ކޭޕް ވާޑުން 1-0 ގެ ނަތީޖާއަކުން އާޖެންޓީނާ ބަލިކުރާނެ ކަމަށް އެ ގައުމުގެ ރައީސް ވިދާޅުވެއްޖެ

ފީފާ ވޯލްޑް ކަޕްގެ ގަދަ 32 ގެ ބުރުގައި، އެންމެ ފަހުގެ ޗެމްޕިއަން އާޖެންޓީނާ ބަލިކޮށް ކޭޕް ވާޑުން އާ ތާރީޚެއް ލިޔާނެ ކަމަށް އެ ގައުމުގެ ރައީސް ހޯޒޭ މާރިއާ ނޭވޭސް ވިދާޅުވެއްޖެ އެވެ.

ބީބީސީއަށް ދެއްވި ޚާއްސަ އިންޓަވިއުއެއްގައި ރައީސް ނޭވޭސް ވިދާޅުވީ، ކޭޕް ވާޑުން 1-0 ގެ ނަތީޖާއަކުން އާޖެންޓީނާ ބަލިކުރާނެ ކަމަށް އޭނާ ގަބޫލުކުރައްވާ ކަމަށެވެ.

"އަޅުގަނޑުމެން ކުޅެނީ މޮޅުވާން..... އެ ޓީމެއްގެ ކިބައިގައި މޮޅުވުމުގެ ރޫހު ހުރިނަމަ، ކާމިޔާބީ ހޯދުމަކީ ކުރެވިދާނެ ކަމެއް. ކޭޕް ވާޑް ފަދަ ކުޑަ ގައުމަކުން އަބަދުވެސް މަސައްކަތް ކުރަންވާނީ އެގޮތަށް، އެއީ މީހުން ހައިރާންކޮށްލުމަށް،" ރައީސް ވިދާޅުވި އެވެ.

ރައީސް ނޭވޭސް މިހެން ވިދާޅުވީ، "ބްލޫ ޝާކްސް" ގެ ނަމުން މަޝްހޫރުވެފައިވާ ކޭޕް ވާޑާއި، "ލަ އަލްބިސެލެސްޓޭ" ގެ ނަމުން މަޝްހޫރު އާޖެންޓީނާގެ ގައުމީ ޓީމު މިއާމީގައި ބައްދަލުކުރާ މެޗުގެ ކުރިންނެވެ. މި މެޗު ކުޅުމަށް ހަމަޖެހިފައިވަނީ ހުކުރު ދުވަހުގެ ރޭ ޖީއެމްޓީ ގަޑިން 22:00 ގައެވެ.

އެޓްލާންޓިކް ކަނޑުގައި އޮންނަ 10 ރަށުގެ މައްޗަށް އެކުލެވޭ ކޭޕް ވާޑް މިއީ ވޯލްޑް ކަޕްގައި ވާދަކުރާ ފުރަތަމަ ފަހަރެވެ. އެ ގައުމުން މިހާރު ވަނީ މުބާރާތުގެ ނޮކައުޓް ބުރަށް ދަތުރުކުރި އެންމެ ކުޑަ ގައުމުގެ ޝަރަފާއެކު ދެވަނަ ފަހަރަށް ތާރީޚުން ޖާގަ ހޯދާފަ އެވެ.

ކޭޕް ވާޑުން ވަނީ މުބާރާތުގެ ފުރަތަމަ މެޗުގައި ވަރުގަދަ ސްޕެއިންއާ ވާދަކޮށް ލަނޑެއް ނުޖެހި އެއްވަރުކޮށްފަ އެވެ. އެ މެޗުގައި އެ ގައުމުގެ 40 އަހަރުގެ ގޯލްކީޕަރު ވޮޒީނިއާ ވަނީ މޮޅު ކުޅުމެއް ދައްކާފަ އެވެ. އޭގެ ފަހުން ދެ ފަހަރު ވޯލްޑް ކަޕް ކާމިޔާބުކޮށްފައިވާ އުރުގުއޭއާ ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ.

މިދިޔަ ހޮނިހިރު ދުވަހު ސައުދީ އަރަބިއްޔާއާ ބައްދަލުކުރި މެޗު ލަނޑެއް ނުޖެހި އެއްވަރުވުމާއެކު، ކޭޕް ވާޑުން ވަނީ ގްރޫޕް އެޗްގެ ދެވަނަ ޓީމުގެ ގޮތުގައި ނޮކައުޓް ބުރަށް ދަތުރުކޮށްފަ އެވެ. އެއީ ސްޕެއިން އަތުން އުރުގުއޭ ބަލިވުމާ ގުޅިގެންނެވެ.

އެ ގައުމުން މިހާރު ތައްޔާރުވަމުންދަނީ ލިއޮނަލް މެސީގެ އާޖެންޓީނާއާ ދެކޮޅަށް ނުކުތުމަށެވެ. ކޭޕް ވާޑަކީ މިހާރު ބޮޑެތި ޓީމުތައް ސިއްސުވާލުމުގެ ގާބިލުކަން ހުރި ޓީމެއްގެ ގޮތުގައި ވަނީ މަޝްހޫރުވެފަ އެވެ. ފީފާ ރޭންކިންއަށް ބަލާއިރު ދެ ގައުމުގެ ދެމެދުގައި 63 ރޭންކުގެ ފަރަގެއް އެބައޮތެވެ. އާޖެންޓީނާއަކީ ދުނިޔޭގެ އެއްވަނަ ޓީމަށް ވާއިރު، ކޭޕް ވާޑަކީ އެފްރިކާ ބައްރުގެ 13 ވަނަ ޓީމެވެ.

ކޭޕް ވާޑްގެ ވެރިރަށް ޕްރައިއާގައި ހުންނަވައި ބީބީސީއަށް ދެއްވި އިންޓަވިއުގައި އެ ގައުމުގެ ރައީސް ވިދާޅުވީ، ޓީމުގެ ކުޅުންތެރިންގެ ކިބައިގައި 100 އިންސައްތަ އިތުބާރާއި އުންމީދު އެބައޮތް ކަމަށާއި، އެ ކުޅުންތެރިން ދަނޑުމަތީގައި ފުރާނަ އަތަށްލައިގެން މަސައްކަތް ކުރާނެ ކަމަށެވެ. އެހެންކަމުން އާޖެންޓީނާ ބަލިކުރުމުގެ 100 އިންސައްތަ ފުރުސަތު އެބައޮތް ކަމަށް އެމަނިކުފާނު ވިދާޅުވި އެވެ.

"އަޅުގަނޑުމެން މި ވޯލްޑް ކަޕަށް އައީ އަމިއްލަ ތާރީޚެއް ލިޔަން، އެއީ ޗެމްޕިއަނުންނާ ކުރިމަތިލައިގެން،" ރައީސް ވިދާޅުވި އެވެ.

މިއީ ކޭޕް ވާޑްގެ ކޯޗު ޕެޑްރޯ ލެއިޓާއޯ ބްރީޓޯ، ނުވަތަ އާންމު ނަމުން ނަމަ "ބުބިސްޓާ" މިދިޔަ ހަފުތާ ބަންދުގައި ދެއްކި ވާހަކަތަކާ ދާދި އެއްގޮތް ވާހަކަތަކެކެވެ. ނޫސްވެރިންގެ ބައްދަލުވުމެއްގައި ގައުމީ ދިދަ އޮޅާލައިގެން ހުރެ ބުބިސްޓާ ބުނީ "އަޅުގަނޑުމެންނަށް ނުކުރެވޭނެ އެއްވެސް ކަމެއް ނޯންނާނެ" ކަމަށެވެ.

"އެންމެ ކުރީއްސުރެ ވެސް އަޅުގަނޑުމެން ބުނަމުން އައީ، އަޅުގަނޑުމެންގެ އެއް މަގްސަދަކީ މުޅި ދުނިޔެއަށް އަޅުގަނޑުމެންގެ ގައުމު ދައްކާލުން ކަމަށް،" ބުބިސްޓާ ބުންޏެވެ. އޭނާ އިތުރަށް ބުނީ މުބާރާތުގެ މިފަދަ މުހިންމު މަރުހަލާއެއްގައި އާޖެންޓީނާއާއި މެސީއާ ދެކޮޅަށް ކުޅެން ލިބުމަކީ، މެޗުގެ ނަތީޖާ ކޮންމެ ގޮތަކަށް ނިކުތް ނަމަވެސް، ގައުމަށް ލިބޭ ވަރަށް ބޮޑު ކުރިއެރުމެއް ކަމަށެވެ.

މިކަމާ ގުޅޭގޮތުން މިޑްފީލްޑަރު ޑެރޯއީ ޑުއާޓޭ ބުނީ އޭނާއަށް އިހުސާސް ކުރެވެނީ "ހުވަފެނެއްގެ ތެރޭގައި" އުޅެވޭހެން ކަމަށެވެ. ގަދަ 32 ގެ ބުރުގައި އާޖެންޓީނާއާ ދެކޮޅަށް ކުޅުމަކީ އުނދަގޫ ކަމަކަށް ވާނެކަން ގަބޫލުކުރާ ހާލު، އޭނާ ބުނީ "އިތުބާރު ކުރަންވާނެ" ކަމަށެވެ.

"ކޮންމެ ފަދަ ކަމެއްވެސް ވެދާނެ،" ޑުއާޓޭ ބުންޏެވެ.

ނަމަވެސް މެޗުން ބަލިވެއްޖެނަމަ ވާނީ ކިހިނެއް ހެއްޔެވެ؟ ކޭޕް ވާޑްގެ ރައީސް ނޭވޭސް ވިދާޅުވީ އެއީ ނާކާމިޔާބީއެއް ނޫން ކަމަށެވެ.

"ނަތީޖާ ކޮންމެ ގޮތަކަށް ނިކުތް ނަމަވެސް، އަޅުގަނޑުމެން ވޯލްޑް ކަޕުން ވަކިވާނީ އިސް އުފުލައިގެން ތިބެ، ހަވާލުކުރެވުނު މިޝަން ފުރިހަމަކުރެވުނު ކަމުގެ އިހުސާސާއެކު،" ރައީސް ވިދާޅުވި އެވެ.