ސަރުކާރުން "ރައިޓް ސައިޒް" ކުރަން މުވައްޒަފުން މަދުކުރަމުން ދަނިކޮށް، އެންސްޕާއަށް ގިނަ އަދަދެއްގެ މުވައްޒަފުން ހޯދަން އިއުލާނު ކޮށްފި
4 ޖުލައި 2026 | ހޮނިހިރު 14:15މި މަގާމުތަކަށް ކުރިމަތިލުމުގެ ފުރުސަތު ޖުލައި 9 ވަނަ ދުވަހުގެ ނިޔަލަށް ހުޅުވާލާފައިވާއިރު، މީގެ ތެރޭގައި އެކި ފެންވަރުގެ އެޑްމިނިސްޓްރޭޓިވް އަދި ސޯޝަލް ބެނެފިޓްސް އޮފިސަރުން ހިމެނޭ. ސަރުކާރުގެ ޚަރަދު ކުޑަކުރުމުގެ ސިޔާސަތުގެ ދަށުން ބައެއް ކުންފުނިތަކުން މުވައްޒަފުން ވަކިކުރަމުންދާ ދަނޑިވަޅެއްގައި، މިފަދަ ގިނަ އަދަދެއްގެ ވަޒީފާތަކަށް މީހުން ހޯދަން އިއުލާނުކުރުމުން ގިނަ ބައެއްގެ ސަމާލުކަން ވަނީ މިކަމަށް ހުއްޓިފައި.
އެންސްޕާގެ ނަން ބޯޑު ފެންނަ ފޮޓޯ އެއް | ސޯޝަލް މީޑިއާ
ނޭޝަނަލް ސޯޝަލް ޕްރޮޓެކްޝަން އޮތޯރިޓީ (އެންސްޕާ) އަށް ގިނަ އަދަދެއްގެ މުވައްޒަފުން ހޯދުމަށް އެ އިދާރާއިން އިއުލާނު ކޮށްފި އެވެ.
އެންސްޕާއިން ކުރި އިއުލާނުގައި ސީނިއަރ އެޑްމިނިސްޓްރޭޓިވް އޮފިސަރުންނާއި، އެސިސްޓެންޓް އެޑްމިނިސްޓްރޭޓިވް އޮފިސަރުންގެ އިތުރުން، ޕްރިންސިޕަލް ސޯޝަލް ބެނެފިޓްސް އޮފިސަރުންނާއި، ސީނިއަރ ސޯޝަލް ބެނެފިޓްސް އޮފިސަރުން އަދި އެސިސްޓެންޓު ސޯޝަލް ބެނެފިޓްސް އޮފިސަރުން ހޯދުން ހިމެނެ އެވެ.
އޭގެ ތެރޭގައި ހިމެނެނީ މާލެ އަދި އައްޑޫސިޓީގައި އެންސްޕާގައި މަސައްކަތް ކުރުމަށް ނަގާ މުވައްޒަފުންނެވެ.
އެންސްޕާގެ އިއުލާނުގައިވާ ގޮތުން އައްޑޫސިޓީ އެންސްޕާގެ ކޯލް ސެންޓަރަށް އެކަނިވެސް 6 މުވައްޒަފުން ބޭނުންވެ އެވެ. އަދި އިތުރު އިދާރީ މުވައްޒަފަކު ހޯދުމަށްވެސް އިއުލާނު ކޮށްފައިވެ އެވެ.
މީގެ އިތުރުން، މާލޭ އެންސްޕާ އޮފީހުގައި މަސައްކަތް ކުރުމަށްވެސް އެކި ނަންނަމުގައި 10 މުވައްޒަފުން ހޯދުމަށް އިއުލާނުކޮށްފައިވެ އެވެ.
މި މަޤާމުތަކަށް ކުރިމަތިލުމުގެ ސުންގަޑިއަކީ 2026 ޖުލައި 09 ވާ ބުރާސްފަތި ދުވަހުގެ 13:30 ގެ ކުރިންނެވެ.
ސަރުކާރުގެ "ރައިޓް ސައިޒް" ކުޑަކުރުމަށް މަސައްކަތް ކުރަމުންދާ ދަނޑިވަޅެއްކަމަށް ބުނެ، ރަށްރަށުން ސަރުކާރުގެ އެސްއޯއީތަކަށް ނަގާފައިވާ ގިނަ އަދަދެއްގެ މުވައްޒަފުން އެއް ފަހަރާ ވަޒީފާއިން ވަކިކުރަމުންދާއިރު، އަނެއްކޮޅުން ސަރުކާރުން ބޭނުންވާ ތަންތަނުގައި ވަޒީފާތައް އުފައްދައި މަޤާމުތަކަށް ގިނަ އަދަދެއްގެ މުވައްޒަފުން ނަގަމުންދާކަން ފާހަގަ ކުރެވެ އެވެ.
