ސުލްހަ ޤާއިމު ކުރުމުގެ ނިޔަތެއް ރަޝިޔާގެ ކިބައިގައި ނެތް ކަަމށް ޖީ7 ގެ ލީޑަރު އެއްބަސްވޭ: މެކްރޮން

ރަޝިޔާ އާއި ޔޫކްރެރިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެެނެސް، ސުލްޙަ ޤާއިމު ކުރުމުގެ ހަގީގީ ބޭނުމެއް ރަޝިޔާގެ ކިބައިގައި ނެތް ކަމަށް ޖީ7 ގެ ލީޑަރުން އެއްބަސްވެ ވަޑައިގަންނަވާ ކަމަށް ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.

ފްރާންސްގައި ކުރިއަށް ދިޔަ ޖީ7 ގެ ބައްދަލުވުމުގައި މިކަން ފާހަގަ ކުރައްވައި މެކްރޮން މިހެން ވިދާޅުވީ، އެމެރިކާ އާއި ޔޫރަޕް އިން ރަޝިއާ އާ މަޝްވަރާ ކުރުމަށް ހުށަހެޅި ފުރުސަތުތައް ރަޝިޔާ އިން ބަލައި ނުގަތުމާ ގުޅިގެންނެވެ.

 ޖީ7 ސަމިޓުގެ ފަހު ދުވަހު ބޭއްވި ނޫސްވެރިންގެ ބައްދަލުވުމުގައި މެކްރޮން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް އާއި އެހެން ހުރިހާ ލީޑަރުން ވެސް ގަބޫލު ކުރައްވާފައި ވަނީ ސުލްހައިގެ މަޝްވަރާ ތަކުގައި ބައިވެރިވުމުގެ ހަގީގީ ނިޔަތެއް މިހާރު ރަޝިޔާގެ ކިބައިގައި ނެތް ކަމަށެވެ. 

މި ސަމިޓިގައި ބައިވެރިވެ ވަޑައިގެންނެވި ދުނިޔޭގެ އެންމެ ބޮޑެތި ހަތް އިގްތިސާދީ ބާރު ތަކުގެ ލީޑަރުން، ޔޫކްރެއިން މައްސަލަ ހައްލު ކުރުމަށް މަޝްވަރާ ކުރުމުގައި ގިނަ ވަގުތު ހޭދަ ކުރެއްވި އެވެ. އެމެރިކާގެ ރައީސް ޓްރަމްޕް ވަނީ ޔޫކްރެއިން ހަނގުރާމަ ނިންމުމަށް ރަޝިޔާއާ މަޝްވަރާ ކުރުމަށް މަސައްކަތް ކުރައްވަމުން ގެންދަވާކަން ހާމަ ކުރައްވާފައި އެވެ.

ނަމަވެސް، ފްރާންސްގެ ރައީސް މެކްރޮން ފާހަގަ ކުރެއްވި ގޮތުގައި ރަޝިޔާ އިން މިހާތަނަށް ދައްކުވައި ދީފައިވާ ވިސްނުމުން ސުލްހަ އަށް ވާސިލު ވުމަށް އެގައުމު ތައްޔާރުވެފައިވާ ކަމުގެ އަލާމާތެއް ފެންނާކަށް ނެތެވެ. ޔޫރަޕުގެ ޤައުމު ތަކާއި އެމެރިކާ އިން ސުލްހައިގެ މަޝްވަރާ ތަކަށް ހުށަހެޅި ހުރިހާ ފުރުސަތު ތަކެއް ރަޝިޔާ އިން ބަލައި ނުގަތުމަކީ މިކަމުގެ ހެއްކެއް ކަމަށް ފްރާންސްގެ ރައީސް މެކްރޮން ވިދާޅުވި އެވެ. 

ޔޫކްރެއިންއާ ދެކޮޅަށް ރަޝިޔާ އިން ހަނގުރާމަ ފެށިތާ މިހާރު ހަތަރު ވަނަ އަހަރަށް ދާއިރު، މި ހަނގުރާމައިގެ ސަބަބުން އެތައް ހާސް ބަޔަކު މަރުވެ، މިލިއަނަކަށް ވުރެ ގިނަ މީހުން ގެދޮރު ދޫކޮށް ހިޖުރަ ކުރަން މަޖުބޫރު ވެފައިވެ އެވެ. މި ހަނގުރާމަ ނިންމުމަށް ބައިނަލްއަގުވާމީ މުޖުތަމައުން ކުރަމުންދާ މަސައްކަތް ތަކަށް ރަޝިޔާގެ ދެކޮޅުވެރިކަން އިތުރު ވަމުންދާ ކަމަށް ބައިނަލްއަގުވާމީ ލީޑަރުން ބުނެ އެވެ.

ޖީ7 ގެ ލީޑަރުން ވަނީ ޔޫކްރެއިން އަށް ދެމެހެއްޓެނިވި އެހީތެރިކަން ފޯރުކޮށްދިނުމަށް ވެސް އެއްބަސްވެފައި އެވެ. އަދި ރަޝިޔާ އަށް ކުރިމަތި ކުރުވާފައިވާ އިގްތިސާދީ ހުރަސްތައް ދެމެހެއްޓުމަށް ވެސް ނިންމާފައިވެ އެވެ.