ސަރުކާރުން ސިނގިރޭޓް އަގު ކުޑަކުރުމުގެ ބަހަނާ: ގަރުނުގެ ބޮޑު ޖޯކު

"ހީނ، ހީނ ހަލާކެވެ. މީހުން އުނބަށް ވެސް ޖަހައެވެ. ކުރެވުނު ކަންކަން އަލުން ބަދަލުވެސް ކުރެއެވެ. އެކަމަކު މިއީ ބޮޑުވަރެކެވެ. މިއީ މުޅިން އެހެން ލެވެލް އެކެވެ. އަދި މޮޅީވެސް ކަންކަމުގައި ދައްކާ މޮޅެތި ބަހަނާއެވެ." މަގުމަތިން ދިމާވި ރައްޓެއްސަކު ފަށްޗަކަށް އަމުނާލިއެވެ. ހުއްޓުމެއްނެތި އެއް ނޭވާއިންނެވެ.

ވީ ކީއްހޭ އަހާލައިފީމެވެ. ދެންވެސް ދިނީ ހަމަ އޭގެ ޖަވާބެކެވެ. "ދައްކާން ވާނީ ދައްކާން ވާކަހަލަ ވާހަކަތާއެވެ. މީހުންނަށް ގަބޫލުވެސް ކުރެވޭ ޒާތުގެ ވާހަކަތާއެވެ. މިއީ ގަރުނުގެ ބޮޑު ޖޯކެވެ." އަސްލަށް ނުގޮސް އޭނާގެ ވާހަކަތައް އިތުރުކޮށްލިއެވެ.

ނިކަން ތިލަކޮށްލަ ދީބަލާށޭ އަދި ގެޓެއް ނުވިއޭ ބުނީމެވެ. ހީނލާފައި އަސްލުވެގެން އުޅޭގޮތް ބުނެދިނެވެ.

ބުންޏެވެ. ސިނގިރޭޓުން ނަގާ ޑިއުޓީ ބޮޑުކުރީ މީހުން އެބޯވަރު މަދުކުރާށެވެ. ދުންފަތުން ލިބޭ ގެއްލުން ކުޑަކުރާށެވެ. ދުޅަހެޔޮ ބަޔަކަށް ދިވެހިން ހަދާއަޅށެވެ. ވަރަށް ރީތި އެހާމެ ބަލައިގަނެވެނެފަދަ މަގްސަދަކެވެ. އެކަމަކު މިހާރު މިޖެހުނީ މުޅިން އެހެން ތަނެއްގައެވެ. އެއްކަލަ ސިނގިރޭޓުގެ އަގު ހެޔޮކުރަނީއެވެ. މީހަކު އެއްޗެއް ކިޔައިގެނެއް ނޫނެވެ. ހަމަ އެކަން ކުރި ސަރުކާރުން ބޭނުން ވެގެންނެވެ. އެކަމަކު ހެއްވާ ކަމަކީ އެކަމަށް ދެއްކި މޮޅު ބަހަނާއެވެ. ދުނިޔޭގެ ސިއްހަތު ޖަމްއިއްޔާއިން ދިން ލަފަޔަކަށް ކުރާ ކަމެކޯލައެވެ. އަޅެ ހިނި ނައްޔާ ދެރައެވެ. މިއީ ހަމަ ބޮޑު ޖޯކެކެވެ. ސިއްހަތު ކުރިއަރުވައި، ރަނގަޅު ސިއްހަތެއްގައި މީހުން ބައިތިއްބަން ހަދާފައި އޮންނަ ޖަމްއިއްޔާއަކުން ބައެއްގެ ސިއްހަތަށް ގެއްލުންވާނޭ އެއްޗެއްގެ އަގު ހެޔޮ ކުރާށޭ ބުންޏޭ ބުނުމަކީ ހަމަ އަސްލުވެސް ބޮޑު ޖޯކެކެވެ." އޭނާ ބުންޏެވެ.

އާދެ! އޭނާ އެބުނި ވާހަކަތަކަށް ކުޑައިކޮށް ނަޒަރު ހިންގާލީމެވެ. އޭނާ އެބުނާހެން ހަމަ ހުރެފާ ކުއްލިއަކަށް ދުންފަތާ ދުންފަތުން އުފައްދާ ބާވަތްތަކުގެ އަގު މިސަރުކާރުން ބޮޑުކުރިއެވެ. ވިދާޅުވީ ސިއްހަތަށް ގެއްލުންވިޔަ ނުދިނުމަށެވެ. ދުންފަތުގެ އިސްތިއުމާލް ކުރާ މީހުން މަދުކުރުމަށެވެ. އެބަދަލެއް ގެނައީކީ ދިރާސާއެއް ކޮށްފައެއް ނޫނެވެ. ދެން ވާނެ ގޮތަކާމެދު ހިސާބަކަށް ވިސްނާލާފައި ހެނެއްވެސް ހީއެއް ނުވެއެވެ. މީހުންގަނޑު ރުޅިގަދަވިއެވެ. ސަރުކާރަށް ބޮޑުފާޑު ކިއުންތަކެއް އަމާޒުވިއެވެ. އެކަމަކު ގަދަފައި ވިއްދާފައި ވިދާޅުވީ މިއީ އުނދަގޫ ނިންމުމެއް ކަމަށެވެ. ސިޔާސީގޮތުން ގެއްލުންވިއަސް ރައްޔިތުންނަށްޓަކައި އެކަން ކުރައްވާނެ ކަމަށެވެ. ރައްޔިތުންގެ ސިއްހަތު މުއިއްޒަށް މާ މުހިއްމު ކަމަށް ވިދާޅުވިއެވެ.

ސިނގިރޭޓުގެ އަގަށް އެގެނައި ބަދަލާއެކު ދެން ވާންފެށީ މާ ދެރަކަމެކެވެ. ފެންނާން ފެށީ ތަފާތު ކަންކަމެވެ. މުޅިންވެސް ފެށީ "އޮޅާ"ށެވެ. ސަރުކާރުން ޒުވާނުން ލައްވައި އޮޅަން ޖެއްސުވި ކަމަށް ބުނެއެވެ. ހަމަ އެއާއެކު ފޭކު އެތައް ސިނގިރޭޓަކާއި ދުންފަތުގެ ބާވަތްތައް އެތެރެކުރަން ފެށިއެވެ. އަގު ހެޔޮ އެއްޗެއް ގަންނަން ޒުވާނުން އޭގެ ކޮލިޓީއަކަށް ނުބެލިއެވެ. ގަނެވެން އޮތް އެއްޗެއް ގަނެގެން ބޯން ފެށިއެވެ. ލިބޭ ގެއްލުމަކަށް ހިސާބަކަށް ވެސް ބަލާލުމެއް ނެތިއެވެ.

އިސާހިތަކު ފޭކު ސިނގިރޭޓް ނުވަތަ އަގު ހެޔޮ ސިނގިރޭޓް ގެންނަ މީހުންގެ ހައްޓަކު ހޔެއްނެތެވެ. ގޯނި ގޯނީގައެވެ. ބޮޑެތި ކޮންޓޭނަރު ތަކުގައެވެ. ފަސޭހަ ކަމާއެކު މާލޭގެ ފިހާރަތަކުން އެތަކެތި ލިބެންފެށިއެވެ. ދަތިކަމެއް ނެތިއެވެ. ހިސާބަކަށް ގެންނަ މީހުން ފަޅާވެސް އެރިއެވެ. ބޮޑެތި ކުންފުނިތަކަކުން ގެންނަ އެއްޗެކެވެ. ހައްޔަރުވީ އާދައިގެ ކުދި ސޮރުމެން ތަކެކެވެ. މީހަކަށް ވައި ނޭޅެވޭ ހިސާބުގައި ހުރި ކޮންޓޭނަރުތަކުން ސިނގިރޭޓްތައް ނެރެ ހުސްވާއިރު ވެސް ރޭކާ ވެސް ނުލީއެވެ.

ވަގަށް ސިނގިރޭޓް އެތެރެކުރާވަރަށް އެތެރެކުރަނީއެވެ. ބޯ މީހުން ބޮނީއެވެ. ސަރުކާރުން ލަފާކުރި ވަރާ ގާތަށް ވެސް އެކަމުން މީހުން ދުރުވާތަނެއް ނުފެނުނެވެ. ރަސްމީ ހުއްދައާއެކު އެތެރެ ކުރާ ސިނގިރޭޓުން ލިބޭނޭކަމަށް އަންދާޒާކުރި ޓެކްސްއެއް ސަރުކާރަށް ލިބޭ ގޮތެއް ނުވިއެވެ. ބަޖެޓްގައި އެއިން ލިބޭނޭ ކަމަށް ހީކުރި މަންފާއެއް ލިބޭގޮތެއް ނުވިއެވެ. ބޮޑުތަނުން އަތަށް ގޮވީއެވެ. ސަރުކާރުން ރާގު ބަދަލުވީއެވެ. ސިނގިރޭޓުގެ އަގު ހެޔޮކުރުމުގެ ވާހަކަ ފަށައިގަތީ ދެނެވެ. އެކަމަކު އެކަމަށް އެދެއްކީ ރީތި މޮޅު ބަހަނާއެކެވެ. ދުނިޔޭގެ ސިއްހަތު ޖަމްއިއްޔާ (ޑަބްލިޔު އެޗް އޯ)އިން ލަފާ ދީގެންނެވެ.

އެކަމަކު ގިނަ ބަޔަކު ގަބޫލުކުރާ ގޮތުގައި ސަރުކާރުގެ އަސްލު މަގްސަދު ހާސިލް ކޮށްފިއެވެ. ސިނގިރޭޓްގެ އަގު ބޮޑުކުރީ އެހެން ވެގެންނެވެ. އޭގެ ފަހަތުގައި ވަނީ ސިއްރު އެޖެންޑާއެކެވެ. އެވާހަކަ އެގޮވާލީ ސިނގިރޭޓުގެ އަގު ހެޔޮކުރުމަށް ސަރުކާރުން މަޖިލީހަށް ހުށަހެޅި ބިލުގެ ބަހުސްގައި އިދިކޮޅު މެންބަރުންނެވެ.

އެވެރިން ތުހުމަތުކުރާ ގޮތުގައި ސިނގިރޭޓް އަގުބޮޑުކުރީ މައިގަނޑު ދެބޭނުމެއްގައެވެ. އެއް ބޭނުމަކީ ރަސްމީ ހުއްދައާ އެކު އެތެރެކުރާ ސިނގިރޭޓުން ޓެކްސްގެ ގޮތުގައި ބޮޑު އެއްޗެއް ނަގައި ސަރުކާރަށް ލިބޭ ފައިސާ އިތުރުކުރުމެވެ. އަނެއް ބޭނުމަކީ ސަރުކާރާ ގުޅުން އޮންނަ ބަޔަކު ލައްވައި ވަގަށް ސިނގިރޭޓް އެތެރެކޮށް ސަރުކާރަށް އެއިން ބައެއް އެޅުމެވެ. ނޫންނަމަ ސަރުކާރަށް އެހީވާ ބަޔަކު ވަގަށް ސިނގިރޭޓް އެތެރެކޮށްގެން މުއްސަނދި ކުރުވުމެވެ. އެތުހުމަތަށް ބާރުލިބޭ ހެކިތަކެއް އެބަހުއްޓެވެ. ފަސޭހައިން އެތެރެ ކުރެވުމެވެ. ހާމަކަން ބޮޑުކޮށް ފަސޭހައިން އެތަކެތި ދައުރު ކުރުމެވެ. އެތެރެކުރާ މީހުން އެތެރެކުރުމުގައި ހުރި ފަސޭހަތަކާއި އެތެރެކުރާ މީހުން ހިފޭނޭ ގޮތެއް ނުވުމެވެ. ނޫންނަމަ ހިފުނަސް ކުރެވޭ ބޮޑު ކަމެއް ނެތުމެވެ.

ކޮންމެއަކަސް މާ މޮޅު ވާހަކައެއް ދައްކައިގެން އަގުބޮޑުކުރި ސިނގިރޭޓުގެ އަގު ބޮޑުތަނުން ކުޑަކުރަން ނިންމީއެވެ. އަނެއްކާވެސް ބޮޑުކޮށް އުނބަށް ޖެހީއެވެ. އެކަމަކު ހެއްވާ މަޖާ ޖޯކެއްގެ ގޮތުގައެވެ. ދުނިޔޭގެ ސިއްހަތު ޖަމްއިއްޔާގެ ބޮލުގައި އަޅުވާފައެވެ. ސިއްހަތު ކުރިއަރުވަން އުފައްދާފައިވާ އެންމެ ބޮޑު ޖަމްއިއްޔާއިން، މީހުންގެ ސިއްހަތަށް ގެއްލުން ލިބޭނޭ ދުންފަތާ މީހުން ގާތްކުރެވޭނޭ ގޮތަށް ދެއްވި އިރުޝާދެއް ކަމަށް ބުނެއެވެ. ގަރުނުގެ ބޮޑު ޖޯކުގެ ގޮތުގައެވެ.