ޒަމާނީ "ފްރީޒް ޓެކްނޮލޮޖީ" ބޭނުންކޮށްގެން ދިވެއްސެއްގެ ކިޑްނީ ޓިއުމަރު ކާމިޔާބުކަމާއެކު ނައްތާލައިފި

ގުރުދާ ނުވަތަ ކިޑްނީގައި އުފެދިފައިވާ ޓިއުމަރަކަށް ފަރުވާ ހޯދުމަށް އިންޑިއާއަށް ދިޔަ އުމުރުން 51 އަހަރުގެ ދިވެއްސަކު، "ފްރީޒް ޓެކްނޮލޮޖީ" ނުވަތަ "ކްރަޔޯއެބްލޭޝަން" ކިޔާ ޒަމާނީ ފަރުވާއަކަށްފަހު، ކާމިޔާބުކަމާއެކު އާންމު ދިރިއުޅުމަށް އެނބުރި އަތުވެއްޖެ އެވެ.

ކްރަޔޯއެބްލޭޝަން އަކީ ހަށިގަނޑުގެ ބޭރުފުށުން ބޮޑު އޮޕަރޭޝަނެއް ކުރުމުގެ ބަދަލުގައި، އިންތިހާއަށް ފިނިގަދަ މާއްދާއެއް (ލިކުއިޑް ނައިޓްރޯޖަން ނުވަތަ އާގަން ގޭސް ފަދަ) ބޭނުންކޮށްގެން ބަލިޖެހިފައިވާ ސެލްތަކާއި، ޓިއުމަރު ނުވަތަ ނާރުތައް ގަނޑުކޮށްލައިގެން ނައްތާލުމަށް ދޭ ފަރުވާއެކެވެ. މިއީ ކެންސަރު ބައްޔާއި، ހިތުގެ ބަލިތަކުގެ އިތުރުން ތަދު ކަނޑުވައިދިނުމަށް ދޭ ފަރުވާތަކުގައި ދުނިޔޭގެ އެކި ކަންކޮޅުތަކުގައި ފުޅާދާއިރާއެއްގައި ބޭނުންކުރާ އުސޫލެކެވެ.

އިންޑިއާގެ ލޯކަލް މީޑިއާ ރިޕޯޓެއް ގައިވާ ގޮތުން ކަނާތު ކިޑްނީގައި ދެ ސެންޓިމީޓަރުގެ ޓިއުމަރެއް ހުރި މި ދިވެހި ބަލިމީހާ އިތުރު ފަރުވާއަށް ފޮނުވާލެވުނީ އިންޑިއާގެ ތިރުވަނަންތަޕޫރަމްގައި ހުންނަ ކިމްސް ހެލްތަށެވެ. އާންމު ގޮތެއްގައި މިފަދަ ޓިއުމަރުތައް ނައްތާލަނީ އޮޕަރޭޝަން ކޮށްގެން ކަމަށްވީ ނަމަވެސް، އެ ބަލިމީހާއަކީ ހިތުގެ ބޮޑެތި ބަލިތަކެއް ހުރި މީހަކަށް ވުމުން، އޮޕަރޭޝަން ކުރުމަކީ އޭނާގެ ފުރާނައަށް ނުރައްކާވެދާނެ ކަމެއްގެ ގޮތުގައި ޑޮކްޓަރުން ފާހަގަކުރި އެވެ.

ބަލިމީހާގެ ހާލަތު ދިރާސާކުރުމަށްފަހު، ކިމްސް ހެލްތުގެ ނިއުރޯ އިންޓަވެންޝަނަލް ރޭޑިއޮލޮޖީގެ ސީނިއާ ކޮންސަލްޓަންޓް ޑރ. މަނީޝް ކުމާރު ޔާދަވް އިސްކޮށް ހުންނަވައިގެން ނިންމެވީ، އެންމެ ރައްކާތެރި އަދި އެންމެ ނަތީޖާ ރަނގަޅު ގޮތަކީ ކްރަޔޯއެބްލޭޝަން ފަރުވާ ދިނުން ކަމަށެވެ.

މި ފަރުވާ ކުރިއަށް ގެންދިޔަ ގޮތަށް ބަލާއިރު، ސްކޭން މެޝިނެއްގެ އެހީގައި ޓިއުމަރު ހުރި ސަރަހައްދު ދެނެގަނެ، އެ ޓިއުމަރުގެ ތެރެއަށް ހާއްސަ ކަށިތަކެއް ވައްދައި، އެ ކަށިތަކުގެ ތެރެއިން އާގަން ގޭސް ދައުރުކުރިއެވެ. މީގެ ސަބަބުން ޓިއުމަރުގެ ފިނިހޫނުމިން ގަނޑުވާ މިންވަރަށް ދަށްވެ، ޓިއުމަރުގެ ވަށައިގެން "އައިސް ބޯލް" އެއް ނުވަތަ ގަނޑުފެން ބޯޅައެއް އުފެދިގެންދެއެވެ. މިއާއެކު، ކިޑްނީގެ ދުޅަހެޔޮ ބައިތަކަށް އެއްވެސް ގެއްލުމެއް ނުދީ، ހަމައެކަނި ޓިއުމަރުގެ ސެލްތައް ނައްތާލެވުނެވެ.

"މި ފަރުވާގެ ކާމިޔާބީން އެނގިގެންދަނީ، ހަށިގަނޑުގެ ގުނަވަންތަކަށް ގެއްލުން ނުދީ އަދި ބޮޑެތި އޮޕަރޭޝަންތަކާ ނުލައި ދޭ ފަރުވާތަކުގެ މުހިންމުކަން އިތުރުވަމުންދާ މިންވަރު. ކްރަޔޯއެބްލޭޝަންގެ އެހީގައި ކިޑްނީއަށާއި އޭގެ މަސައްކަތްތަކަށް އެއްވެސް ބުރޫއެއް ނާރުވައި ޓިއުމަރަށް ފަރުވާދެވި، ބަލިމީހާ އަވަހަށް ފަސޭހަވާނެކަން ކަށަވަރުކުރެވުނު،" ޑރ. ޔާދަވް ވިދާޅުވި އެވެ.

ޑޮކްޓަރުން މައުލޫމާތު ދެއްވި ގޮތުގައި، ހޮސްޕިޓަލުގައި ތިން ދުވަހު ބޭއްވުމަށްފަހު އެ ބަލިމީހާ މިހާރު ވަނީ ދޫކޮށްލާފަ އެވެ. އަދި އޭނާ މިހާރު އަންނަނީ އާންމު ދިރިއުޅުމުގެ ކަންކަން ކުރަމުންނެވެ. ޕްރޮސީޖަރަށް ގަޑިއެއްހާ އިރު ހޭދަވި ކަމަށް ޑޮކްޓަރުންނާ ހަވާލާދީ ރިޕޯޓުކޮށްފައިވެ އެވެ.