މެކްސިކޯ ދެކުނު ކޮރެއާ ބަލިކޮށް ވޯލްޑް ކަޕް ނޮކައުޓް ސްޓޭޖަށް ކޮލިފައިވި ފުރަތަމަ ގައުމަކަށް

މެކްސިކޯގެ ގުއަޑަލަހާރާގައި ދެކުނު ކޮރެއާއާ ދެކޮޅަށް ކުޅުނު މެޗުން ހަނި ތަފާތަކުން މޮޅުވެ، 2026 ވަނަ އަހަރުގެ ވޯލްޑް ކަޕްގެ ނޮކައުޓް މަރުހަލާއަށް ކޮލިފައިވި ފުރަތަމަ ގައުމަކަށް މުބާރާތް ބާއްވާ އެއް ގައުމު ކަމަށްވާ މެކްސިކޯ ވެއްޖެއެވެ.

މި މެޗުގެ 50 ވަނަ މިނެޓުގައި ދެކުނު ކޮރެއާގެ ގޯލްކީޕަރު ކިމް ސުން-ގިއު އާއި އޭނާގެ ޓީމުގެ ކުޅުންތެރިޔާ ލީ ގީ-ހިއުކް އެކަކު އަނެކަކުގެ ގައިގައި ޖެހި، ކީޕަރު އަތުން ބޯޅަ ދޫވި ވަގުތު، މެކްސިކޯގެ މިޑްފީލްޑަރު ލުއިސް ރޯމޯ ވަނީ ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިގެން އެ ޓީމަށް ލީޑު ނަގައިދީފައެވެ.

މެޗުގެ 87 ވަނަ މިނެޓުގައި ދެކުނު ކޮރެއާއަށް ނަތީޖާ އެއްވަރުކުރުމަށް ރަނގަޅު ފުރުސަތެއް ލިބުނެވެ. ނަމަވެސް ޗޯ ގުއޭ-ސަންގް ގާތުން ފޮނުވާލި ބޯޅަ މެކްސިކޯގެ ކީޕަރު ރައުލް ރަންޖެލް ދިފާއުކުރިއިރު، އޭގެ ފަހުން ޔަންގް ހިއުން-ޖުން ފޮނުވާލި ބޯޅަވެސް ކީޕަރު ވަނީ ހުށިޔާރުކަމާއެކު ހުއްޓުވާފައެވެ.

އޭގެ ކުރިން، މެޗުގެ ކުރީކޮޅު ދެކުނު ކޮރެއާގެ ކެޕްޓަން ސޮން ހިއުން-މިން ކީޕަރު ރަންޖެލްގެ ބޯލުން މަތިން ފޮނުވާލި ބޯޅައެއް މެކްސިކޯގެ އެޑްސަން އަލްވަރޭޒް ވަނީ ގޯލްގެ ރޮނގުމަތިން ސަލާމަތްކޮށްފައެވެ. ނަމަވެސް ޓޮޓެންހަމްގެ ކުރީގެ ފޯވާޑް ސޮން އެ ބޯޅަ ފޮނުވާލިއިރު ހުރީ އޮފްސައިޑްގައެވެ.

މެޗުގެ ފުރަތަމަ ހާފުގައި މެކްސިކޯގެ ފަރާތުން ފެނުނު ދަށް ކުޅުމުގެ ސަބަބުން އެ ގައުމުގެ ސަޕޯޓަރުން ވަނީ ހާފް ޓައިމްގައި ނުރުހުން ފާޅުކޮށްފައެވެ. ނަމަވެސް ސަޕޯޓަރުންގެ ފޯރިގަދަ އަޑާއެކު ދެވަނަ ހާފުގައި ކުޅުން ރަނގަޅުކޮށް، 75 ވަނަ މިނެޓުގައި މެކްސިކޯގެ ރައުލް ހިމެނޭޒް އުނދަގޫ އެންގަލަކުން ފޮނުވާލި ހަމަލާއެއް ކޮރެއާގެ ކީޕަރު ވަނީ ދިފާއުކޮށްފައެވެ.

މީގެ އިތުރުން، ބަދަލު ކުޅުންތެރިއެއްގެ ގޮތުގައި ކުޅެން އެރި އޮބެޑް ވަރްގާސް ފޮނުވާލި ބާރު ހަމަލާއެއްވެސް ކޮރެއާގެ ކީޕަރު ކިމް ވަނީ ހުށިޔާރުކަމާއެކު މަތަކޮށްފައެވެ.

މި ނަތީޖާއާއެކު މެކްސިކޯއިން ވަނީ މި ފަހަރުގެ ވޯލްޑް ކަޕްގައި މިހާތަނަށް ކުޅުނު ހުރިހާ މެޗަކުން މޮޅުވެ، ގްރޫޕް އޭގެ އެއްވަނަ ޓީމުގެ ގޮތުގައި ހަވިއޭ އަގީރޭގެ އިރުޝާދުގެ ދަށުން ކުޅޭ ޓީމު ދެވަނަ ބުރަށް ދާނެކަން ކަށަވަރުކޮށްފައެވެ.

މީގެ މާނައަކީ މުބާރާތް ބާއްވާ މެކްސިކޯ ޓީމުގެ ގަދަ 32 ގެ މެޗާއި، ގަދަ 16 ގެ މެޗުވެސް ކުޅޭނީ މެކްސިކޯ ސިޓީގައެވެ. ގަދަ 16 ގައި މެކްސިކޯއާ ދެކޮޅަށް ނުކުންނާނީ ތޯމަސް ޓުޗެލްގެ އިރުޝާދުގެ ދަށުން ކުޅޭ އިންގްލެންޑް އެ ޓީމުގެ ގްރޫޕާއި ފުރަތަމަ ނޮކައުޓް މެޗުން މޮޅުވެއްޖެ ނަމައެވެ.

މި މެޗުން ބަލިވި ނަމަވެސް، ފުރަތަމަ މެޗުގައި ޗެކް ރިޕަބްލިކް އަތުން މޮޅުވެފައިވުމުން، ދެވަނަ ބުރަށް ދިއުމުގެ ފުރުސަތު ދެކުނު ކޮރެއާއަށް އަދި އެބައޮތެވެ.

ދެކުނު ކޮރެއާ ދެން ނުކުންނާނީ އަންނަ ބުރާސްފަތި ދުވަހު މޮންޓެރޭގައި ދެކުނު އެފްރިކާއާ ދެކޮޅަށެވެ. ހަމަ އެ ވަގުތު މެކްސިކޯ ސިޓީގައި ކުޅޭ ގްރޫޕްގެ ފަހު މެޗުގައި މެކްސިކޯ ބައްދަލުކުރާނީ ޗެކް ރިޕަބްލިކާއެވެ.