މެކްސިކޯގެ ކާމިޔާބާ ގުޅިގެން ބަނގުރާ ގަންނަ މީހުން އިތުރުވުމާ އެކު، ވިއްކާ މިންވަރު ކޮންޓްރޯލް ކުރަން ސަރުކާރުން ނިންމައިފި

ފީފާ ވޯލްޑް ކަޕްގެ ގަދަ 32 ވަނަ ބުރަށް މެކްސިކޯ ދަތުރު ކުރުމާ ގުޅިގެން  އެ ޤައުމުގެ މަގު ތަކުގައި އުފާ ފާޅު ކުރުމަށް ބޭއްވި ބޮޑެތި އެއްވުން ތަކާއި، ބަނގުރާ ގަންނަ މީހުން އިތުރުވެފައިވާތީ، ބަނގުރާ ވިއްކުން ކޮންޓްރޯލް ކުރުމަށް މެކްސިކޯގެ ސަރުކާރުން ނިންމައިފި އެވެ. 

މެކްސިކޯގެ ޤައުމީ ޓީމަށް ލިބުނު ކާމިޔާބީ ފާހަގަ ކުރުމަށް، މެކްސިކޯ ސިޓީގެ މެދު ތެރެއަށް 700،000 (ހަތް ލައްކަ) އަށް ވުރެ ގިނަ މީހުން އެއްވެފައިވާާއިރު، އާންމު މަސްލަހަތަށް ބުރޫ އަރާ ފަދަ ކަންތައް ތަކެއް ހިނގާފައިވާ ކަމަށް ވަނީ ރިޕޯޓު ކޮށްފައި އެވެ. 

ދެކުނު ކޮރެއާ އަތުން މެކްސިކޯ މޮޅުވުމާ އެކު، އެ ގައުމުގެ ގައުމީ ޓީމުގެ ފެހި ކުލައިގެ ޖާޒީތަކާއި "ލޫޗާ ލީބްރޭ" މާސްކުތައް އަޅައިގެން ތިބި އެތައް ހާސް ސަޕޯޓަރުންނެއް ވަނީ މަގު ތަކަށް ނުކުމެފައި އެވެ. ވާރޭގެ ތެރޭގައި ދިދަ ހޫރުވަމުންނާއި، ގައުމީ ސަލާމް ކިޔަމުން އަދި ވުވުޒެލާ ފުމެމުން ދިޔަ މި ސަޕޯޓަރުންގެ ސަބަބުން ސިޓީގެ މައި މަގު ތަކަށް ބޮޑެތި ގެއްލުން ތަކެއް ލިބިފައިވެ އެވެ.

ޖެހިގެން އައި ދުވަހުގެ ހެނދުނު ސިޓީގެ މައި މަގު ތަކުގެ ތެރޭގައި ހިމެނޭ ރިފޯމާ އެވެނިއު އޮތީ ކުނިން ފުރިފައި އެވެ. އަދި އެ ސަރަހައްދުގައި އިންދާފައި ހުރި ރީނދޫ ކުލައިގެ މާތައް ފައިދަށުވެ ހަލާކު ވެފައިވާއިރު، ކަމާ ބެހޭ އިދާރާ ތަކުން ވަނީ އެ ސަރަހައްދުން 40 ޓަނުގެ ކުނި ނަގާފައި އެވެ.

މެކްސިކޯ ސިޓީގެ ގަވަމަންޓް ސެކްރެޓަރީ ސޭސާ ކްރާވިއޯޓޯ ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، މިފަދަ ބޮޑެތި ހަރަކާތް ތަކުގެ ތެރޭގައި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަކީ ސަރުކާރުގެ ޒިންމާއެއް ކަމަށެވެ. އެގޮތުން މަގު މަތީގައި ގަވާއިދާ ހިލާފަށް ބާވަތް ތަކުގެ ބުއިންތައް ވިއްކުން ހުއްޓުވުމަކީ ކުރަން ޖެހޭ މުހިންމު ކަމެއްގެ ގޮތުގައި އޭނާ ފާހަގަ ކުރެއްވި އެވެ.

ކްރާވިއޯޓޯ ވިދާޅުވީ އެ ސަރަހައްދުގެ ރެސްޓޯރަންޓު ތަކާއި، ބާރު ތަކުން ކަސްޓަމަރުން ބުއިންތައް ހިފައިގެން ބޭރަށް ނުކުތުން ހުއްޓުވުމަށް އެދޭނެ ކަމަށާއި، ބޮޑެތި މެޗުތައް ފެށުމުގެ ކުރިން ކައިރީގައި ހުންނަ ފިހާރަ ތަކުން ބާވަތް ތަކުގެ ބުއިންތައް ވިއްކުން މަނާ ކުރުމަށް ވެސް މަޝްވަރާ ކުރަމުންދާ ކަމަށެވެ.

މީގެ އިތުރުން، އެއްވެފައިވާ މީހުން އެކި ސަރަހައްދު ތަކަށް ބަހާލުމަށްޓަކައި މިހާރު ހުރި 12 ބޮޑު ސްކްރީނުގެ އިތުރުން، އިތުރު ހަތް ސްކްރީން ސިޓީގެ އެކި ސަރަހައްދު ތަކުގައި ބެހެއްޓުމަށް ސަރުކާރުން ވަނީ ނިންމާފައި އެވެ. އަދި މަގުމަތީގައި ވިޔަފާރި ކުރާ މީހުން ބިޔަރު ވިއްކުން ހުއްޓުވުމަށްޓަކައި އިތުރު އޮފިޝަލުން ހަރަކާތްތެރި ވާނެ ކަމަށް ވެސް ސަރުކާރުން ބުނެފައިވެ އެވެ.

މީގެ އިތުރުން ކްރާވިއޯޓޯ އިތުރަށް ވިދާޅުވީ، ސަޕޯޓަރުން އުފާ ފާޅު ކުރުމަކީ މައްސަލައެއް ނޫން ކަމަށާއި، ނަމަވެސް މިންވަރަށް ވުރެ އިތުރަށް ބާވަތް ތަކުގެ ބުއިންތައް ބޭނުން ކުރުން ހުއްޓުވުމަށް ސަރުކާރުން ބާރު އަޅާނެ ކަމަށެވެ.

މިފަދަ ހާދިސާއެއް އެމެރިކާގެ ބޮސްޓަންގައި ވެސް ވަނީ ހިނގާފައި އެވެ. ވޯލްޑް ކަޕްގެ މެޗުތައް ބާއްވާ އެ ސިޓީގައި ސްކޮޓްލެންޑާއި ހެއިޓީ ބައްދަލުކުރި މެޗުން ސްކޮޓްލެންޑު މޮޅުވުމާ ގުޅިގެން، އެ ގައުމުގެ ސަޕޯޓަރުން ގިނަ އަދަދަކަށް ބިޔަރު ބުއިމުގެ ސަބަބުން ބައެއް ތަން ތަންތަނުން ބިޔަރު ހުސްވި ކަމަށް ރިޕޯޓު ކޮށްފައިވެ އެވެ.