ސޫރިޔާ އަށް އެމެރިކާ ސިފައިން ދިން ވައިގެ ހަމަލާއެއްގައި އައިއެސް ޖަމާއަތުގެ އިސް ލީޑަރަކު މަރާލާފައިވާ ކަމަށް ބުނެފި
ސޫރިޔާގައި ހަރަކާތްތެރިވާ އައިއެސް ޖަމާއަތުގެ އިސް ލީޑަރެއް ކަމަށްވާ އަލީ ޙުސައިން އަލް-ޢުލައިވީ، އެމެރިކާ ސިފައިން ދިން ވައިގެ ހަމަލާއެއްގައި މަރާލައިފި. މިއީ އެމެރިކާގެ މަސްލަހަތުތަކަށް އަމާޒުކޮށް ދޭ ހަމަލާތައް ހުއްޓުވުމަށް ކުރާ މަސައްކަތުގެ ދަށުން ދިން ހަމަލާއެއް ކަމަށް އެމެރިކާގެ ސެންޓްރަލް ކޮމާންޑުން ބުނޭ. ސޫރިޔާގެ ބޮޑު ސަރަހައްދެއް ކުރިން އައިއެސްގެ ބާރުގެ ދަށުގައި އޮތް ނަމަވެސް، ބައިނަލްއަގުވާމީ ކޯލިޝަނުން ދަނީ އެ ޖަމާއަތުގެ ބާކީ ތިބި ހަނގުރާމަވެރިން ނައްތާލުމަށް މެދުނުކެނޑި މަސައްކަތް ކުރަމުން.
ސޫރިޔާގެ ދީރު ހާފިރުގައި، ސީރިއަން ޑިމޮކްރެޓިކް ފޯސަސް (އެސް.ޑީ.އެފް) ގެ ލީޑަރުންނާއި އެމެރިކާ އަސްކަރިއްޔާގެ އިސްވެރިން 2026 ޖެނުއަރީ 16 ވަނަ ދުވަހު ބޭއްވި ބައްދަލުވުމެއް އޮތް ސަރަހައްދުގައި އެމެރިކާގެ ސިފައިންގެ މީހަކު ފޯރިމަރަނީ. | ރޮއިޓާސް
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުދަ ދުވަހު އެކްސްގައި އާންމުކުރި ބަޔާނެއްގައި ބުނެފައިވަނީ، މިދިޔަ ހަފުތާގައި ސޫރިޔާގެ ހުޅަނގު އުތުރު ސަރަހައްދަށް އެމެރިކާ ސިފައިން ދިން ވައިގެ ހަމަލާއެއްގައި އައިއެސް ޖަމާއަތުގެ އިސް ލީޑަރަކު މަރާލާފައިވާ ކަމަށެވެ.
ސެންޓްކޮމް އިން ހާމަކުރި ގޮތުގައި ޖޫން މަހުގެ 19 ވަނަ ދުވަހު ދިން މި ހަމަލާގައި މަރާލާފައިވަނީ އަލީ ޙުސައިން އަލް-ޢުލައިވީ އެވެ. މިއީ އެމެރިކާއިން ބޭރުގައި ތިބި އެމެރިކާގެ ރައްޔިތުންނަށާއި އެމެރިކާގެ ފަސްގަނޑަށް ހަމަލާދޭން މަސައްކަތްކުރާ ޓެރަރިސްޓުން ނައްތާލުމަށް ކުރަމުންދާ މަސައްކަތުގެ ދަށުން ދިން ހަމަލާއެއް ކަމަށާއި، ސަރަހައްދީ ބައިވެރިންނާއެކު މި މަސައްކަތް ކުރިއަށް ގެންދާނެ ކަމަށްވެސް އެ ބަޔާނުގައި ބުނެފައިވެއެވެ.
ސެންޓްކޮމްގެ ކޮމާންޑަރު އެޑްމިރަލް ބްރެޑް ކޫޕާ ވިދާޅުވީ، އައިއެސް ޖަމާއަތް މުޅިން ބަލިކޮށް، އެ ޖަމާއަތުގެ ބާކީ ތިބި މީހުން ނައްތާލުމަށް ސެންޓްކޮމް އާއި ބައިވެރިވާ ގައުމުތަކުން ސާބިތުކަމާއެކު ދެމިތިބޭނެ ކަމަށެވެ. އަދި އެމެރިކާގެ ފަސްގަނޑާއި، ސިފައިންނާއި، އެ ސަރަހައްދުގައި ތިބި އެކުވެރި ގައުމުތަކާއި ބައިވެރިންގެ ދިފާއުގައި ކުރަންޖެހޭ މަސައްކަތްތައް މެދުނުކެނޑި ކުރިއަށް ގެންދާނެ ކަމަށްވެސް އޭނާ ވިދާޅުވިއެވެ.
ސޫރިޔާގެ ރައީސް އަހުމަދު އަލް-ޝަރާގެ ސަރުކާރާ ދެކޮޅަށް އައިއެސް އިން އާ އޮޕަރޭޝަންތަކެއް ފަށާފައިވާކަން އިއުލާންކޮށްފައިވާއިރު، މިދިޔަ ފެބްރުއަރީ މަހުން ފެށިގެން އެ ޖަމާއަތުން ދަނީ ގިނަ ހަމަލާތަކެއް ދެމުންނެވެ. ރައީސް އަލް-ޝަރާގެ ސަރުކާރުން މިދިޔަ އަހަރު ވަނީ އައިއެސްއާ ދެކޮޅަށް އެމެރިކާ އިސްވެ އޮވެ އުފައްދާފައިވާ ކޯލިޝަނާ ގުޅިފައެވެ.
މިދިޔަ ހޮނިހިރު ދުވަހު ސޫރިޔާގެ އިރުއުތުރު އަލެއްޕޯ ޕްރޮވިންސްގެ މަންބިޖް ސިޓީ ކައިރީގައި ދިން ހަމަލާއެއްގެ ޒިންމާވެސް ހަނގުރާމަވެރި އައިއެސް ޖަމާއަތުން ވަނީ އުފުލާފައެވެ.
މީގެ ދިހަ ވަރަކަށް އަހަރު ކުރިން ސޫރިޔާގެ ދާޚިލީ ހަނގުރާމަ އެންމެ ގަދަވި ދުވަސްވަރު، އެ ގައުމުގެ ހަތަރުބައިކުޅަ އެއްބަޔަށްވުރެ ބޮޑު ސަރަހައްދެއް އައިއެސްގެ ކޮންޓްރޯލްގެ ދަށުގައި އޮތެވެ. ނަމަވެސް އެމެރިކާ އިސްވެ އޮތް ކޯލިޝަނާއި އެހެނިހެން ފަރާތްތަކުން ދިން ހަމަލާތަކުގައި އެ ޖަމާއަތް ވަނީ އެ ސަރަހައްދުތަކުން ބޭރުކޮށްލާފައެވެ.
