މިސަރުކާރުން ކަމެއްކުރާ އިރު ވިސްނަނީ ނޭފަތު ކުރިއާ ހިސާބަށް: އަލީ ހުސައިން
ސަރުކާރުން ނިންމާ ނިންމުންތަކުގައި ސީރިއަސްކަމެއް ނެތުމުގެ ސަބަބުން ތަކުރާރުކޮށް ސިޔާސަތުތައް ބަދަލުކުރަން ޖެހޭކަމަށް ވިދާޅުވެ، ކެންދޫ ދާއިރާގެ ކުރީގެ މެންބަރު އަލީ ހުސައިން ސަރުކާރަށް ވަރަށް ބޮޑަށް ފާޑުވިދާޅުވެއްޖެ. ކުރީގެ ރައީސުންގެ އިނާޔަތްތަކާ ގުޅޭގޮތުން މަޖިލީހުގެ ކޮމިޓީން ނިންމި ނިންމުމަކީ ގާނޫނީ ގޮތުން ފުށުއަރާ ކަމެއްކަން ފާހަގަކުރައްވައި، މިހާރު އޮތް މަޖިލީހަކީ މެންބަރުންގެ މިނިވަންކަމެއް ނެތް ފެންވަރު ދަށް މަޖިލީހެއްގެ ގޮތުގައި އޭނާ ސިފަކުރެއްވި. މީގެ އިތުރުން، ސަރުކާރުގެ ނިންމުންތަކުގެ ސަބަބުން އާންމުންނާއި ސަރުކާރަށް ތާއީދުކުރާ މީހުންގެ މެދުގައިވެސް ސަރުކާރުގެ މަގުބޫލުކަން ދަށްވަމުންދާކަމަށް އޭނާ ވިދާޅުވި.
ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސެއިން، ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަނީ. | ރާއްޖެ އެމްވީ
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ސިޔާސަތުތައް ކަނޑައެޅުމުގަ އާއި ކަންކަން ނިންމުމުގައި ދުރުވިސްނުމެއް ނެތް ކަމަށާއި، އެބޭފުޅުން ވިސްނަވަނީ ހަމައެކަނި "ނޭފަތު ކުރިއާ ހިސާބަށް" ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން އަލީ ހުސައިން ވިދާޅުވީ، މި ސަރުކާރުން ކަންކަން ނިންމަނީ އެއްވެސް ސީރިއަސްކަމެއް ނެތި "ވާނުވާ" އެއްގައި ތިބެގެން ކަމަށެވެ. އަދި ސަރުކާރުން ނިންމާ ގިނަ ނިންމުންތަކެއް އަނބުރާ ގެންގޮސް "ޔޫ-ޓާން" ނަގަމުންދާކަން އޭނާ ފާހަގަކުރެއްވި އެވެ.
ހަމަ ވާނުވާގަ ހަގީގަތުގަ މި އުޅޭނީ. ކިތައް ޑިސިޝަންތޯ މި ސަރުކާރުން ނަގާފަ އަނެއްކާ އަނބުރާ ޔޫޓާން މި ނަގަނީ. އެނގޭތޯ؟ އެއީ އަޅުގަނޑުމެން ދައްކާ ވާހަކަ. އެއްވެސްކަހަލަ ގަރާރުކަމެއް ނެތޭ. ސީރިއަސް ކަމެއް ނެތޭ. އެހެންވީމަ ކަމެއް ކުރާއިރުގަ ކުރިއަށް، އެއްކަލަ ނޭފަތު ކުރިއާއި ހިސާބަށް އެބަ ވިސްނަނީ. ވާހަކައެއް ދައްކާއިރުގަ ވެސް، ކަމެއް ކުރާއިރުގަ ވެސް، ސިޔާސަތެއް އެކަށައަޅާއިރުގަ ވެސް ނޭފަތު ކުރިއާ ހިސާބަށޭ އެ ވިސްނަނީ. އެހެން ނޫނީ މީކީ އާއްމުކޮށް ކުރާ ކަހަލަ، ކުރާ ޒާތުގެ ކަމެއް ނޫން.ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން
މަޖިލީހުގެ 241 ކޮމިޓީން ކުރީގެ ރައީސުންގެ އިނާޔަތްތަކާ ގުޅޭގޮތުން ނިންމާ ނިންމުންތަކަށް ފާޑުވިދާޅުވަމުން އަލީ ހުސައިން ވިދާޅުވީ، ގާނޫނީ ގޮތުން ދީފައިވާ ރައްކާތެރިކަމެއް ނިގުޅައިގަނެވޭނީ ހަމައެކަނި ގާނޫނަށް އިސްލާހު ގެނެސްގެން ކަމަށެވެ. ވަކި ކޮމިޓީއަކަށް އެކަނި ގާނޫނެއް ބަދަލު ނުކުރެވޭނެ ކަމަށާއި، އެފަދަ ކަންކަން ކުރަންވާނީ މުޅި މަޖިލީހަށް ބިލެއް ހުށަހަޅައި، ބަހުސްކޮށްގެން ކަމަށް އޭނާ ވިދާޅުވިއެވެ. އޭނާ އިތުރަށް ވިދާޅުވީ، ރައީސް މުއިއްޒުގެ ވެރިކަން ނިމުމުން އެމަނިކުފާނުވެސް ނުކުންނަވާނީ މަގުމައްޗަށް ކަމަށާއި، މިއަދު ނިންމާ ނިންމުންތަކުގެ އަސަރު މާދަމާ އަމިއްލަފުޅަށް ކުރާނެ ކަމަށެވެ.
މިއަދު މި ނިންމާލަނީ ޓޫ ފޯރ ވަން ކޮމިޓީން މި ކަނޑާލަން. އެހެން ބުނީމަ ނިންމާކަށް ނޫންތޯ ޖެހޭނީ. އިތުރު ގޮތެއް ނޯންނާނެ. ގޮނޑި ގެއްލޭނެ އެހެން ނޫނިއްޔާ. މިހާރު އޮތީ ޖަމުއިއްޔާއަކަށް އިނގޭތޯ، ގޮނޑި ގޮނޑި ގެއްލުވާލުމުގެ ބާރު، ރައްޔިތުން މަޖިލީހުގެ މެންބަރުން ވަކިކުރުމުގެ ބާރު އޮތީ ސުޕްރީމް ކޯޓުން ޖަމުއިއްޔާއަކަށް ހަވާލުކޮށްފަ. އެހެންވީމަ އެންޖީއޯތަކަށް އެންޖީއޯ، މިހާރު ރާއްޖޭގައި ހުރި ސިޔާސީ އެންޖީއޯތަކަށް މިހާރު ރައްޔިތުންގެ މަޖިލީހުގެ މެންބަރުން ވަކިކުރާނެ. އެހެންވީމަ ރައްޔިތުންގެ މަޖިލީހުގެ މެންބަރަކަށްވެސް ނޯންނާނެ ނޫންތޯ އިތުރު ޗޮއިސް އެއް.ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން
ސަރުކާރުގެ މަގުބޫލުކަމާ ގުޅޭގޮތުން ވާހަކަ ދައްކަވަމުން އަލީ ހުސައިން ވިދާޅުވީ، ދުވަހުން ދުވަހަށް ސަރުކާރުގެ ރޭޓިން ދަށްވަމުންދާ ކަމަށެވެ. މިއީ ހަމައެކަނި އިދިކޮޅު ފަރާތްތަކުގެ ކުރިމަތީގައި ނޫން ކަމަށާއި، ސަރުކާރު ހިންގާ ޕީއެންސީ އަށް ތާއީދުކުރާ މީހުންގެ ކުރިމަތީގައިވެސް ސަރުކާރުގެ އަގު ވެއްޓެމުންދާ ކަމަށް އޭނާ ވިދާޅުވި އެވެ.
މީގެ އިތުރުން، މިހާރު އޮތް 20 ވަނަ ރައްޔިތުންގެ މަޖިލީހަކީ ރާއްޖޭގެ ތާރީޚުގައި ފެނުނު އެންމެ "ފެންވަރު ދަށް" މަޖިލިސް ކަމަށް އަލީ ހުސައިން ސިފަކުރެއްވި އެވެ. މަޖިލިސް މެންބަރުންގެ މިނިވަންކަމެއް ނެތް ކަމަށާއި، ޕާޓީގެ ލީޑަރުން އަންގާ ގޮތަށް އަމަލުނުކޮށްފިނަމަ "ގޮނޑި ގެއްލޭނެ" ބިރު އޮތުމުން، މެންބަރުންނަށް އިތުރު ފުރުސަތެއް ނެތް ކަމަށް އޭނާ ވިދާޅު ވިއެވެ. "އެހެންވީމަ ރައްޔިތުން މަޖިލީހެއް މިއަދަކު ނެތް،" އަލީ ހުސައިންގެ ވާހަކަ ނިންމަވާލަމުން ވިދާޅުވި އެވެ.
