ކޮންގޯގެ ހޮސްޕިޓަލަކުން އެބޯލާ ޖެހިފައިވާ ބަލިމީހުންތަކެއް ހަތިޔާރުއެޅި ބަޔަކު ރަހީނުކޮށްފި

ކޮންގޯގެ އިރުމަތީ ސަރަހައްދުގައި ހުންނަ ހޮސްޕިޓަލަކަށް ހަތިޔާރު އެޅި ބަޔަކު ވަދެ، އެބޯލާ ބައްޔަށް ފަރުވާ ހޯދަމުންދިޔަ ހަ އަހަރުގެ ކުޑަކުއްޖަކާއި އެކުއްޖާގެ މަންމަ ރަހީނުކޮށްގެން ގެންދިޔަ މައްސަލައެއްގައި، އެ ދެމީހުން ހޯދުމުގެ މަސައްކަތް އެގައުމުގެ ކަމާބެހޭ ފަރާތްތަކުން ފަށައިފިއެވެ.

ބިއުޓެމްބޯ ސިޓީގެ ވަނަމަހިކާ ހޮސްޕިޓަލުން އެ ކުއްޖާ ގެންގޮސްފައިވަނީ ވަޅި ހިފައިގެން ތިބި "ވަރަށް ބޮޑަށް ރުޅި އައިސްފައި ތިބި" ބަޔަކު ކަމަށް، އެ ސަރަހައްދުގެ ސިއްހީ އޮފިޝަލެއް ކަމަށްވާ ޑޮކްޓަރު ލުބަމްބޯ މަބޯކޯ ގަސްޓަން ނެރުއްވި ބަޔާނެއްގައި ވިދާޅުވެފައިވެއެވެ.

އެ ކުއްޖާ ގެންދިޔަ މީހުންނަކީ އެ އާއިލާއާ ގުޅުން އޮތް ބައެއްކަން އަދި ސާފުނުވި ނަމަވެސް، މިހާރު ފެތުރެމުންދާ އެބޯލާ ބަލީގެ ސަބަބުން، ބައްޔަށް ފަރުވާދޭ މަރުކަޒުތަކާ މެދު އާންމުންގެ މެދުގައި ބިރުވެރިކަމާއި ޝައްކު އުފެދިފައިވާކަން ފާހަގަކުރެވެއެވެ.

ރޮއިޓާސް ނިއުސް އެޖެންސީއަށް ދެއްވި އިންޓަވިއުއެއްގައި ގަސްޓަން ވަނީ، އެ ކުއްޖާގެ ސިއްހީ ހާލަތު އިތުރަށް ގޯސްވެ، އާއިލާގެ އެހެން މީހުންނަށް ބަލި ފެތުރުމުގެ ފުރުސަތު އޮތުމުން، ވީ އެންމެ އަވަހަކަށް ސިއްހީ މަރުކަޒަކަށް ދިއުމަށް އެ ކުއްޖާގެ މަންމައަށް އިލްތިމާސް ކޮށްފައެވެ.

މިހާރު ފެތުރެމުންދާ އެބޯލާގެ ވަބާގައި މިހާތަނަށް 200 އެއްހާ މީހުން މަރުވެ، 840 މީހުންނަށް ބަލި ޖެހިފައިވާކަން ކަށަވަރުވެފައިވާއިރު، މި މުއްދަތުގެ ތެރޭގައި އެބޯލާއަށް ފަރުވާދޭ މަރުކަޒުތަކަށް އެކި ފަހަރު މަތިން ހަމަލާދީފައިވެއެވެ.

މިދިޔަ މަހު މޮންގްބްވާލޫ އަވަށުގެ ސިއްހީ މަރުކަޒެއްގައި މަރުވި މީހުންގެ ހަށިގަނޑުތައް ގެންދިއުމަށް އާންމުންގެ ބަޔަކު މަސައްކަތް ކުރުމުން، އެމީހުން ހުއްޓުވުމަށް ފުލުހުން ވަނީ ވައިގެ ތެރެއަށް ބަޑިޖަހާފައެވެ.

އޭގެ ދުވަސްކޮޅެއް ކުރިން، މޮންގްބްވާލޫގެ އިރުދެކުނުން 85 ކިލޯމީޓަރު (53 މޭލު) ދުރުގައި އޮންނަ ރަމްޕާރާގެ ހޮސްޕިޓަލެއްގައި، އެބޯލާ ޖެހިގެން މަރުވި ކަމަށް ބެލެވޭ މީހެއްގެ ހަށިގަނޑު ގެންދިއުމަށް ހުރަސް އެޅުމުން، އާންމުން ވަނީ އެތަނުގައި ހުރި އައިސޮލޭޝަން ޓެންޓުތަކުގައި ހުޅުޖަހާފައެވެ.

އެބޯލާ ޖެހިގެން މަރުވާ މީހުންގެ ހަށިގަނޑަކީ ބަލި ފެތުރުމުގެ ފުރުސަތު ވަރަށް ބޮޑު އެއްޗަކަށްވާއިރު، ވަޅުލުމަށް ހަށިގަނޑު ތައްޔާރުކުރާ ވަގުތަކީ ބަލި ފެތުރިގެން ދިއުމުގެ ނުރައްކާ އެންމެ ބޮޑުވާ ވަގުތެވެ.

"މިކަމާ ގުޅޭގޮތުން ރައްޔިތުންނަށް އެކަށީގެންވާ މައުލޫމާތެއް ލިބިފައެއް ނުވޭ. ހާއްސަކޮށް ދުރު ހިސާބުތަކުގައި ދިރިއުޅޭ ބައެއް މީހުން ގަބޫލުކުރާ ގޮތުގައި އެބޯލާއަކީ ބޭރުގެ ބަޔަކު އުފައްދައިގެން އުޅޭ ދޮގު ބައްޔެއް،" މިދިޔަ މަހު ބީބީސީއާ ވާހަކަދައްކަވަމުން އެ ސަރަހައްދުގެ ސިޔާސީ ބޭފުޅެއް ކަމަށްވާ ލޫކް މަލެމްބޭ މަލެމްބޭ ވިދާޅުވިއެވެ.

އޭނާ އިތުރަށް ވިދާޅުވީ، މިއީ އެންޖީއޯތަކާއި ހޮސްޕިޓަލްތަކުން ފައިސާ ހޯދުމަށް ކުރާ ކަމެއް ކަމަށް ބައެއް މީހުން ގަބޫލުކުރުމަކީ ވަރަށް ހިތާމަވެރި ކަމެއް ކަމަށެވެ.

މިފަހަރު ބަލި ފެތުރެން މެދުވެރިވީ އެބޯލާގެ ނާދިރު ބާވަތެއް ކަމަށްވާ "ބުންޑިބުގްޔޯ" ގެ ސަބަބުންނެވެ. މި ބާވަތަށް ހާއްސަ ވެކްސިނެއް މިހާތަނަށް އުފެއްދިފައި ނުވާއިރު، ވެކްސިނެއް ތައްޔާރުކުރުމަށް މަސްތަކެއް ނަގާފާނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ބުނެފައެވެ.

މި ބަލި މިހާރު އެންމެ ބޮޑަށް ފެތުރެމުންދަނީ އިޓޫރީ، ސައުތު ކީވޫ އަދި ނޯތު ކީވޫ ޕްރޮވިންސްގައެވެ. ހަ އަހަރުގެ އަންހެން ކުއްޖާ ހޮސްޕިޓަލުން ގެންގޮސްފައިވަނީ ހޯމަ ދުވަހު ނޯތު ކީވޫގައެވެ.

ބަލި ފެތުރުމުގެ މައި މަރުކަޒެއްގެ ގޮތުގައި އަދިވެސް އޮތީ އިޓޫރީ ޕްރޮވިންސެވެ.

ޑަބްލިއުއެޗްއޯ އިން އިންޒާރު ދީފައިވާ ގޮތުގައި، ކޮންގޯގެ އިރުމަތީގައި ހިނގަމުންދާ ދާޚިލީ ހަމަނުޖެހުންތަކުގެ ސަބަބުން އެބޯލާ ކޮންޓްރޯލް ކުރުމަށް ވަނީ ވަރަށް ބޮޑަށް ހުރަސް އެޅިފައެވެ. ނޯތު އަދި ސައުތު ކީވޫގެ ބޮޑު ބައެއް މިހާރު އޮތީ އެމް23 ކިޔާ ހަނގުރާމަވެރި ގްރޫޕެއްގެ ކޮންޓްރޯލްގެ ދަށުގައެވެ.