އުރުދުން އާ ގުޅިގެން އައިސިސްގެ ޓާގެޓު ތަކަށް އަމާޒުކޮށް އެމެރިކާ އިން ހަމަލާ ދީފި

އެމެރިކާގެ ސިފައިންނަށް ދިން ހަމަލާގެ ބަދަލު ހިފުމުގެ ގޮތުން، އައިސިސް ޖަމާއަތުގެ ގިނަ ޓާގެޓު ތަކަކަށް ހަމަލާ ދީފައިވާ ކަމަށް އެމެރިކާ އިން ހާމަ ކޮށްފި އެވެ.

އެމެރިކާ ސަރުކާާރުގެ ބައެއް އިސް އޮފިޝަލުން ހާމަ ކޮށްފައިވާ ގޮތުގައި އެ ހަމަލާ ދީފައި ވަނީ ހުކުރު ދުވަހުގެ ވަގުތެއްގަ އެވެ. އެ ހަމަލާ ތަކުގައި އައިސިސް ޖަމާއަތުގެ 70 އަށް ވުރެ ގިނަ ޓާގެޓު ތަކަށް ހަމަލާ ދީފައިވާ ކަމަށް އެމެރިކާގެ ސެންޓްރަލް ކޮމާންޑް އިން ވަނީ ބުނެފަ އެވެ.

ފާއިތުވި ހަފުތާގެ ތެރޭގައި ސީރިއަގައި އައިސިސް ޖަމާއަތުން ދިން ހަމަލާގައި އެމެރިކާގެ ސިފައިންގެ އޮފިޝަލުން ތަކެއް ވަނީ މަރުވެފަ އެވެ. އެކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ، އެ ހަމަލާގެ ބަދަލު އެމެރިކާ އިން ފުރިހަމަ އަށް ހިފާނެ ކަމަށެވެ. ޓްރަމްޕް އެހެން ވިދާޅުވެފައި ވަނިކޮށް، "އޮޕަރޭޝަން ހޯކައި ސްޓްރައިކް"ގެ ނަމުގައި އެމެރިކާ އިން ވަނީ ހަމަލާ ދީފަ އެވެ. 

އެކަމާ ގުޅިގެން އެމެރިކާގެ ސެކްރެޓަރީ އޮފް ވޯ ޕީޓް ހެގްސެތު ވިދާޅުވެފައި ވަނީ، އެ ހަމަލާ ތަކުގެ ޓާގެޓަކީ އައިސިސް ޖަމާއަތުގެ މީހުންނާއި، އެ މީހުންގެ އިންފްރާސްޓްރަކްޗާ އަދި އެ މީހުންގެ ހަތިޔާރު ބަހައްޓާފައިވާ ތަންތަން ކަމަށެވެ. ހެގްސެތު ވިދާޅުވީ އެއީ ހަނގުރާމަ ފެށުން ނޫން ކަމަށެވެ. ނަމަވެސް، އެއީ ބަދަލު ހިފުމުގެ އިއުލާނެއް ކަމަށް އޭނާ ވިދާޅުވެފައިވެ އެވެ. އެގޮތުން އެމެރިކާ އިން ވަނީ އެ ޤައުމުގެ ދުޝްމަނުން ހޯދައި، އެމީހުން މަރާލާފައި ކަމަށް ހެގްސެތު ފާހަގަ ކުރެއްވި އެވެ. 

އެމެރިކާގެ ސެންޓްރަލް ކޮމާންޑް އިން ބުނެފައި ވަނީ، މެދު ތެރޭގެ ސީރިއާގެ 70 އަށް ވުރެ ގިނަ ޓާގެޓު ތަކަށް ހަމަލާ ދީފައިވާއިރު، އެ ހަމަލާތައް ދިނުމުގައި އުރުދުންގެ ފައިޓާ ޖެޓު ތަކުން އެހީތެރިކަން ދީފައިވާ ކަމަށެވެ. އެމެރިކާ ސަރުކާރުގެ އިސް ބޭފުޅަކު ވިދާޅުވެފައި ވަނީ، އެމެރިކާ އިން އެ ހަމަލާ ދީފައި ވަނީ އެފް-15 އަދި އޭ-10 ޖެޓުތަކާއި، އެޕާޗީ ހެލިކޮޕްޓަރުތައް އަދި ހައިމާސް ރޮކެޓު ސިސްޓަމް ތަކުން ކަމަށެވެ. 

އެކަމާ ގުޅޭ ގޮތުން ސީރިއާގެ ފޮރިން މިނިސްޓްރީ އިން ނެރެފައިވާ ބަޔާނެއްގައި ބުނެފައި ވަނީ އައިސިސްއާ ދެކޮޅަށް ހަނގުރާމަ ކުރުމަށް އެ ޤައުމުން ވަރަށް ބޮޑަށް ތާއީދު ކުރާ ކަމަށެވެ. އަދި ސީރިއާގެ ބިމުގައި އައިސިސް އަށް އެއްވެސް ރައްކާތެރި ކަމެއް ނޯންނާނެ ކަމަށާއި، އެ ފަދަ ފުރުސަތެއް ވެސް ނުދޭނެ ކަމަށް ވަނީ ހާމަ ކޮށްފަ އެވެ. 

ސީރިއާގައި މިހާރު ވެސް އެމެރިކާގެ ހާހެއްހާ ސިފައިން ޙަރަކާތްތެރި ވަމުން އަންނައިރު، ސީރިއާގެ އިންޓީރިއާ މިނިސްޓްރީ އިން ބުނެފައި ވަނީ އެމެރިކާ ސިފައިންނަށް އަމާޒުކޮށް ހަމަލާ ދިން މީހާ އަކީ، އައިސިސް ޖަމާއަތާ ގުޅުން އޮންނަ ކަމަށް ޝައްކު ކުރެވޭ މީހެއް ކަމަށެވެ.