ފްރާންސްގެ ރައީސް މެކްރޮން އަނެއްކާ ވެސް އަވި އައިނުގައި، އެތައް ބައެއްގެ ސަމާލުކަން!
އާންމުންގެ ސަމާލުކަން އެކަމަށް މާ ބޮޑަށް ލިބުނީ، ފަހުން އޮމާންގެ ސުލްޠާން އާއެކު ބޭއްވެވި ރަސްމީ ބައްދަލުވުމުގައި ވެސް މެކްރޮން އަވި އައިނުގައި ހުންނެވުމުން. ދެ ޤައުމުގެ ދެ މެދުގައި މުހިންމު އެއްބަސްވުން ތަކެއްގައި ސޮއި ކުރެއްވުން ކުރިއަށް ގެންދެވި އިރު ވެސް، މެކްރޮން އިންނެވީ އަވި އައިނުގައި.
ފްރާންސްގެ ރައީސް އިމަނުއެލް މެކްރޮން އަވި އައިނުގައި. | ގެޓީ އިމޭޖަސް
ފްރާންސްގެ ރައީސް އިމަނުއެލް މެކްރޮން އަނެއްކާ ވެސް އަވި އައިނު އަޅުއްވައިގެން ހުންނެވުމުން، އެތައް ބައެއްގެ ސަމާލުކަން އެކަމަށް ލިބިއްޖެ އެވެ.
މެކްރޮން އަވި އައިނު އަޅުއްވައިގެން ހުންނެވީ ހޯމަ ދުވަހު އޮމާންގެ ސުލްޠާން ހައިތަމް ބިން ޠާރިޤް އަށް މަރުޙަބާ ދެންނެވުމުގެ ތެރޭގައި އެވެ. ފްރާންސްގެ ރިޔާސީ ގަނޑުވަރުގައި އޮމާންގެ ސުލްޠާން އަށް މަރުޙަބާ ދެންނެވިއިރު މެކްރޮން ހުންނެވީ އަވި އައިނުގައި އެވެ.
އާންމުންގެ ސަމާލުކަން އެކަމަށް މާ ބޮޑަށް ލިބުނީ، ފަހުން އޮމާންގެ ސުލްޠާން އާއެކު ބޭއްވެވި ރަސްމީ ބައްދަލުވުމުގައި ވެސް މެކްރޮން އަވި އައިނުގައި ހުންނެވުމުންނެވެ. ދެ ޤައުމުގެ ދެ މެދުގައި މުހިންމު އެއްބަސްވުން ތަކެއްގައި ސޮއި ކުރެއްވުން ކުރިއަށް ގެންދިޔައިރު ވެސް، މެކްރޮން އިންނެވީ އަވި އައިނުގައި އެވެ.
ނަމަވެސް މިފަހަރު މެކްރޮން އަވި އައިނު އަޅުއްވައިގެން ހުންނެވި ސަބަބާ ގުޅޭ ގޮތުން ރަސްމީ އިދާރާ އަކުން އެއްވެސް އެއްޗެއް ބުނެފައި ނުވެ އެވެ. އަދި އެކަމުގައި މެކްރޮން ވެސް ވާހަކަ ދައްކަވާފައި ނުވެ އެވެ. ހޯމަ ދުވަހު ބައެއް އެހެން އިވެންޓު ތަކުގައި ވެސް މެކްރޮން ބައިވެރިވެ ވަޑައިގެންނެވީ އަވި އައިނުގައި އެވެ.
މީގެ ކުރިން، މިއަހަރުގެ ޖަނަވަރީ މަހުގެ ތެރޭގައި ވެސް މެކްރޮން ވަނީ އަވި އައިނު އަޅުއްވައިގެން އުޅުއްވައިފަ އެވެ. އެފަހަރު ވެސް ގިނަ ބައެއްގެ ސަމާލުކަން އެކަމަށް ވަރަށް ބޮޑަށް ލިބުނެވެ. އެފަހަރު މެކްރޮން އައިނު އަޅުއްވައިގެން އުޅުއްވީ އިންފެކްޝަނެއްގެ ސަބަބުން، ދެ ލޮލަށް ލޭ އަރާފައި ހުރުމުންނެވެ.
މެކްރޮން އައިނު އަޅުއްވައިގެން އުޅުއްވަނީ، އިންފެކްޝަނެއްގެ ސަބަބުން ލޮލަށް ލޭ އަރާފައި ހުރުމުން
ސްވިޒަލެންޑުގެ ޑާވޮސްގައި ޖަނަވަރީ މަހު ކުރިއަށް ދިޔަ ވޯލްޑް އިކޮނޮމިކް ފޯރަމް އަށް ވެސް މެކްރޮން ވަޑައިގެންނެވީ އަވި އައިނު އަޅުއްވައިގެންނެވެ. އެ ފޯރަމްގައި ތަޤުރީރު ކުރެއްވިއިރު، އަދި ޤައުމު ތަކުގެ ލީޑަރުންނާ ބައްދަލު ކުރެއްވިއިރު ވެސް މެކްރޮން ހުންނެވީ އަވި އައިނު އަޅުއްވައިގެންނެވެ.
އެފަހަރު ވެސް މެކްރޮން އަވި އައިނު އަޅުއްވައިގެން ހުންނެވުމުން، މުޅި ދުނިޔޭގެ ސަމާލުކަން އެކަމަށް ލިބުނެވެ. އަދި އެކަމަށް މަޖާ ކުރުމުގެ ގޮތުން ސޯޝަލް މީޑިއާގައި އެކި ކަހަލަގެ މީމްތައް ހަދައި، ޤައުމު ތަކުގެ ވެރިންގެ މެދުގައި ވެސް އެކަން މަޤުބޫލު ވެގެން ދިޔަ އެވެ.
