ހަނިމާދޫ އެއަރޕޯޓް ތަރައްގީކޮށްފައިވަނީ ބައިނަލްއަގުވާމީ ފްލައިޓުތައް އޮޕަރޭޓު ކުރެވޭ ފެންވަރަށް؛ ސަރުކާރުން ދަނީ އުތުރުގެ ތަރައްގީއަށް ހުރަސްއަޅަމުން: ފައްޔާޒް

ހދ. ހަނިމާދޫ އިންޓަނޭޝަނަލް އެއަރޕޯޓަކީ ބައިނަލްއަގުވާމީ ފްލައިޓުތައް އޮޕަރޭޓު ކުރެވޭނެ ފެންވަރަށް ތަރައްގީކޮށްފައިވާ ތަނެއް ކަމަށާއި، އެތަން ބޭނުންނުކޮށް ބޭއްވުމަކީ މި ސަރުކާރުން އުތުރުގެ ތަރައްގީއަށް އަޅަމުންދާ ހުރަހެއް ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، އެމްޑީޕީގެ ސަރުކާރުން ހަނިމާދޫ އެއަރޕޯޓު ތަރައްގީކޮށްފައިވަނީ އެއަރބަސް އޭ320 އަދި ބޮއިންގް 737 މަރުކާގެ ބޯޓުތައް އޮޕަރޭޓު ކުރެވޭނެ ފެންވަރަށް ކަމަށެވެ. މި ބޯޓުތަކަކީ އިންޑިއާ، ލަންކާ، ޔޫއޭއީ، ގަތަރު، ކުވެއިތު، ތައިލޭންޑް، މެލޭޝިއާ އަދި ސިންގަޕޫރަށް ސީދާ ދަތުރުތައް ކުރެވޭނެ ފެންވަރުގެ ބޯޓުތަކެއްކަން އޭނާ ފާހަގަކުރެއްވި އެވެ.

ފައްޔާޒް އިތުރަށް ވިދާޅުވީ، ޔޫރަޕާއި ޗައިނާ ފަދަ މަންޒިލްތަކުން އަންނަ ފަތުރުވެރިންނަށްވެސް އެ ގައުމުތަކުގެ އެއާޕޯޓުތަކުން ކަނެކްޓިންގ ފްލައިޓުތަކުގައި ހަނިމާދޫ އަށް ދަތުރުކުރެވޭނެ މަގު އޮތީ ތަނަވަސްވެފައި ކަމަށެވެ. ދުނިޔޭގެ ނިސްބަތުން އެންމެ ގިނަ ފަސިންޖަރުން އުފުލަނީ ނެރޯބޮޑީ އެއަރކްރާފްޓް ތަކުގައި ކަމަށްވާއިރު، މިވަގުތު ޑިމާންޑު ނެތް މިންވަރަށް ވައިޑްބޮޑީ އެއަރކްރާފްޓް ޖެއްސޭ ވަރަށް އިންވެސްޓު ކުރުމަކީ އިގުތިސޯދީ ގޮތުން ބުއްދިވެރި ކަމެއް ނޫން ކަމަށްވެސް އޭނާ ވިދާޅުވި އެވެ. ނަމަވެސް، ކުރިމަގުގައި ޑިމާންޑު އިތުރުވާ ދުވަހަކުން ރަންވޭ ބޮޑުކުރުމަށް ބޭނުންވާ ބިން މިހާރުވެސް އޮތީ ހަމަޖައްސާފައި ކަމަށް ފައްޔާޒް ވިދާޅުވި އެވެ.

މި ސަރުކާރުގެ ސިވިލް އޭވިއޭޝަން މިނިސްޓަރު މުޙައްމަދު އަމީން ދާދިފަހުން މަޖިލީހުގައި ވިދާޅުވެފައިވަނީ، ހަނިމާދޫއަށް ބޭރުގެ ފްލައިޓުތައް ނާންނަނީ ދިގު ދަތުރުތައް ކުރާ ބޮޑެތި ބޯޓުތައް ޖެއްސޭނެ އިންތިޒާމު ނެތުމުން ކަމަށެވެ. މި ވާހަކަތަކަށް ރައްދު ދެއްވަމުން ފައްޔާޒް ވިދާޅުވީ، އެއަރޕޯޓު ބޭނުންނުކޮށް ބޭއްވުމަކީ ބޮޑު ތިލަދުންމަތީގެ ފަތުރުވެރިކަމާއި، މަސްވެރިކަމާއި، ލޮޖިސްޓިކްސް ދާއިރާ ކުރިއެރުވުމަށް އެޅޭ ހުރަހެއް ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން، އިންޑިއާގެ އެގްޒިމް ބޭންކުގެ 136 މިލިއަން ޑޮލަރުގެ ކްރެޑިޓް ލައިންގެ ދަށުން ތަރައްގީކުރި މި އެއަރޕޯޓަކީ އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ ފެންވަރުގެ ތަނެކެވެ. މި މަޝްރޫއުގެ ދަށުން 2465 މީޓަރުގެ ދިގު ރަންވޭއަކާއި، 10,300 އަކަމީޓަރުގެ ޒަމާނީ ޓަރމިނަލެއްގެ އިތުރުން، އެއަރބަސްގެ 3 ބޯޓާއި އޭޓީއާރްގެ 6 މަތިންދާ ބޯޓް އެއްފަހަރާ ޕާކް ކުރެވޭނެ އޭޕްރަން އެއް ވަނީ ގާއިމުކޮށްފަ އެވެ.