ކުދިން މަސްތުވާތަކެތި ބޭނުންކުރޭތޯ ބެލުަމަށް ބެލެނިވެރިންނަށް ޓެސްޓް ކުރެވޭ ގޮތް ހެދުމަށް ސްރީ ލަންކާ ސަރުކާރުން ނިންމައިފި
މަސްތުވާތަކެތީގެ ވަބާ ނައްތާލުމަށްޓަކައި މުއައްސަސާތައް ގުޅިގެން ގައުމީ ފެންވަރުގެ ޕްލޭނެއް ތަންފީޒުކުރުމަށް ރައީސް އަނޫރާ ކުމާރާ ދިސާނަޔަކަ ވަނީ އިރުޝާދު ދެއްވާފައެވެ. މިގޮތުން ސްކޫލްތަކުގައި ހޭލުންތެރިކުރުވުމުގެ ޕްރޮގްރާމްތައް ފުޅާކުރުމާއި، މަސްތުވާތަކެތި އެތެރެކުރުން ހުއްޓުވުމަށް ގާނޫނުތަކަށް އިސްލާހު ގެނައުމަށް "އޭ ނޭޝަން ޔުނައިޓެޑް" ކައުންސިލުން ވަނީ ނިންމާފައެވެ. މީގެ އިތުރުން ތަހުގީގުތައް އަވަސްކުރުމަށް ލެބޯޓްރީގެ ހިދުމަތްތައް ފުޅާކުރުމާއި، ރިހެބިލިޓޭޓް ކުރުމާ ބެހޭ އާ ގާނޫނެއް ގެޒެޓްކުރުމުގެ މަސައްކަތް ވެސް ދަނީ ކުރަމުންނެވެ.
ކޮލަމްބޯގައި 2025 ނޮވެމްބަރު 7 ވީ ހުކުރު ދުވަހު ބޭއްވި ޕާލަމަންޓްގެ ޖަލްސާގައި، ސްރީލަންކާގެ ރައީސް އަނޫރާ ކުމާރާ ޑިސަނަޔަކަ (ވ) އެ ގައުމުގެ 2026 ވަނަ އަހަރަށް ލަފާކުރާ ބަޖެޓް ހުށަހަޅުއްވަނީ | ގެޓީ އިމޭޖަސް
ސްރީލަންކާގައި މަސްތުވާތަކެއްޗާ ދެކޮޅަށް ގައުމީ ފެންވަރުގައި ކުރިއަށްގެންދާ މަސައްކަތްތަކުގެ ދަށުން، ކުދިން މަސްތުވާތަކެތި ބޭނުންކުރޭތޯ ބެލެނިވެރިންނަށް އަމިއްލައަށް ޗެކްކުރެވޭނެ ގޮތް ހެދުމަށްޓަކައި، ފާމަސީތައް މެދުވެރިކޮށް "ޑްރަގް ޓެސްޓިންގ ކިޓް" ތައާރަފުކުރުމަށް ސަރުކާރުން ނިންމައިފި އެވެ.
މަސްތުވާތަކެތީގެ ވަބާ ނައްތާލުމަށް އުފައްދާފައިވާ "އަ ނޭޝަން ޔުނައިޓެޑް" ނޭޝަނަލް ސްޓިއަރިންގ ކައުންސިލްގެ ބައްދަލުވުމުގައި މި ހުށަހެޅުމާ ބެހޭގޮތުން ވަނީ މަޝްވަރާކޮށްފަ އެވެ. މި ބައްދަލުވުމުގެ ރިޔާސަތު ބެލެހެއްޓެވީ ސްރީލަންކާގެ ރައީސް އަނުރަ ކުމާރާ ޑިސަނަޔަކެ އެވެ.
މި ބައްދަލުވުމުގައި ރައީސް ޑިސަނަޔަކެ ވިދާޅުވީ، މަސްތުވާތަކެތީގެ ވަބާ ނައްތާލުމަށްޓަކައި ކަމާބެހޭ ހުރިހާ މުއައްސަސާތަކެއް ގުޅިގެން ގައުމީ ފެންވަރުގެ ޕްލޭނެއް ތަންފީޒުކުރަން ޖެހޭ ކަމަށެވެ. އަދި ކޮންމެ މުއައްސަސާއަކުން ކުރިއަށްގެންދާ ޕްރޮގްރާމްތަކާއި ހަވާލުކުރެވިފައިވާ ޒިންމާތަކުގެ ކުރިއެރުމާ ބެހޭ ރިޕޯޓުތައް، ކައުންސިލްގެ ދެން އޮންނަ ބައްދަލުވުމަކަށް ހުށަހެޅުމަށް ރައީސް ވަނީ އަމުރުކުރައްވާފަ އެވެ.
ސްރީ ލަންކާގެ މީޑިއާ ރިޕޯޓުތައް ބުނާ ގޮތުގައި ސްކޫލް ކުދިންގެ މެދުގައި މަސްތުވާތަކެތި ބޭނުންކުރުން ހުއްޓުވުމަށް މި ބައްދަލުވުމުގައި ހާއްސަ ސަމާލުކަމެއް ދީފައިވެ އެވެ. އެގޮތުން މުދައްރިސުންނާއި ދަރިވަރުންނަށް އަމާޒުކޮށްގެން މިހާތަނަށް 225 ހޭލުންތެރިކުރުވުމުގެ ޕްރޮގްރާމް ހިންގާފައިވާ ކަމަށާއި، ޔުނިވަރސިޓީތަކުގައި ދަރިވަރުންގެ "ޕިއަރ ގްރޫޕް" ތައް އުފައްދައިގެން މަސްތުވާތަކެއްޗާ ދެކޮޅަށް ކެމްޕޭންތައް ކުރިއަށްގެންދާ ކަމަށް އޮފިޝަލުން ވިދާޅުވި އެވެ. މީގެ އިތުރުން، ސްކޫލްތަކުން މަސްތުވާތަކެތި ނައްތާލުމުގެ މަސައްކަތްތައް ވިލަރެސްކުރުމަށް އެޑިއުކޭޝަން މިނިސްޓްރީގެ ދަށުން ކޮމިޓީއެއް އުފެއްދުމަށާއި، ސްކޫލް ނިޒާމުގެ ތެރޭގައި މަސްތުވާތަކެތި ފެތުރިފައިވާ މިންވަރު ބެލުމަށް މުޅި ގައުމުގައި ސާވޭއެއް ކުރިއަށްގެންދިއުމަށް ސްރީ ލަންކާގެ ރައީސް އިރުޝާދު ދެއްވި ކަމަށް ވެސް ރިޕޯޓުކޮށްފައިވެ އެވެ.
އަތުލައިގަނެވޭ މަސްތުވާތަކެތި ނައްތާލުން އަވަސްކުރުމަށްޓަކައި ހަދާ އާ ގާނޫނުތަކާއި، އޮޓޮމޭޓެޑް ނިޒާމެއްގެ ދަށުން ކޯޓުތަކުގެ އެގްޒިބިޓްސް ބެލެހެއްޓުން ހަރުދަނާކުރުމާއި، ތަހުގީގުތައް ލަސްވުން ހުއްޓުވުމަށްޓަކައި ލެބޯޓްރީގެ ހިދުމަތްތައް އެކި ސަރަހައްދުތަކަށް ފުޅާކުރުމާ ބެހޭގޮތުން ވެސް މި ބައްދަލުވުމުގައި މަޝްވަރާކުރެވުނެވެ. އަދި މަސްތުވާތަކެއްޗަށް ދެވިހިފާފައިވާ މީހުން ރިހެބިލިޓޭޓް ކުރުމާ ބެހޭ ގާނޫނުގެ ދެލިކޮޕީ މިހާރު ނިމިފައިވާ ކަމަށާއި، ވަރަށް އަވަހަށް އެ ގާނޫނު ގެޒެޓްކުރެވޭނެ ކަމަށް އޮފިޝަލުން ވިދާޅުވި އެވެ.
މަސްތުވާތަކެތި އެތެރެކުރުން ހުއްޓުވުމަށްޓަކައި ކަނޑުގެ ސަރަހައްދުގައި ކުރިއަށްގެންދާ އޮޕަރޭޝަންތައް ވަރުގަދަކުރުމަށާއި، ޕޮލިސް ނާކޮޓިކްސް ބިއުރޯ އާއި ގަވަރމަންޓް އެނަލިސްޓް ޑިޕާޓްމަންޓްގެ ގާބިލްކަން އިތުރުކުރުމަށް ވެސް ކަމާބެހޭ ފަރާތްތަކުން ވަނީ މަޝްވަރާކޮށްފަ އެވެ. މީގެ އިތުރުން، މަސްތުވާތަކެތީގެ ވިޔަފާރިކުރުމަށް ބޭނުންކުރާ އުޅަނދުފަހަރާއި، ގިނަ ދުވަހު ކަނޑުމަތީގައި އުޅޭ މަސްވެރި އުޅަނދުތައް ދައުލަތަށް އަތުލުމަށް މަގުފަހިވާނެ ގޮތަށް ގާނޫނަށް އިސްލާހު ގެނައުމަށް ވެސް ސްރީ ލަންކާ ސަރުކާރުން ވަނީ ނިންމާފަ އެވެ.
މަސްދަރު: ޑެއިލީ މެއިލް
