އެމްޑީޕީގެ ލީޑަރޝިޕުން ޤުރްއާން ކިޔަވަން އެދުނަސް އެކަމާ ދެކޮޅުހަދަން ޖެހޭ: ޖަނާބު
އެމްޑީޕީގެ ލީޑަރޝިޕުގެ މީހުން "އަލްޙަމްދު" ކިޔަން ބުންޏަސް އެކަމާ ދެކޮޅު ހަދަންޖެހޭނެ ކަމަށް ވިދާޅުވެ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު (ޖަނާބު) ދެއްކެވި ވާހަކަތަކަށް ބޮޑެތި ފާޑުކިޔުންތަކެއް އަމާޒުވެއްޖެ. ރަށްވެހިކަމުގެ ގާނޫނަށް ހުށަހެޅި އިސްލާހާ ގުޅޭ ބަހުސްގައި ޖަނާބު މިފަދަ މޭރުމަކުން ވާހަކަދެއްކެވިއިރު، މިއީ ދީނީ ކަންކަމާ ގުޅުވައިގެން މަސްލަހަތު ގެއްލޭ ގޮތަށް ދެއްކެވި ވާހަކައެއް ކަމަށް ބުނެ މީގެ ކުރިން ދީނީ އިލްމުވެރިޔާ ޑރ. މުޙައްމަދު އިޔާޟް ވެސް ވަނީ އޭނާއަށް ރައްދު ދެއްވާފަ. މަޖިލީހުގެ މި ބަހުސްގައި ސަރުކާރު މެންބަރުން ބިލުގެ މައުޟޫއަށް ވާހަކަދެއްކުމުގެ ބަދަލުގައި އިދިކޮޅު މެންބަރުންނަށް ޒާތީ ހަމަލާތައް ދެމުންދާކަން ފާހަގަކުރެވޭ.
ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ ޕީއެންސީ މެންބަރު އިބްރާހީމް މުޙައްމަދު (ޖަނާބު)، ހޯމަ ދުވަހުގެ ޖަލްސާގައި ރަށްވެހިކަމުގެ ގާނޫނަށް ހުށަހެޅިފައިވާ އިސްލާހާ މެދު ވާހަކަ ދައްކަވަނީ. | ރާއްޖެ އެމްވީ
އެމްޑީޕީގެ މިހާރުގެ ލީޑަރޝިޕުން ޤުރްއާންކިޔަވަން، ސޫރަތުލްފާތިޙާ ކިޔަވަން އެދުނު ކަމުގައި ވިޔަސް، އެކަމާ ދެކޮޅު ހަދަންޖެހޭ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ ޕީއެންސީ މެންބަރު އިބްރާހީމް މުޙައްމަދު (ޖަނާބު) ވިދާޅުވެއްޖެ އެވެ.
ހޯމަ ދުވަހު ބޭއްވުނު ރައްޔިތުންގެ މަޖިލީހުގެ ޖަލްސާގައި، ރަށްވެހިކަމުގެ ގާނޫނަށް ގެންނަ އިސްލާހާ ގުޅޭގޮތުން ވާހަކަދައްކަވަމުން ޖަނާބު ވިދާޅުވީ، އެމްޑީޕީގެ މިހާރުގެ ލީޑަރޝިޕުގެ ނިޔަތް ނުބައިކަމުން، އެމީހުން "އަލްޙަމްދު" ކިޔަން ބުންޏަސް އެކަމާ ދެކޮޅު ހަދަން ޖެހޭނެ ކަމަށެވެ.
އަޅުގަނޑުގެ ޢިއްޒަތްތެރި އަޚުންނާ އަޅުގަނޑުގެ ރައްޓެހި ހުރިހާ މެމްބަރުންނަށް އަޅުގަނޑު ދަންނަވާލާނީ އެމްޑީޕީގެ މި ވަގުތު މި އޮތް ލީޑަރޝިޕް އަލްޙަމްދު ކިޔަން ބުންޏަސް އެކަމާ އަޅުގަނޑުމެން ވާނެ ދެކޮޅު ހަދަން. ސަބަބަކީ އެމީހުންގެ ނިޔަތް ނުބައިކަމުން.މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު (ޖަނާބު)
މީގެ އިތުރުން، ރަށްވެހިކަމުގެ ގާނޫނަށް ހުށަހެޅިފައިވާ ދާއިމީ އެޑްރެސް ބަދަލުކުރާ ވާހަކައަށް ވެސް އޭނާ ވަނީ ދެކޮޅު ހައްދަވާފަ އެވެ. އޭނާ ވިދާޅުވީ އެ ބަދަލު ގެންނަން ޖެހޭ އެއްވެސް ސަބަބެއް ނެތް ކަމަށެވެ.
ރަށްވެހިކަމުގެ ގާނޫނަށް ހުށަހެޅިފައިވާ އިސްލާހާ މެދު މަޖިލީހުގެ ބަހުސް ހޫނުވެފައިވާ އިރު، ސަރުކާރު ހިންގާ ޕީއެންސީގެ ގިނަ މެންބަރުން ދަނީ ބިލުގެ މައުޟޫއަށް ވާހަކަ ދެއްކެވުމުގެ ބަދަލުގައި، އިދިކޮޅު އެމްޑީޕީގެ މެންބަރުންނަށް ޒާތީ ގޮތުން ބަހުގެ ހަމަލާތައް ދެމުންނެވެ.
ޖަނާބަކީ ރައީސް ޑރ. މުޙައްމަދު މުޢިއްޒުގެ ސަރުކާރަކީ ދީނީ ސަރުކާރެއްގެ ގޮތުގައި ދެއްކުމަށް އެންމެ ބޮޑަށް ވަކާލާތު ކުރައްވާ އެއް މެންބަރެވެ. ނަމަވެސް، މަޖިލީހުގެ ޖަލްސާތަކުގައި އިސްލާމްދީނާ ގުޅުވައިގެން މަސްލަހަތު ގެއްލޭ ފަދަ ވާހަކަ ދައްކަވާ މެންބަރެއްގެ ގޮތުގައި އޭނާ ވަނީ ފާހަގަވެފަ އެވެ. ރައްޔިތުންގެ ތެރެއިން ގިނަ ބަޔަކު ބުނަނީ، ހޯމަ ދުވަހުގެ ޖަލްސާގައި ޖަނާބު ދެއްކެވި ވާހަކަ އިން ދޭހަވަނީ ޕީއެންސީގެ މެމްބަރުންގެ ޖާލިހުކަަން ކަމުގަ އެވެ. އެގޮތުން އެމްޑީޕީ އިން ކިތަންމެ ރަނގަޅުކަމެއް ހުށަހެޅިޔަސް، ޕީއެންސީ އަކީ އެކަން ބަލައި ނުގަންނާނެކަން މިހާރު ޔަގީންވާކަމަށް ގިނަ ބަޔަކު ދަނީ ބުނަމުންނެވެ.
ޖަނާބުގެ މިފަދަ ވާހަކަތަކަށް ދީނީ ޢިލްމުވެރިޔާ ޑރ. މުޙައްމަދު އިޔާޟް ޢަބްދުއްލަޠީފް ވަނީ މީގެ ކުރިން ރައްދު ދެއްވާފަ އެވެ. ޑރ. އިޔާޟް ވިދާޅުވި ގޮތުގައި މި ސަރުކާރަކީ ދެއްކުންތެރިކަމުގައި ހައްދުފަހަނަޅާފައިވާ ސަރުކާރެކެވެ. އަދި ޖަނާބު ފަދަ މީހުން މެދުވެރިކޮށް ދީންވެރިކަން ދައްކައިގެން މީހުން ހައްލުވަން މަސައްކަތް ކުރިޔަސް، މިއީ ދީނީ ސަރުކާރެކޭ ބުނެވޭނެ ޖާގައެއް ނެތް ކަމަށް އޭނާ ވިދާޅުވި އެވެ. ޑރ. އިޔާޟް އިތުރަށް ނަސޭހަތްތެރިވެލެއްވީ، ކޮއްކޮގެ ފިރިމީހާގެ ވެރިކަން ދިފާއުކުރުމުގެ ބަދަލުގައި ހަގީގަތާ އެއްގޮތަށް ވާހަކަ ދެއްކުމަށެވެ.
