިތިއޯޕިއާގެ މަސައްކަތްތެރިންނާއެކު ހަރަކާތްތެރިވަނީ. | ގެޓީ އިމޭޖަސް
ޗައިނާއިން އެފްރިކާގެ ގައުމުތަކުގެ ތެރެއިން އެއް ގައުމު ފިޔަވައި އެހެން ހުރިހާ ގައުމަކުން އެތެރެކުރާ މުދަލުން ނަގާ ޓެރިފް ނުވަތަ ޑިއުޓީ އަންނަ މެއި މަހުގެ އެއްވަނަ ދުވަހުން ފެށިގެން ކަނޑާލާނެ ކަމަށް އެ ގައުމުގެ ރައީސް ޝީ ޖިންޕިންގް ހޮނިހިރު ދުވަހު ވިދާޅުވެއްޖެ ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފި އެވެ.
އެފްރިކާގެ 33 ގައުމަކުން އެތެރެކުރާ މުދަލުން ޓެރިފް ނުނަގާ ގޮތަށް ޗައިނާ އިން މިހާރު ވެސް އަމަލުކުރަމުންދާއިރު، އެފްރިކާ ބައްރުގައި ޗައިނާ އާ އެކު ސިޔާސީ ގުޅުން ގާއިމުކޮށްފައިވާ ހުރިހާ ގައުމުތަކެއް ހިމެނޭހެން ޖުމްލަ 53 ގައުމަކަށް މި ސިޔާސަތު ފުޅާކުރާނެކަން ބެއިޖިންގް އިން މިދިޔަ އަހަރު ވަނީ އިއުލާންކޮށްފަ އެވެ.
ޗައިނާ އަކީ އެފްރިކާގެ އެންމެ ބޮޑު ވިޔަފާރި ބައިވެރިޔާގެ އިތުރުން، އެ ގައުމުގެ ފުޅާ "ބެލްޓް އެންޑް ރޯޑް" އިނީޝިއޭޓިވްގެ ދަށުން އެ ސަރަހައްދުގެ އުމްރާނީ ތަރައްގީގެ ބޮޑެތި މަޝްރޫއުތަކަށް އެންމެ ބޮޑަށް އެހީތެރިކަން ފޯރުކޮށްދޭ ގައުމުވެސް މެއެވެ.
މެއި މަހުގެ އެއްވަނަ ދުވަހުން ފެށިގެން އެފްރިކާގެ ހުރިހާ ގައުމަކުން އެތެރެކުރާ މުދަލުން ޓެކްސް ނެގުން ހުއްޓާލި ނަމަވެސް، ތައިވާނާއެކު ސިޔާސީ ގުޅުން ބާއްވަމުންދާ އެސްވާޓީނީ އަށް މި ލުއިތަކެއް ނުލިބޭނެ އެވެ.
ޑިމޮކްރެޓިކް އުސޫލުން ވެރިކަންކުރާ ތައިވާނަކީ ޗައިނާގެ އަމިއްލަ ބައެއްގެ ގޮތުގައި އެ ގައުމުން ދައުވާކުރާއިރު، ބާރުގެ ބޭނުންކޮށްގެން ނަމަވެސް އެ ރަށް ޗައިނާގެ ދަށަށް ގެންދިއުމުގެ ފުރުސަތު އޮތް ކަމަށް ބެއިޖިންގް އިން ބުނެ އެވެ.
އެމެރިކާގެ ރައީސް ޑޮނަލްޑް ޓްރަމްޕް މިދިޔަ އަހަރު މުޅި ދުނިޔެއަށް އަމާޒުކޮށް ބޮޑެތި ޓެރިފްތަކެއް ކަނޑައެޅުއްވި ފަހުން، އެފްރިކާގެ ގިނަ ގައުމުތަކަކުން ދަނީ ޗައިނާ އާއި އެހެނިހެން ވިޔަފާރި ބައިވެރިންނާއެކު އޮންނަ ގުޅުން އިތުރަށް ބަދަހިކުރަމުންނެވެ.
އެފްރިކާގެ އިއްތިހާދުގެ އަހަރީ ސަމިޓަށް އެ ބައްރުގެ ލީޑަރުން އިތިއޯޕިއާ އަށް ވަޑައިގެން ތިއްބަވަނިކޮށް، ޓެރިފް ކަނޑާލާނެ ތާރީޚު އިއުލާންކުރައްވަމުން ރައީސް ޝީ ވިދާޅުވީ، މި އެއްބަސްވުމުގެ ސަބަބުން އެފްރިކާގެ ތަރައްގީ އަށް އާ ފުރުސަތުތަކެއް ހުޅުވިގެންދާނެކަން ކަށަވަރު ކަމަށެވެ.
