އޭޝިޔާ ސަރަހައްދުން އެންމެ ގަދައަށް ހިމަބިހި ފެތުރޭ ގައުމުތަކުގެ ތެރޭގައި ރާއްޖެ!

އޭޝިޔާ ސަރަހައްދުން އެންމެ ގަދައަށް ހިމަބިހި ފެތުރޭ ގައުމުތަކުގެ ތެރޭގައި ދިވެހިރާއްޖެ ހިމެނިފައިވާ ކަމަށް ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެއްޖެ އެވެ.

ހިމަބިހި ފެތުރެމުންދާތީ ކަންބޮޑުވުންފާޅު ކުރައްވައި، ޑރ.ފައިސަލް އެކްސްގައި ވިދާޅުވީ މި ސަރަހައްދުގެ ގައުމުތަކުގެ ތެރެއިން ހިމަބިހި ގަދަޔަށް ފެތުރޭ ގައުމުތަކުގެ ލިސްޓުގައި މިއަހަރު ރާއްޖެ ހިމެނިފައިވާ ކަމަށެވެ. 

ރާއްޖެއަށް އަންނަ މަސައްކަތު މީހުންނަށް ވިސާ ދިނުމުގެ ކުރިން ހިމަބިހީގެ ވެކްސިން ފުރިހަމަކުރިތޯ ބަލަންޖެހޭކަން ފާހަގަކުރައްވައި ޑރ.ފައިސަލް ވިދާޅުވީ ފަތުރުވެރިންގެ ކިބައިން ފެންނަ އަލާމާތްތަކަށް ވެސް ސަމާލުކަން ދޭންޖެހޭ  ކަމަށެވެ. 

ހިމަބިހި ފެތުރިފައިވާ މިންވަރަށް އިޝާރާތް ކުރައްވައި ޑރ.ފައިސަލް ވިދާޅުވީ މިހާތަނަށް މި ބައްޔަށް 72 މީހުން ޕޮޒިޓިވް ވެފައިވާ ކަމަށާއި އޭގެތެރޭގައި 4 ކުޑަކުދިން ހިމެނޭ ކަމަށެވެ. އަދި ބާކީ ތިބި އެންމެންނަކީ، ވެސް 15 އަހަރާއި 35 އަހަރާ ދެމެދުގެ މީހުން ކަމަށް އޭނާ ވިދާޅުވި އެވެ. 

މީގެ އިތުރުން ޑރ.ފައިސަލް ވިދާޅުވީ ހިމަބިހި ނައްތާލެވިފައިވާ ލަންކާގައި 2023 ގައި ހިމަބިހި ފެތުރި ދޮޅު އަހަރު ވީއިރުވުސް ބަލި ކޮންޓުރޯލް ނުކުރެވުމުން 2024 ވަނަ އަހަރު އެގައުމަކީ ހިމަބިހި އަލުން ފެތުރޭ ގައުމަކަށް ނިންމާފައިވާ ކަމަށެވެ. 

މިގޮތް ރާއްޖެއަށް ނުވުމަށް އެންމެ މުހިންމު ކަމަކީ ހިމަބިހީގެ 2 ޑޯޒް 95 އިންސައްތަ އާބާދީއަށް ދިނުން ކަމަށް އޭނާ ވިދާޅުވި އެވެ. އަދި ބަލި ކޮންޓްރޯލް ކުރުމަށް ކުރާ މަސައްކަތަށް އާއްމު ރައްޔިތުން އެއްބާރުލުން ދީ ވެކްސިން ފުރިހަމަ ކުރުމަށް ޑރ.ފައިސަލް އިލްތިމާސް ކުރެއްވި އެވެ. 

ރާއްޖެ އަކީ 2017 ވަނަ އަހަރު ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅާފައިވާ ގައުމެކެވެ. ނަމަވެސް 2023 ވަނަ އަހަރު މި ބަލީގެ ބައެއް ކޭސްތައް ފެނުމަށްފަހު، މިއަހަރުގެ މިދިޔަ މަހުގެ ކުރީކޮޅުން ފެށިގެން ބަލި އަލުން ފެނި، ބަލި ޖެހޭ މީހުންގެ އަދަދު ދަނީ އިތުރުވަމުންނެވެ. އަދި ޖޫން މަހުގެ ތެރޭގައި ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ ވެކްސިން ދިނުމުގެ ޚާއްސަ ޕްރޮގްރާމެއް ފަށާފަ އެވެ.