ޕެސިފިކް ކަނޑުގެ ސަރަހައްދުން ހަ ޓަނަށްވުރެ ގިނަ ކޮކެއިން އެލް ސަލްވަޑޯ އިން އަތުލައިގަނެފި
އެލް ސަލްވަޑޯރުގެ ނޭވީން ހިންގި ޚާއްޞަ އޮޕަރޭޝަނެއްގައި 167 މިލިއަން ޑޮލަރުގެ ކޮކެއިން އަތުލައިގަނެ، ހަ މީހަކު ވަނީ ހައްޔަރުކޮށްފައި. މިއީ އެ ގައުމުގެ ތާރީޚުގައިވެސް އެއްފަހަރާ އެންމެ ގިނަ އަދަދެއްގެ މަސްތުވާތަކެތި އަތުލައިގަތް ފަހަރު ކަމަށްވާއިރު، މިއަހަރުގެ މިހާތަނަށް އެ ގައުމުން ވަނީ 332 މިލިއަން ޑޮލަރުގެ މަސްތުވާތަކެތި އަތުލައިގަނެފައި. މަސްތުވާތަކެތީގެ ވިޔަފާރިއާ ދެކޮޅަށް ކުރާ މަސައްކަތްތައް އިތުރަށް ވަރުގަދަކުރާނެ ކަމަށް އެލް ސަލްވަޑޯރުގެ ރައީސް ނަޖީބު ބުކޭލޭ ވަނީ ވިދާޅުވެފައި.
ޕެސިފިކް ކަނޑުގެ ސަރަހައްދުން ހަ ޓަނަށްވުރެ ގިނަ ކޮކެއިން އެލް ސަލްވަޑޯރގެ ކަމާބެހޭ އިދާރާތަކުން ވަނީީ އަތުލައިގަނެފައި. | އޭއެފްޕީ
ޕެސިފިކް ކަނޑުގެ ސަރަހައްދުން ހަ ޓަނަށްވުރެ ގިނަ ކޮކެއިން އަތުލައިގަނެފައިވާ ކަމަށް އެލް ސަލްވަޑޯރުގެ ރައީސް ނަޖީބު ބުކޭލޭ ހުކުރު ދުވަހު ވިދާޅުވެއްޖެއެވެ.
އެލް ސަލްވަޑޯރުގެ ނޭވީން މި މަސްތުވާތަކެތި ހޯދާފައިވަނީ ބުރާސްފަތި ދުވަހު ހިންގި އޮޕަރޭޝަނެއްގައެވެ. މި ތަކެތި ފެނިފައިވަނީ ވަކިވަކި ދެ އުޅަނދަކުން ކަމަށާއި، ކޮންމެ އުޅަނދެއްގައިވެސް ގާތްގަނޑަކަށް އެއްވަރަކަށް ކޮކެއިން ހުރި އިރު، ކޮންމެ އުޅަނދެއްގައި ތިން ފަޅުވެރިން ތިބި ކަމަށް ރިޕޯޓުތައް ބުނެއެވެ.
ރައީސް ބުކޭލޭ ވިދާޅުވި ގޮތުގައި އަތުލައިގަނެވުނު ކޮކެއިންގެ ޖުމްލަ އަގު ގާތްގަނޑަކަށް 167 މިލިއަން އެމެރިކާ ޑޮލަރަށް އަރާނެއެވެ. އަދި މިއީ އެ ގައުމުގެ ތާރީޚުގައިވެސް މިހާތަނަށް ހިންގުނު އެންމެ ކާމިޔާބު އޮޕަރޭޝަން ކަމަށާއި، މިއީ ގައުމީ އާ ރެކޯޑެއް ކަމަށްވެސް އޭނާ ސިފަކުރެއްވިއެވެ.
މި މައްސަލައާ ގުޅިގެން ޖުމްލަ ހަ މީހަކު ހައްޔަރުކޮށްފައިވާ ކަމަށްވެސް ރައީސް ވިދާޅުވިއެވެ.
މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސް ބުކޭލޭ ވިދާޅުވީ، މީގެ ކުރިން އެއްވެސް ބިރެއްނެތި މަސްތުވާތަކެތީގެ ވިޔަފާރި ހިންގަމުންދިޔަ ސަރަހައްދުތަކަށް އަމާޒުކޮށް، އެ ވިޔަފާރިއާ ދެކޮޅަށް ކުރާ ހަނގުރާމަ ވަރުގަދަކޮށް ކުރިއަށްގެންދާނެ ކަމަށެވެ.
މިއަހަރުގެ މިހާތަނަށް އެލް ސަލްވަޑޯރުން 13 ޓަނަށްވުރެ ގިނަ ކޮކެއިން އަތުލައިގަނެފައިވާ ކަމަށް ރައީސް އިތުރަށް ވިދާޅުވިއެވެ. މި ތަކެތީގެ އަގު ގާތްގަނޑަކަށް 332 މިލިއަން އެމެރިކާ ޑޮލަރަށް އަރާނެ ކަމަށް އަންދާޒާކުރެވެއެވެ.
