ޔޫކްރެއިނުން ރަޝިޔާގެ ތެޔޮ ކާރުޚާނާއަކަށް ދެވަނަ ފަހަރަށް ހަމަލާދީފި

ޔޫކްރެއިންގެ އަސްކަރިއްޔާއިން ރަޝިޔާގެ އެތެރޭގެ ސަރަހައްދުތަކަށް ދެމުންދާ ހަމަލާތައް ވަރުގަދަކޮށް، ހަނގުރާމައިގެ ފްރަންޓްލައިން އާ 1،300 ކިލޯމީޓަރު (800 މޭލު) ދުރުގައި އޮންނަ އޫފާ ސިޓީގައި ހުރި ތެޔޮ ސާފުކުރާ ކާރުޚާނާއަކަށް ދެވަނަ ފަހަރަށް ހަމަލާދީފި ކަމަށް ރައީސް ވޮލޮޑިމީރް ޒެލެންސްކީ ބުދަ ދުވަހު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ޒެލެންސްކީ ވިދާޅުވީ، ރަޝިޔާގެ ސަރަހައްދުތަކުގެ އެންމެ ފުނަށް އަމާޒުކޮށް ޔޫކްރެއިންގެ ދުރު ރާސްތާގެ ހަތިޔާރު ބޭނުންކޮށްގެން ދެމުންދާ ހަމަލާތަކަކީ، ރަޝިޔާއާ ދެކޮޅަށް އެޅުމަށް ނިންމާފައިވާ ދަތިކުރުމުގެ ފިޔަވަޅުތަކުގެ ތެރެއިން ރޭވިފައިވާ ގޮތަށް ކުރިއަށްދާ ކަމެއް ކަމަށެވެ.

"މިއީ ރަޝިޔާއިން އަޅުގަނޑުމެންނާ ދެކޮޅަށް ކުރަމުންދާ ކަންކަމަށް ދެވޭ އިންސާފުވެރި ރައްދު ހަމަލާއެއް،" ޒެލެންސްކީ ވިދާޅުވި އެވެ. މީގެ އިތުރުން، ރަޝިޔާގެ ޕެންޒާ ސަރަހައްދުގައި ހުރި އަސްކަރީ ސިނާއީ މަރުކަޒަކަށް ވެސް ހަމަލާދީފައިވާ ކަމަށް އޭނާ ރިޕޯޓުކުރެއްވި އެވެ. މިއީ ޔޫކްރެއިނަށް ހަމަލާދިނުމަށް ރަޝިޔާއިން ބޭނުންކުރާ މިސައިލްތަކަށް ބޭނުންވާ ސާމާނު އުފައްދާ "ސްޓްރެޓީޖިކް" މުހިންމު ތަނެއް ކަމަށް ވެސް އޭނާ ވިދާޅުވި އެވެ.

ހަނގުރާމައިގެ ކުރީސަފާ ގާތްގަނޑަކަށް 600 ކިލޯމީޓަރު ދުރުގައި ހުރި މި މަރުކަޒަކީ ރަޝިޔާގެ ދައުލަތުގެ ޖައްވީ އިދާރާ "ރޮސްކޮސްމޮސް" ގެ ދަށުން ހިންގާ ތަނެއް ކަމަށް ޔޫކްރެއިންގެ އަސްކަރީ ޖެނެރަލް ސްޓާފުން ވަނީ ހާމަކޮށްފަ އެވެ. އެތަނަކީ ކްރޫޒް އަދި ބެލިސްޓިކް މިސައިލްތަކަށް ބޭނުންވާ ސެންސަރުތަކާއި، މަތިންދާބޯޓުތަކުގެ އިލެކްޓްރޯނިކް ސާމާނާއި، ޖާސޫސީ ސެޓެލައިޓްތަކަށް ބޭނުންވާ އާލާތްތައް އުފައްދާ ތަނެއް ކަމަށް ވެސް އެ އިދާރާއިން ބުނެފައިވެ އެވެ.

މީގެ އިތުރުން، ރަޝިޔާއިން ހިފާފައިވާ ޔޫކްރެއިންގެ ޑޮނެޓްސްކް އަދި ލުހާންސްކް ސަރަހައްދުގައި ހުރި ދެ ފާލަމަކަށާއި، ޑޮނެޓްސްކް ސަރަހައްދުގައި ހުރި ލޮޖިސްޓިކްސް މަރުކަޒަކަށް ވެސް ހަމަލާދީފައިވާ ކަމަށް ޖެނެރަލް ސްޓާފުން ރިޕޯޓުކޮށްފައިވެ އެވެ.

ހަތަރު އަހަރަށްވުރެ ގިނަ ދުވަސްވެފައިވާ މި ހަނގުރާމައިގައި ރަޝިޔާގެ އަސްކަރީ ބާރު ކުޑަކުރުމަށްޓަކައި، ހަނގުރާމައިގެ ކުރީސަފާ ވަރަށް ދުރުގައި ހުންނަ ރަޝިޔާގެ ސާމާނު ސަޕްލައިކުރާ މަގުތަކަށް އަމާޒުކޮށް ޔޫކްރެއިންއިން ދަނީ ވަރުގަދަ ހަމަލާތަކެއް ދެމުންނެވެ. މިއީ ރަޝިޔާގެ ހަނގުރާމައިގެ މެޝިނަރީތަކުގެ ދުވެލި މަޑުޖައްސާލުމަށް އެހީތެރިވެދޭނެ ކަމެއް ކަމަށް މުހައްލިލުން ބުނެ އެވެ.

ޔޫކްރެއިންގެ ޑިފެންސް މިނިސްޓްރީން ހާމަކޮށްފައިވާ ގޮތުގައި، ޖޫން މަހުގެ ތެރޭގައި އެ ގައުމުގެ ފައުޖުތަކުން ވަނީ ރަޝިޔާގެ ތެޔޮ ސާފުކުރާ 11 ކާރުޚާނާއަކަށާއި، ތެޔޮ ރައްކާކުރާ މަރުކަޒުތަކާއި، އަސްކަރީ ފެކްޓްރީތަކުގެ އިތުރުން އެހެނިހެން މުހިންމު ތަންތަނަށް ހަމަލާދީފަ އެވެ.

މީގެ އިތުރުން، 2014 ވަނަ އަހަރު ރަޝިޔާއިން ގަދަކަމުން އަތުލާފައިވާ ކްރައިމިއާގެ އެއާފީލްޑެއްގައި ހުރި ރަޝިޔާގެ ހަނގުރާމަމަތީ ބޯޓުތައް ބަހައްޓާ ހެންގަރުތަކަށް ވެސް ހަމަލާދީފައިވާ ކަމަށް ޔޫކްރެއިންގެ ސަލާމަތީ ޚިދުމަތް، އެސް.ބީ.ޔޫ އިން ބުނެފައިވެ އެވެ.

ފަސްވަނަ އަހަރަކަށް ދެމިގެން ގޮސްފައިވާ މި ހަނގުރާމަ ހުއްޓުވުމަށް ރަޝިޔާއަށް "ނުފޫޒު ފޯރުވުމުގެ" ގޮތުން 40 ދުވަހުގެ ކެމްޕޭނެއް ކުރިއަށް ގެންދިއުމަށް ހުއްދަ ދެއްވާފައިވާ ކަމަށް ރައީސް ޒެލެންސްކީ މިދިޔަ ހަފުތާގައި ވަނީ ވިދާޅުވެފަ އެވެ.