ރައީސް މުއިއްޒު ވެރިކަމުގައި ހުރެގެން އެއްވެސް މުއައްސަސާއަކަށް މިނިވަންކަމާއެކު މަސައްކަތް ކުރުމުގެ ފުރުސަތެއް ނުދޭނެ: މަލީހު
ސިޔާސީ ޕާޓީތަކަށް މީހުން ވެއްދުމުގައި އީ-ފާސް ބޭނުންކުރަން ޖެހުމުން ކުރިމަތިވާ ދަތިތަކާ ގުޅޭގޮތުން ޕީއެންއެފްގެ ފަރާތުން އިލެކްޝަންސް ކޮމިޝަނާ ބައްދަލުކޮށް ކަންބޮޑުވުން ފާޅުކޮށްފިއެވެ. މި ބައްދަލުވުމަށްފަހު މަލީހު ޖަމާލު ވިދާޅުވީ، ސަރުކާރުން ދައުލަތުގެ މުއައްސަސާތަކަށާއި ޖުޑީޝަރީގެ އިތުރުން ރައްޔިތުންގެ މަޖިލީހަށް ނުފޫޒު ފޯރުވަމުންދާ ކަމަށެވެ. އެހެންކަމުން މިނިވަން މުއައްސަސާތަކުގެ މިނިވަންކަން ކަށަވަރުކުރުމަށްޓަކައި އީ-ފާސް ފަދަ ނިޒާމުތައް ހަރުދަނާކޮށް، ސަރުކާރުގެ ނުފޫޒުން މުއައްސަސާތައް ސަލާމަތްކުރަން ޖެހޭ ކަމަށް އޭނާ ފާހަގަކުރެއްވިއެވެ.
ހޯމަދުވަހު އިލެކްޝަންސް ކޮމިޝަނުގެ މެމްބަރުންނާއެކު ބޭއްވި ބައްދަލުވުމަށްފަހު، ޕީއެންއެފް ސެކްރެޓަރީ ޖެނެރަލް މަލީހު ޖަމާލު ނޫސްވެރިންނަށް މައުލޫމާތު ދެެއްވަނީ. | ރާއްޖެ އެމްވީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމުގައި ހުންނެވިހާ ދުވަހަކު، ރާއްޖޭގެ އެއްވެސް މުއައްސަސާއަކަށް މިނިވަންކަމާއެކު މަސައްކަތް ކުރުމުގެ ޖާގަ ނުލިބޭނެ ކަމަށް ޕީޕަލް ނެޝަނަލް ފްރަންޓް (ޕީއެންއެފް) ގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެ އެވެ.
މަލީހު މިފަދައިން ވިދާޅުވީ ހޯމަ ދުވަހު އިލެކްޝަންސް ކޮމިޝަން (އީސީ) ގެ މެމްބަރުންނާ ބައްދަލުކުރެއްވުމަށްފަހު، ނޫސްވެރިންނަށް މައުލޫމާތު ދެއްވަމުންނެވެ. މި ބައްދަލުވުމަކީ ޕީއެންއެފްގެ ފަރާތުން ހުރި ބައެއް ކަންބޮޑުވުންތައް ހިއްސާކުރުމަށް ބޭއްވި ބައްދަލުވުމެކެވެ.
ނޫސްވެރިންނާ ވާހަކަދައްކަވަމުން މަލީހު ވިދާޅުވީ، ސިޔާސީ ޕާޓީތަކަށް މީހުން ވެއްދުމުގައި އީ-ފާސް ބޭނުންކުރަން ޖެހުމުގެ ސަބަބުން ގިނަ ދަތިތަކެއް ކުރިމަތިވަމުންދާ ކަމަށެވެ. ހާއްސަކޮށް އަތޮޅުތެރޭގައި ދިރިއުޅޭ އުމުރުން ދުވަސްވީ މީހުންނަށް އީ-ފާސް މެދުވެރިކޮށް މުއާމަލާތް ކުރުމުގައި ފޯނު ނަންބަރާއި އީމެއިލް ދިމާނުވުން ފަދަ ގޮންޖެހުންތައް ހުރިކަން އޭނާ ފާހަގަކުރެއްވި އެވެ. މިކަމަށް ދާއިމީ ހައްލެއް ހޯދުމަށް އީސީ، އެންސީއައިޓީ، ހޯމް މިނިސްޓްރީ އަދި އެލްޖީއޭ ގުޅިގެން މަސައްކަތް ކުރުމަށް މަލީހު ގޮވާލެއްވި އެވެ.
މީގެއިތުރުން، އާސަންދަ ފަދަ އަސާސީ ހިދުމަތްތައް ހޯދުމަށްވެސް އީ-ފާސް މަޖުބޫރުވެފައިވާތީ، ކައުންސިލްތައް މެދުވެރިކޮށް އީ-ފާސް ވެރިފިކޭޝަންގެ ކަންކަން މިހާރަށްވުރެ ހަރުދަނާކުރަން ޖެހޭ ކަމަށް އޭނާ ވިދާޅުވި އެވެ. ނިމިދިޔަ ލޯކަލް ކައުންސިލް އިންތިޚާބުގައި އީ-ފާސްގެ ސަބަބުން ގިނަ ބައެއްގެ އިންތިޚާބީ ހައްގުތައް ގެއްލިފައިވާ ކަމަށްވެސް މަލީހު ތުހުމަތު ކުރެއްވި އެވެ.
ސަރުކާރުގެ ނުފޫޒާ ބެހޭގޮތުން ވާހަކަދައްކަވަމުން މަލީހު ވިދާޅުވީ، ރައީސް މުއިއްޒުގެ ސަރުކާރުން "ބޯވައެއް" ހެން ހުރިހާ މުއައްސަސާތަކަކަށް ނުފޫޒު ފޯރުވަމުންދާ ކަމަށެވެ. ވަކިން ހާއްސަކޮށް ޖުޑީޝަރީއާއި ރައްޔިތުންގެ މަޖިލީހަށް އޮތް ނުފޫޒާ މެދު އޭނާ ކަންބޮޑުވުން ފާޅުކުރެއްވި އެވެ.
މުއިއްޒުގެ ސަރުކާރުން މިހަމަ ބޯވައެއް ހެން ހުރިހާ މުއައްސަސާތަކަށް އޮތް ނުފޫޒު އެއީ އަޅުގަނޑުމެންގެ ކަންބޮޑުވުމެއް. ހާއްސަކޮށް ޖުޑީޝަރީ އަށް، ހާއްސަކޮށް ރައްޔިތުންގެ މަޖިލީހަށް އެކަން އޮތީ. އެހެންވީމަ އިލެކްޝަންސް ކޮމިޝަނަކީ އޭގެތެރެއިން ވަރަށް ކުޑަކުޑަ ކޮމްޕޯނެންޓެއް. އެހެންވީމަ ހަގީގަތުގައި މި ނިޒާމްތަކާ މި މުއައްސަސާތަކަށް މިއޮތް ނުފޫޒާ، އެ ބޭފުޅުންގެ މިނިވަންކަމަށް އަރައިގަތުން ނިމުމަކަށް އަންނާނީ މުއިއްޒުގެ ސަރުކާރު ނިމުނީމަ. އެކަމުގެ މަސައްކަތް އަޅުގަނޑުމެން މި ކުރަނީ. މުއިއްޒު ވެރިކަމުގަ ހުރިހާ ހިނދަކު އެއްވެސް މުއައްސަސާއަކަށް މިނިވަންކަމާއެކު މަސައްކަތް ކުރުމުގެ ޖާގަ ލިބޭނެކަމަކަށް އަޅުގަނޑު ގަބޫލެއް ނުކުރަން.ޕީޕަލް ނެޝަނަލް ފްރަންޓް (ޕީއެންއެފް) ގެ ސެކްރެޓަރީ ޖެނެރަލް މުހައްމަދު މަލީހު ޖަމާލު
މަލީހު އިތުރަށް ވިދާޅުވީ، އެންމެ މިނިވަންކަމާއެކު މަސައްކަތް ކުރަންޖެހޭ ރައްޔިތުންގެ މަޖިލިސް މިއަދު އޮތީ "ޕެރަލައިޒް" ވެފައި ކަމަށާއި، މި ހާލަތު ބަދަލުވާނީ މި ސަރުކާރު ނިމުމުން ކަމަށެވެ.
ރައީސް މުއިއްްޒުގެ ސަރުކާރުން މުއައްސަސާތަކުގެ މިނިވަންކަން ނަގާލުމަށް، މުއައްސަސާތަކުގެ އިސް މަގާމުތަކަށް ސިޔާސީ އެކްޓިވިސްޓުން އައްޔަނުކުރާކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ވަކިން ހާއްސަކޮށް ކޯޓުތަކުގެ ފަނޑިޔާރުންނަށް ސިޔާސީ ފަރާތްތައް އައްޔަންކުރާކަމުގެ ތުހުމަތު ރައްޔިތުންގެ ތެރެއިން ގިނަ ބަޔަކު ދަނީ ކުރަމުންނެވެ. އަދި މިއީ ހުރިހާ ބާރެއް ރައީސް މުއިއްޒުގެ އަތްޕުޅަށް ޖަމާކޮށް، ރާއްޖޭގެ ވެރިކަން ކުރުމުގެ ނިޒާމު ހުދުމުހުތާރު ވެރިކަމަކާ ދިމާލަށް ދީލާލުމަށް ރައީސް މުއިއްޒު ރާވައިގެން ހިންގަވާ ޖަރީމާއެއް ކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ.
