އިތުރަށް ވައުދު، ފުއްދޭ ވައުދެއް ނެތް
ރާއްޖޭގެ އިގްތިސާދީ ހާލަތު ގޯސްވެ، ތަކެތީގެ އަގު އިންތިހާއަށް އުފުލުމާ ގުޅިގެން އާންމު ރައްޔިތުންގެ ޝަކުވާތައް ވަނީ އިތުރުވެފަ. ސަރުކާރުން ވީ ވައުދުތައް ނުފުއްދުމާއި، ތަރައްގީގެ މަޝްރޫއުތައް ހުއްޓިފައިވުމުގެ އިތުރުން، ސިއްހީ ހިދުމަތް ހޯދުމުގައި ހުރި ދަތިތަކާ ހުރެ ގިނަ ބަޔަކު ދަނީ ކަންބޮޑުވުން ފާޅުކުރަމުން.
ނޭޝަންޗެޓް: އެޕިސޯޑް 2 ގައި ރައީސް މުއިއްޒު ބައިވެރިވެވަޑައިގަންނަވަނީ. | ރައީސް އޮފީސް
ބާޒާރު މަތީގައި ތަންކޮޅެއް އަޑުގަދަވެގެން ގާތްކޮށްލީމެވެ. އެއްޗެހީގެ އަގު ބޮޑުވީއެވެ. އެއްޗެހި ވިއްކަން ގޮޅީގައި އިން ބޭބެ ބުނި އަގު ކަސްޓަމަރަށް ބޮޑުވީއެވެ. ބޭ އިޚްތިޔާރުގައި އޭނާއަށް، ހާދަ އަގުބޮޑޭ ބުނެލެވުނީއެވެ. އަޑު ގަދަވެގެން މިއުޅެނީ އެކަމާއެވެ. އަގުބޮޑުވިގޮތް އެބޭބެ ކިޔައިދޭން ފެށުމުންނެވެ. ބޭބެވެސް ދެއްކީ އެއް ވާހަކައެވެ. ކަސްޓަމަރު ވެސް ދެއްކީ ދެވަނަ ދެވާހަކައެއް ނޫނެވެ. ހަމައެވާހަކައެވެ. އެދެމީހުން ވެސް ދެއްކީ މީހާރު ކަންހުރިގޮތުގެ ވާހަކައެވެ. ރުޅިއައިސްގެނެއް ނޫނެވެ. ބާޒާރުގައި ތަކެތީގެ އަގު ބޮޑު ވާހަކަ އާއި އެކަން އެހެންވާން މެދުވެރިވާ ސަބަބުގެ ވާހަކައެވެ. އެކަންކަމާއި ގުޅިފައި ހުރި އެހެން ކަންކަމުގެ ވާހަކައެވެ. ޑޮލަރުގެ އަގު އިންތިހާއަށް އުފުލުމުގެ ވާހަކައެވެ.
މޮޅު ދެ އިގްތިސޯދީ މާހިރުންހެން އެދެމީހުން އެދެއްކި ވާހަކައިިގެ ތެރެއަށް އެހެން މީހުންވެސްވަދެ ބައިވެރިވަމުން ދިޔައެވެ. ވިޔަފާރިކުރަން އަންނަ މީހުންނާއި ތަކެތި ވިއްކާން ތިބޭ މީހުންނެވެ. އެންމެން ވެސް ހަމަ އެއް މައުޟޫއަކަށެވެ. ހުރިހާ ވާހަކައެއް ވެސް ގޮސް ނިމެނީ މުއިއްޒާ ހަމައަށެވެ. ޖެހެނީ ސަރުކާރުގައެވެ. ސަރުކާރަށް ކަންކަން ނުކުރެވޭ ވާހަކައެވެ. ދެއްކި ވާހަކަ އާއި އަމަލާ ދިމާ ނުވާ ވާހަކައެވެ. އެއްވެސް ވައުދެއް ނުފުދޭ ވާހަކަ އާއި ހައްދަވައިގެން ކަމެއް ކުރެވޭތީ ނުފެންނަ ވާހަކައެވެ.
އެއްބަޔަކު ބުނީ ގެނެވުނީ ގޯސް ބަދަލެއް ކަމަށެވެ. އޭގެ ތެރެއިން މީހަކު ބުންޏެވެ. އެރަށުގައި ކުރީ ސަރުކާރުން ފަށާފައިހުރި ކަންކަން ނިކަން ބާރަށް ނިންމާނަމޭ މުއިއްޒު ވިދާޅުވިއެވެ. އެކަމަކު އެއިން ކަމެއް ކުރާތަނެއް ނުފެނެއެވެ.
އެހެންމީހަކު ބުންޏެވެ. އެރަށުގައި އެއްކަމެއް ކުރަން ދެ ފަހަރަށް ބަޔަކާ ހަވާލުކޮށްފިއެވެ. އެކަމަކު އަދިވެސް ގާބުރިއެއް އުވަހަންޖެއް ހިސާބު ވެސް ބާއްވާ ނުލައެވެ. އެކަމަކު އެންމެފަހުން ވަޑައިގެންފައި ވެސް ދެއްކެވީ އަނެއްކާ ވެސް ހަމައެތަން ހަދާ ވާހަކަ ކަމަށެވެ.
އެކަމަށް ބާރުދެމުން ތަންކޮޅެއް ދުރުގައި ހުރި މީހަކު ބުންޏެވެ. ނޫނޭ ކަންކަން އެބަކުރެއެވެ. ނާ ފަހެ ކަންކަމަށް މީހުން އެބަނަގައެވެ. އެވަރަށް މީހުން ލާނީ ކަންކަން ކުރާން ތާއެވެ. ޖެއްސުމުގެ ރާގަކަށް އެބޭ އެބުނެލި ވާހަކަ ނިންމާލީ އެހެން މީހެކެވެ. އޭނާ ބުންޏެވެ. އާން މީހުން ލައެވެ. އެކަމަކު އެވެރިން ލަނީ ވިނަ ނޮޅާށެވެ. އެއްކޮޅުން ވިނަ ނޮޅާ ނިމޭއިރު އަނެއްކާ އޮންނަނީ ނޮޅި ހިސާބުގައި ވިނަފަޅައި، ނޮޅަން ޖެހިފައެވެ. މަހަށް ދިޔަ މީހުންނަށް ވަޒީފާ ދިނީމާ މަހަށް ދިއުން ހުއްޓާލާފައި އެވެރިން އެތިބެނީ ވިނަ ނޮޅާލަ ނޮޅާލައެވެ. އެކަމަކު އެއިން ތަނެއްގައި އިތުރަށް ކަމެއް ކުރާތީއެއް ނުފެނެއެވެ.
ފާޑަކަށް ކެއްސާލާފައި ދެން ހުރި މީހާ ޖެހީ "މަރުތޭލުން ސީދާ ބޮލުގައެވެ". އޭނާ ބުންޏެވެ. މީކީ އެއްކަމެއް ވެސް ވާނެ ބައެއް ނޫނެވެ. މަވެސް މީ މީނާ ގެންނަން ވޯޓު ދިން މީހަކީމެވެ. އެކަމަކު މިހާރު ގެނެވުނު މޮޔަ ހީވެއެވެ. މިއައީ ބޭސް ސިޓީއަކަށް ބޭހެއް ނުލިބިގެން މުޅި މާލޭގައި ދުއްވާފައެވެ. ލިބޭނެ ގޮތެއް ނުވިއެވެ. ޑޮކްޓަރެއްގެ އެޕޮއިންޓްމެންޓެއް ލިބެނީ މީހާ ރަނގަޅުވާ ފަހުން ނޫނީ ގަދަ ނުވެ މަރުވާ ފަހުންނެވެ. އެބުނާ ބެންކޮކް އާސަންދަ ވެސް ލިބެނީ ވަިކބަޔަކަށޯލައެވެ. އޭނާ އަމުނާލީ އޭނާގެ ހާލަތެވެ.
ކޮންމެއަކަސް މިއީ މިއަދު މުޅި ރާއްޖެއިން އިވޭ އަޑުތަކެވެ. ބާޒާރުމަތިން މިވާހަކަ ތަންކޮޅެއް ތަފާތުކޮށް އިވުނަސް މިވާހަކަ ނުދައްކާ ތަނެއް ނެތެވެ. ރަށްރަށުގެ ހޮޅުއަށިއަތަކުގައެވެ. މަގު ކުނި ކަހަން ނުކުންނަ އަންހެންވެރިންނެވެ. މަސްއޮޑި އަތިރީގައެވެ. ޒުވާނުން ޓިކްޓޮކާއި ފޭސްބުކް ފަދަ ސޯޝަލް މީޑިޔާގެ ޕްލެޓްފޯމްތަކުގައެވެ.
ހަގީގަތަކީ ދައުރު ދެބަޔަށް އެޅިގެން ދިޔައިރު އެއްވެސް ކަމެއް ނުވުމެވެ. ވާން އުޅޭތަން ވެސް ނުފެނުމެވެ. އެއަށްވުރެ ބޮޑަށް މީހުންގެ ހާލަތު ގޯސްވުމެވެ. ތަކެތީގެ އަގު އިންތިހާއަށް އުފުލި އަނގަޔާ އަތާ ދިމާ ނުވާ ހިދސާބަށް ހާލަތު ދިޔައީއެވެ. މީހުންގެ މުސާރަތައް އެއާ އެއްވަރަށް ބޮޑު ނުވެ ހާސްކަން އިތުރުވީއެވެ. ބިލްތައް އަތް ނުފޯރާ ފަށަށް މައްޗަށް ދިއުމުގެ ބޮލުގެ ރިހުމެވެ. ފާސްކުރާ ބޮޑު ބަޖެޓްތައް ހުސްވެއެވެ. އެކަމަކު އާއްމު ރައްޔިތުންގެ ހާލަތަކަށް އެއިން މަންފާއެއް ނެތެވެ. އެކަމަކު ސަރުކާރާއި މުއިއްޒު ދަނީ އަދިވެސް ވައުދުމައްޗަށް އިތުރު ވައުދުތައް ވަމުންނެވެ.
