ސްރީލަންކާގައި ތެލުގެ އަގު ހެޔޮކޮށްފި

ސިލޯން ޕެޓްރޯލިއަމް ކޯޕަރޭޝަން (ސީޕީސީ) އިން ވިއްކާ ތެލުގެ ބައެއް ބާވަތްތަކުގެ އަގު ޖޫން މަހުގެ 29 ވަނަ ދުވަހުގެ ރެއިން ފެށިގެން ހެޔޮކޮށްފި އެވެ.

މި ބަދަލާއެކު، އޮކްޓޭން 92 ޕެޓްރޯލް ލިޓަރަކުން 20 ރުޕީސް ވަނީ ހެޔޮކޮށްފަ އެވެ. އެހެންކަމުން، މިހާރު އޮކްޓޭން 92 ޕެޓްރޯލް ލިޓަރެއް ރީޓެއިލްކޮށް ލިބޭނީ 414 ރުޕީސް އަށެވެ. މީގެ އިތުރުން،  ޑީސަލް ލިޓަރަކުން 25 ރުޕީސް ހެޔޮކޮށްފައިވާއިރު، ޑީސަލް ލިޓަރެއްގެ އާ އަގަކީ 382 ރުޕީސް އެވެ.

ނަމަވެސް، އޮކްޓޭން 95 ޕެޓްރޯލާއި، ސުޕަރ ޑީސަލް އަދި ކަރާސީނު ތެލުގެ އަގަށް އެއްވެސް ބަދަލެއް ގެނެސްފައެއް ނުވެ އެވެ.

ސީޕީސީގެ އަގުތަކަށް ގެނައި މި ބަދަލާ ގުޅިގެން، ސްރީލަންކާގައި ތެލުގެ ޚިދުމަތްދޭ އަނެއް ދެ ކުންފުނި ކަމަށްވާ ސިލޯން އައިއޯސީ އަދި ސިނޯޕެކް ލަންކާ އިން ވެސް ވަނީ އެ ކުންފުނިތަކުން ވިއްކާ ތެލުގެ އަގުތައް ހެޔޮކޮށްފަ އެވެ. މި ދެ ކުންފުނިން ވެސް ވަނީ ސީޕީސީގެ އާ އަގުތަކާ އެއްގޮތަށް، އޮކްޓޭން 92 ޕެޓްރޯލް ލިޓަރަކުން 20 ރުޕީސް އަދި އޮޓޯ ޑީސަލް ލިޓަރަކުން 25 ރުޕީސް ހެޔޮކޮށްފަ އެވެ.

ސްރީލަންކާ ގައި ތެލުގެ އަގުތަކަށް ހެޔޮ ބަދަލުތަކެއް ގެނައި އިރު، އީރާން-އެމެރިކާ ހަނގުރާމަ ފެށުމުގެ ކުރިން ދުނިޔޭގެ ބާޒާރުގައި ތެލުގެ އަގު ހުރި މިންވަރަށް ސާފުނުކުރާތެލުގެ އަގު ތިރިވެފައިވާކަން ފާހަގަ ކުރެވެ އެވެ.

މި ގޮތުން ހަނގުރާމަ ފެށުމުގެ ކުރިން (28 ފެބްރުއަރީ 2026) ސާފު ނުކުރާ ތެޔޮ ފީފާ އެއްގެ އަގު ހުރީ 72 ޑޮލަރަށް ކަމަށްވާއިރު،  24 ޖޫން 2026 ވަނަ ދުވަހު، ހަނގުރާމަ ފެށުނުފަހުން ފުރަތަމަ ފަހަރަށް މިވަނީ 72 ޑޮލަރަށް ތިރިވެފަ އެވެ.

މާކެޓް ދިރާސާ ކުރާ ފަރާތްތަކުން ބުނާ ގޮތުގައި ފާއިތުވި 3 ހަފްތާގެ ތެރޭގައި ތެލުގެ އަގުތަށް ވަރަށް ބޮޑަށް ދައްވަމުން އައިސްފައިވާކަން ފާހަގަ ކުރެވެ އެވެ.

ތެލުގެ ބާޒާރަށް ހެޔޮ ބަދަލު ތައް އަންނަންފެށީ އީރާން-އެމެރިކާ އާއި ދެމެދު މަޝްވަރާ ތަކަށް ކުރިއެރުން ލިބެމުން އަންނާތީ ކަމަށް ބެލެވެ އެވެ. އޭގެ އިތުރުން ތެލުގެ ޝިޕްމެންޓްތައް ބަރުކުރުމަށް އެހެނިހެން ބަނދަރުތައް ތައްޔާރުކޮށް، ރައްކާތެރި އެހެނިހެން ބަނދަރު ތަކަށް ޝިޕްމެންޓް ތައް ބަދަލު ކުރުން ހިމެނެ އެވެ. މިގޮތުން ކުރިން އެންމެ ގިނައިން ތެޔޮ ޝިޕްމެނޓްތައް ބޯޓުން ބޯޓަށް ބަރުކުރުމަށް ބޭނުން ކުރަމުންދިޔަ އެކުވެރި އަރަބި އިމާރާތުގެ ފުޖެއިރާ އަދި އިރާގު ގެ ޚޮރް އަލް ޒުބައިރް ގެ ބަނދަރުން ތެޔޮ ބަރު ކުރުމުގެ ބަދަލުގައި، ގަލް އޮފް އޮމާން އިން ތެޔޮ ބަރުކުރުމަށް އައި ބަދަލު ފާހަގަ ކުރެވެ އެވެ.

މެދު އިރުމަތީގައި ހަނގުރާމަ ފެށުނު ފަހުން ތެލުގެ އަގުތަށް އެންމެ މައްޗަށް ދިޔައީ މާރޗް 3 ވަނަ ދުވަހު އެވެ. އެދުވަހު ސާފު ނުކުރާ ފީފާއެއް 113 ޑޮލަރަށް އުފުލުނުކަން ފާހަގަ ކުރެވެ އެވެ. މިހިނގާ ޖޫން މަހުގެ 15 އިން ފެށިގެން ތެލުގެ އަގު 80 ޑޮލަރުން ދަށަށް ގޮސްފައިވާކަން ވަނީ ފާހަގަ ކުރެވިފަ އެވެ.