ރާއްޖެ އާއި ތައިލެންޑުގެ ގުޅުން ބަދަހިކުރުމާ ގުޅޭގޮތުން މަޝްވަރާކުރައްވައިފި
ދިވެހިރާއްޖެއާއި ތައިލެންޑާ ދެމެދު އޮތް ގުޅުން އިތުރަށް ބަދަހިކުރުމަށްޓަކައި ވިޔަފާރި، އިންވެސްޓްމަންޓް، ފަތުރުވެރިކަން އަދި ސިއްހީ ދާއިރާއިން އެއްބާރުލުން ދިނުމާ ގުޅޭގޮތުން ދެ ގައުމުގެ ފޮރިން މިނިސްޓަރުން ފުޅާދާއިރާއެއްގައި މަޝްވަރާކުރެއްވި.
ތައިލެންޑުގެ ފޮރިން މިނިސްޓަރު ސިހަސަކް ޕުއަންގްކެޓްކިއޯ | ގެޓީ އިމޭޖަސް
ތައިލެންޑުގެ ބޮޑުވަޒީރުގެ ނައިބު އަދި ފޮރިން މިނިސްޓަރު ސިހަސަކް ޕުއަންގްކެޓްކިއޯ، ދިވެހިރާއްޖޭގެ ފޮރިން މިނިސްޓަރު އިރުތިޝާމް އާދަމްއާ ފޯނުން ގުޅުއްވައި މަޝްވަރާ ކުރައްވައި ފިއެވެ. މިދިޔަ ހޯމަ ދުވަހު ފޯނުން ކުރެވުނު މި މަޝްވަރާގައި، އިރުތިޝާމް އާދަމް ދިވެހިރާއްޖޭގެ ފޮރިން މިނިސްޓަރުގެ މަގާމަށް އައްޔަންކުރެއްވުމާ ގުޅިގެން، ތައިލެންޑުގެ ބޮޑުވަޒީރުގެ ނައިބު އެކަމަނާއަށް މަރުހަބާ ދެންނެވި އެވެ.
މި މަޝްވަރާގައި ދެ ގައުމުގެ ދެމެދުގައި އޮތް ބައިލެޓްރަލް ނުވަތަ ދެފަރާތުގެ ގުޅުން އިތުރަށް ބަދަހިކުރެވިދާނެ ގޮތްތަކާ ގުޅޭގޮތުން ދެ ބޭފުޅުން ވާހަކަފުޅު ދެއްކެވި ކަމަށް ތައިލެންޑްގެ ފޮރިން މިނިސްޓްރީން ހާމަ ކޮށްފައިވެ އެވެ. މިގޮތުން މަތީ ފަންތީގެ ވަފުދުތައް ބަދަލުކުރުމާއި، ވިޔަފާރިއާއި، އިންވެސްޓްމަންޓް އަދި ފަތުރުވެރިކަން ކުރިއެރުވުމުގެ އިތުރުން، ދެ ގައުމުގެ ރައްޔިތުންގެ މެދުގައި އޮންނަ ގުޅުން ބަދަހިކުރުމާ ގުޅޭގޮތުން ފުޅާދާއިރާއެއްގައި މަޝްވަރާކުރެއްވި އެވެ. މީގެ އިތުރުން ސިއްހީ ދާއިރާއިން އެއްބާރުލުން ދިނުމާއި، ބައިނަލްއަގުވާމީ މައިދާނުގައި ގުޅިގެން މަސައްކަތް ކުރުމާ ގުޅޭގޮތުންވެސް ދެ ބޭފުޅުން ޚިޔާލު ބަދަލުކުރެއްވި އެވެ.
މީގެ އިތުރުން، މިހާރު ދުނިޔެއަށް ކުރިމަތިވެފައިވާ ގޮންޖެހުންތަކާ ގުޅޭގޮތުންވެސް ދެ ގައުމުގެ ފޮރިން މިނިސްޓަރުން މަޝްވަރާ ކުރެއްވި އެވެ. އޭގެ ތެރޭގައި ކާބޯތަކެތީގެ ރައްކާތެރިކަމާއި، ހަކަތައިގެ ރައްކާތެރިކަން ކަށަވަރުކުރުމާއި، ކަނޑުދަތުރުފަތުރުގެ މިނިވަންކަން ދެމެހެއްޓުމުގެ އިތުރުން، އިންޓަނެޓް މެދުވެރިކޮށް ހިންގާ މަކަރާއި ހީލަތުގެ މައްސަލަތައް ނުވަތަ އޮންލައިން ސްކޭމްތަކާ ދެކޮޅަށް މަސައްކަތް ކުރުން ހިމެނެ އެވެ.
