ހަންކެޑެ މަޝްރޫއު: 20 އަހަރުވީ އިރުވެސް އަދިވެސް އަމަލީ މަސައްކަތް ފެށޭނެ ދުވަހެއް ނޭނގޭ!
ހަންކެޑެ ޓޫރިޒަމަށް ތަރައްގީ ކުރުމުގެ ވާހަކަ 2005 ވަނަ އަހަރުން ފެށިގެން ދެކެވެމުން އަންނައިރު، މިހާތަނަކަށް އެއްވެސް ސަރުކާރަކަށް މިކަން ހަގީގަތަކަށް ހަދައި ދެވިފައެއް ނުވޭ
އައްޑޫ ހަންކެޑެ ބުރިޖު | އަހްމަދު އައިޝް
އައްޑޫގެ ފަތުރުވެރިކަން ކުރިއެރުމަށް ކުރަމުންދާ މަސައްކަތުގައި އެންމެ ގިނަ ބައެއްގެ އުއްމީދާއި ގުޅިފައިވާ ހަންކެޑެ މަޝްރޫއުގެ ވާހަކައިގައި ސަރުކާރުތަކުގެ ބަހާއި އަމަލު ދިމާނުވެ ރައްޔިތުން، މި ވާހަކަ އަޑު އަހާލަ އަހާލަ ތިބޭތާ 20 އަހަރު ވެއްޖެ އެވެ.
ހަންކެޑޭގައި ސިޓީ ހޮޓަލެއް ތަރައްގީ ކުރުމުގެ މަސައްކަތް އެންމެ ފުރަތަމަ ރައީސް މައުމޫންގެ ވެރިކަމުގައި ހަވާލުކުރީ 2005 ވަނަ އަހަރު ފުވައްމުލަކުގެ ކުންފުންޏެއް ކަމަށްވާ ތޫނޑު ޕްރައިވެޓް ލިމިޓެޑާއެވެ. އަށާރަ މަސް ތެރޭ ނިންމަން ހަވާލުކުރި އެ މަސައްކަތް އެ ކުންފުނިން ނިންމާފައިނުވާތީ ކުންފުނި ޖޫރިމަނާކޮށް 2008 ވަނަ އަހަރު މަސައްކަތް ހަވާލު ކުރީ ހާފް ޑިގްރީ ކިޔާ ކުންފުންޏަކާއެވެ. ނަމަވެސް އެ ކުންފުންޏާ ހަވާލުކުރި މަސައްކަތްވެސް ކުރިއަކަށް ނުދިޔައެވެ.
2013 ވަނަ އަހަރު ހަންކެޑެ ތަރައްގީކުރަން އަނެއްކާވެސް ސިންގަޕޫރުގެ ކުންފުންޏަކާ ހަވާލުކުރިއެވެ. ސިންގަޕޫރު ކުންފުނިން ފަސްތަރީގެ ރިސޯޓެއްގެ ގޮތުގައި ހަންކެޑެ ތަރައްގީ ކުރުމަށް ނިންމާފައިވީ ނަމަވެސް އެކަމެއް ވެސް ނުވިއެވެ.
ނިމިދިޔަ އެމްޑީޕީގެ ވެރިކަމުގައި ވަނީ ހަންކެޑެ ތަރައްގީ ކުރަން، ޗައިނާ ނޭޝަނަލް އިލެކްޓްރިކަލް އިންޖިނިއަރިން ކޮމްޕެނީ (ސީއެންއީއީސީ) އާ ހަވާލު ކޮށްފަ އެވެ. އިންޓަގްރޭޓެޑް ޓޫރިޒަމަށް ތަރައްގީ ކުރާ ހަންކެޑެ މަޝްރޫއު، 2023 ވަނަ އަހަރުގެ އެމްޑީޕީގެ ރިޔާސީ ޕްރައިމަރީއާ ދިމާކޮށް އިއުލާން ކުރި ނަމަވެސް ވެރިކަން ނިމުމާއި ހަމައަށް މަސައްކަތް ކުރިއަށްގެންދާނެ ގޮތުގެ ޕްލޭން އެކުލަވާލާ، ހަންކެޑެއަށް ޓޫރިޒަމް ގެންނަން، އެ ރަށާއި މަރަދޫ އަދި ހިތަދޫ ވަކިކޮށް، ހަންކެޑެ ބްރިޖް ވަނީ ތަރައްޤީކޮށްފަ އެވެ.
މި މަޝްރޫއަކީ އައްޑޫ ސިޓީގެ ފަތުރުވެރިކަމަށް އިންގިލާބީ ބަދަލުތަކެއް ގެނައުމަށް ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ފެށި ބޮޑު މަޝްރޫއުއެކެވެ.
އެމްޑީޕީ ސަރުކާރުގެ ދުވަސްވަރު ހަންކެޑޭ ޕްރޮޖެކްޓް ފައިނޭންސިންގ ހަމަޖެއްސި ނަމަވެސް މި ސަރުކާރުން ވަނީ، މަޝްރޫޢުގެ މެދުތެރެއިން އެއްބަސްވުން ބާތިލްކޮށްފަ އެވެ. މުއިއްޒުގެ ސަރުކާރުން އެއްބަސްވުން ބާތިލްކުރި އިރު މިމަޝްރޫޢުގައި މަސައްކަތް ކުރުމުގެ ގޮތުން އެކި ގިންތިއަށް މުވައްޒަފުން ހޯދުމުގެ މަސައްކަތް ވެސް ވަނީ ކޮށްފަ އެވެ.
ރައީސް މުއިއްޒުގެ މި ސަރުކާރުން 2024 ވަނަ އަހަރުގެ އޭޕްރީލް މަހުގެ ތެރޭގައި ވަނީ ހަންކެޑޭގައި ފަސް ގިންތީގެ ހޮޓެލް ތައާރަފުކުރާނެކަން އިއުލާން ކޮށްފަ އެވެ. އަދި އެ އަހަރު ބޭއްވި މަޖިލިސް އިންތިޚާބާ ދިމާކޮށް ކުލަ ގަދަ ރަސްމިއްޔާތެއް ބާއްވައި، ހަވާ އެރުވުމާއި އެކު، ހަންކެޑެ މަޝްރޫއުގެ ބިންގާ 2024 ވަނަ އަހަރުގެ އޭޕްރީލް މަހުގެ 16 ވަނަ ދުވަހު އަޅާފަ އެވެ.
އޭގެ ފަހުންވެސް މި ސަރުކާރުން ވަނީ، ހަންކެޑެ މަޝްރޫއު ފައްޓާނެ ކަމަށް ތަފާތު އެކި ފަހަރު މަތިން އިއުލާންކޮށްފަ އެވެ. ނަމަވެސް މިމަސައްކަތް ނުފެށި ދިގުލައިގެންދާ ސަބަބެއް ސަރުކާރުން ހާމަކޮށްފައެއް ނުވެ އެވެ.
ނިމިދިޔަ ހަފްތާގައި ރައްޔިތުންގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ ހިތަދޫ މެދު ދާއިރާގެ ޕީއެންސީ މެންބަރު އަޙްމަދު އަޒާން ކުރެއްވި ސުވާލަކާ ގުޅިގެން ޓޫއަރިޒަމް މިނިސްޓަރު މުހައްމަދު އަމީން ވިދާޅުވެފައިވަނީ، އައްޑޫ ހަންކެޑެ އިންޓަގަރޭޓެޑް ޓޫރިޒަމަށް ތަރައްގީ ކުރަން ކުރިއަށް ގެންދަން ނިންމާފައިވާ މަޝްރޫއުއާ ގުޅޭ ތަފުސީލުތަކެއް ދެތިން ހަފުތާގެ ތެރޭގައި އިއުލާން ކުރާނެ ކަމަށެވެ. ނަމަވެސް މާބޮޑު ތަފްސީލެއް ހާމަކޮށްފައެއް ނުވެ އެވެ.
ހަންކެޑެ ޓޫރިޒަމަށް ތަރައްގީ ކުރުމުގެ ވާހަކަ 2005 ވަނަ އަހަރުން ފެށިގެން ދެކެވެމުން އަންނައިރު، މިހާތަނަކަށް އެއްވެސް ސަރުކާރަކަށް މިކަން ހަގީގަތަކަށް ހަދައި ދެވިފައެއް ނުވެ އެވެ.
ސުވާލަކީ ރައީސް މުއިއްޒުގެ ވެރިކަން ނިމިގެންދާއިރު، މިސަރުކާރުން އައްޑޫގެ ރައްޔިތުންނަށް ދެއްކި ހުވަފެން ހަގީގަތަކަށް ވާނެބާއެވެ؟
