ރަޝިޔާގެ ވަރުގަދަ ހަމަލާތަކެއްގައި ޔޫކްރެއިނުގައި 6 މީހުން މަރު، 50 ޒަޚަމް
ރަޝިޔާއިން ޔޫކްރެއިންގެ ޚާރްކިވް، އޮޑެސާ އަދި ޚަރްސޯން ސަރަހައްދުތަކަށް ދިން ވަރުގަދަ މިސައިލް އަދި ޑްރޯން ހަމަލާތަކެއްގައި ހަ މީހުން މަރުވެ، ގިނަ ބަޔަކު ވަނީ ޒަޚަމްވެފައި. މި ހަމަލާތަކުގައި އާންމުން ދަތުރުކުރި ބަހަކަށާއި އިދާރީ އިމާރާތްތަކަށް ބޮޑެތި ގެއްލުންތަކެއް ލިބިފައިވޭ
ކީވް ސިޓީގެ މިލިޓަރީ އެޑްމިނިސްޓްރޭޝަނުން ހާމަކޮށްފައިވާ ގޮތުގައި، ޔޫކްރެއިންގެ ވެރިރަށް ކީވްގެ ހުރިހާ ޑިސްޓްރިކްޓެއް ހިމެނޭހެން އެ ސިޓީގެ 30 އަށްވުރެ ގިނަ ސަރަހައްދަކަށް ވަނީ އެކިވަރުގެ ގެއްލުންތައް ލިބިފައި. | ނެކްސްޓާ
ބުދަ ދުވަހު ރަޝިޔާއިން ޔޫކްރެއިންގެ އެކި ސަރަހައްދުތަކަށް ދިން ވަރުގަދަ ހަމަލާތަކެއްގައި ހަ މީހުން މަރުވެ، 50 އެއްހާ މީހުން ޒަޚަމްވެފައިވާ ކަމަށް އެ ގައުމުގެ ކަމާބެހޭ އިދާރާތަކުން ހާމަކޮށްފި އެވެ.
ޔޫކްރެއިންގެ ދެވަނައަށް އެންމެ ބޮޑު ސިޓީ ކަމަށްވާ ޚާރްކިވްގެ ތިން ސަރަހައްދަކަށް ރަޝިޔާއިން ދިން "ގްލައިޑް ބޮމުގެ" ހަތް ހަމަލާއެއްގައި 15 އަހަރުގެ ކުއްޖަކު މަރުވެ، 32 މީހުން ޒަޚަމްވެފައިވާ ކަމަށް އެ ސިޓީގެ މޭޔަރު އިހޯރް ތެރެޚޯވް ޓެލެގްރާމް މެދުވެރިކޮށް މައުލޫމާތު ދެއްވާފައިވެ އެވެ.
ޔޫކްރެއިންގެ ދެކުނުގެ ސަރަހައްދެއް ކަމަށްވާ އޮޑެސާއަށް ރަޝިޔާއިން ދިން ބެލިސްޓިކް މިސައިލް ހަމަލާއެއްގައި ދެ މީހުން މަރުވެ، 15 މީހުން ޒަޚަމްވެފައިވާ ކަމަށް އެ ސަރަހައްދުގެ ގަވަރުނަރު އޮލެގް ކިޕާރް ވިދާޅުވި އެވެ. މި ހަމަލާއާ ގުޅިގެން އެ ސަރަހައްދުގައި ބޮޑު އަލިފާނުގެ ހާދިސާއެއް ވެސް ވަނީ ހިނގާފަ އެވެ.
މީގެ އިތުރުން، ދެކުނުގެ ޚަރްސޯން ސަރަހައްދުގައި ދަތުރުކުރި މިނީ ބަހަކަށް އަމާޒުކޮށް ރަޝިޔާއިން ދިން ޑްރޯން ހަމަލާއެއްގައި 18 އަހަރުގެ އަންހެނަކާއި އިތުރު މީހަކު މަރުވެފައިވާ ކަމަށް ގަވަރުނަރު އޮލެކްސަންޑަރ ޕްރޮކޫޑިން ވިދާޅުވި އެވެ. މި ހަމަލާގައި ނުވަ މީހަކު ޒަޚަމްވެފައިވާ ކަމަށް ވެސް އޭނާ ފާހަގަކުރެއްވި އެވެ.
ޚަރްސޯން ސަރަހައްދުގެ އިދާރީ އިމާރާތަކަށް އަމާޒުކޮށް ރަޝިޔާއިން ދިން އެހެން ޑްރޯން ހަމަލާއެއްގައި އެކަކު މަރުވެ، އިތުރު ދެ މީހަކު ޒަޚަމްވެފައިވާ ކަމަށް ވެސް ގަވަރުނަރު ވިދާޅުވި އެވެ.
ރަޝިޔާއިން ޔޫކްރެއިނަށް އަރައިގަނެ ހަނގުރާމަ ފެށިތާ ހަތަރު އަހަރަށްވުރެ ގިނަ ދުވަސް ވެފައިވާއިރު، ދެ ފަރާތުން ކޮންމެ ދުވަހަކު ދެމުންދާ ހަމަލާތަކުގައި މަރުވާ އާންމުންގެ އަދަދު ދަނީ އިތުރުވަމުންނެވެ.
ޔޫކްރެއިންގެ އެއާފޯސްގެ ތަފާސްހިސާބުތަކާ ހަވާލާދީ އޭއެފްޕީން ތައްޔާރުކުރި ރިޕޯޓެއްގައިވާ ގޮތުން، މެއި މަހާ އަޅާބަލާއިރު ޖޫން މަހު ރަޝިޔާއިން ޔޫކްރެއިނަށް ފޮނުވާލި ދުރު ރާސްތާގެ ޑްރޯންތަކާއި މިސައިލްތަކުގެ އަދަދު ވަނީ ވަރަށް ބޮޑަށް ދަށްވެފަ އެވެ.
އެމެރިކާ މެދުވެރިވެގެން ކުރިއަށްގެންދާ ސުލްހައިގެ މަޝްވަރާތައް ވަނީ ފެބްރުއަރީ މަހުގެ ފަހުކޮޅުން ފެށިގެން ހުއްޓުމަކަށް އައިސްފަ އެވެ. އެއީ އިސްރާއީލާއި އެމެރިކާއިން އީރާނަށް ދިން ހަމަލާތަކާ ގުޅިގެން މެދުއިރުމަތީގައި ހަނގުރާމަ ފެށުނު ހިސާބުންނެވެ.
މަސްދަރު: އޭއެފްޕީ
