ސީރިއާގެ ދާޚިލީ ވުޒާރާއިން ބުނީ އެމެރިކާ އިސްކޮށް ހިންގާ ކޯލިޝަނާ ގުޅިގެން ހިންގި އޮޕަރޭޝަނެއް ގައި އައިއެސް ޖަމާޢަތުގެ އިސް ވެރިއެއް ކަމަށްވާ މުޙައްމަދު ޝަހާދާ މަރާލާފައިވާ ކަމަށް. ޑިސެމްބަރު 13 ގައި އެމެރިކާގެ ދެ ސިފައިންނާއި އާންމު ރައްޔިތަކު މަރުވި ހަމަލާގެ ބަދަލު ހިފުމުގެ ގޮތުން އެމެރިކާ ސިފައިން ސީރިއާގައި އައިއެސް ޖަމާޢަތުގެ ވަރަށް ގިނަ އަމާޒުތަކަށް ހަމަލާދީފައިވޭ.
ސީރިއާގެ ސަލާމަތީ ބާރުތަކުގެ މެންބަރެއް
ދިމިޝްގު ކައިރިން އައިއެސް ޖަމާޢަތުގެ އިސް ވެރިއަކު ހައްޔަރުކުރިތާ ގަޑިއެއްހާ އިރު ފަހުން، އެމެރިކާ އިސްކޮށް ހިންގާ ކޯލިޝަނާ ގުޅިގެން، އައިއެސް ޖަމާޢަތުގެ އިސް ވެރިއަކު މަރާލާފައިވާ ކަމަށް ސީރިއާ ގެ އޮފިޝަލުން ބުނެފި އެވެ.
ސީރިއާ ގެ ދާޚިލީ ވުޒާރާ އިން ބުނެފައިވަނީ، "މި އޮޕަރޭޝަންގެ ސަބަބުން، ސީރިއާގައި އައިއެސް ޖަމާޢަތުގެ އެންމެ އިސް ވެރިންގެ ތެރެއިން އެކެއް ކަމަށް ބެލެވޭ، 'އަބޫ އުމަރު ޝައްދާދު' ގެ ނަމުން މަޝްހޫރު ހައްދުފަހަނަޅާފައިވާ ޓެރަރިސްޓު މުޙައްމަދު ޝަހާދާ ނައްތާލެވުނެވެ."
"މި އޮޕަރޭޝަނަކީ، ޤައުމީ ސަލާމަތީ އިދާރާތަކާއި ބައިނަލްއަޤްވާމީ ބައިވެރިންނާ ދެމެދު އޮންނަ ގުޅުމުގެ ހެޔޮ ބޭނުން ހިފޭކަން ކަށަވަރުކޮށްދޭ ކަމެކެވެ." އެ ބަޔާނުގައި ބުނެފައިވެ އެވެ.
އޭގެ ކުރިން، ކަމާބެހޭ ފަރާތްތަކުން ބުނެފައިވަނީ، ބުދަ ދުވަހު ދިމިޝްގުގައި ހަރަކާތްތެރިވާ އައިއެސް ޖަމާޢަތުގެ ވެރިއެއް ކަމަށްވާ، އަބޫ އުމަރު ތާބިޔާ ގެ ނަމުން ވެސް މަޝްހޫރު ތާހާ އަލް-ޒޫބީ އާއި އޭނާގެ ބައެއް ގާތް މީހުން ހައްޔަރުކުރެވިފައިވާ ކަމަށެވެ.
ޑިސެމްބަރު 13 ގައި ދިން ހަމަލާއެއްގައި އެމެރިކާގެ ދެ ސިފައިންނާއި އެމެރިކާގެ އާންމު ރައްޔިތަކު މަރުވިއެވެ. ވޮޝިންގްޓަން އިން ބުނީ މި ހަމަލާ ދިނީ ސީރިއާގެ ޕަލްމީރާ ގައި ހުރި އައިއެސް ޖަމާޢަތުގެ މީހެއް ކަމަށެވެ.
މި ހަމަލާގެ ބަދަލުހިފުމުގެ ގޮތުން، އެމެރިކާ ސިފައިން ސީރިއާގައި ހުރި އައިއެސް ޖަމާޢަތުގެ ވަރަށް ގިނަ އަމާޒުތަކަށް ހަމަލާދީފައިވެއެވެ.
ސީރިއަން އޮބްޒަރަވޭޓަރީ ފޮރ ހިއުމަން ރައިޓްސް އިން ބުނާ ގޮތުގައި، މި ހަމަލާތަކުގައި ހައްދުފަހަނަޅާފައިވާ ޖަމާޢަތުގެ ފަސް މެންބަރުން މަރުވެފައިވެއެވެ.
ނޮވެންބަރު މަހު، ރައީސް އަޙްމަދު އަލް-ޝަރާ ވޮޝިންގްޓަން އަށް ކުރެއްވި ދަތުރުފުޅެއްގައި، އައިއެސް ޖަމާޢަތާ ދެކޮޅަށް އެމެރިކާ އިސްކޮށް ހިންގާ ކޯލިޝަނާ ސީރިއާ އިން ވަނީ ރަސްމީކޮށް ގުޅިފަ އެވެ.
